1 Zinghomo 20 - Luganuzi Luswanu Kuli Wanhu Wose 2002

Dawudi yakuliteka likaya lya Laba

¹ Na lono wali mwamulizo wo mwaka mupya, mu madaha ge watemi ga ku wubita ku milewo, Yowabu yakawa yo mutonji we vitung'ati we milewo, yakayihoma no kuyisola yisi ye Waamoni. Ninga mutemi Dawudi yekala ku Yelusalemi. Nayo Yowabu yakayihoma yisi ya Laba, yakayongomeza.

² Naco cihwani ce Waamoni, cono cikucemwa, Moleki, cali civwicigwe mukumbo wa zahabu, wono wali wina wuzito wa kilo makumi madatu na yine. Na mugati yayo mwali movili vibwe vyo wuguzi wukamu. Dawudi yakavisola yakaviwicila mu mukumbo wakwe mweneco. Kanyhi yakasola liwalo yiwaha lye mateka mwi'kaya.

³ Yakawasola wanhu wa mwi'kaya, yakawetumya milimo yo wuselemala, no wutyana masili, hamonga ne zimheno. Kanyhi yakawanoza nhavivyo ne wanhu wa mu makaya ganji ge Waamoni. Na hanyuma, mwene hamonga ne wanhu wakwe, wakawuya ku Yelusalemi.

Wulugu ne manhu ge Wafilisiti

⁴ Wulawa lulo, kukejela kanyhi wulugu ne Wafilisiti ku Gezeli. Hobaho lono Sibekayi munya Husha, yamuwulajila Sipayi ne Wafilisiti wakawa kusumwa.

⁵ Kanyhi wukenuka wulugu wunji ne Wafilisiti. Nayo Elihanani u mwana wa Yayili, yakamuwulaga Lahimi u nduguye wa Goliyati u Mugiti, mono u mugoha wakwe, wali wina yidete yikangazi nha mucici wa kaya.

⁶ Kanyhi wulugu wunji wukenuka ku Gati. Na kuko kwali na munhu mutali muno, mono yali yena vidole mutandatu mutandatu mu miwoko yakwe yose, na kanyhi vidole mutandatu mutandatu mu migulu yakwe yose. Munhu yuyu yali we ndelwa ye manhu mawaha kanyhi matali muno ge katali.

⁷ Munhu yuyo yakawaliganga Waisilayeli. Ninga Yonazani u mwana wa Shama, u nduguye wa Dawudi, yakamuwulaga.

⁸ Ne wanhu wawano wadatu, wono Dawudi yawawulaga wakwitaziliza ne wanhu wakwe, wali wo we ndelwa ye manhu mawaha kanyhi matali muno ga Gati.