1 Zinghomo 2 - Luganuzi Luswanu Kuli Wanhu Wose 2002

Wo lulelo lwa Yuda

¹ Yakobo yali yena wana yikumi na wejete, nawo wo awa: Lubeni, Simiyoni, Lawi, Yuda, Isakali, Zabuloni,

² Dani, Yusufu, Benyamini, Nafutali, Gadi, na Asheli.

³ Yuda, yali yena wana wahano. Na kuli mugolece wakwe we Cikanani Batishuwa, nako yakatuga wana wadatu, Eli, Onani, na Shela. Ninga Eli, u mwanagwe mulongozi kulelwa, yali munhu mubi muno muno, na ku soko yiyo, holeka Muwaha Mulungu yakamuwulaga.

⁴ Nayo mukwewe Tamali, yakamulelela wana wejete, Pelezi na Zela.

⁵ Nayo Pelezi, yali yena wana wejete, Hezeloni na Hamuli.

⁶ U mwanakwawe Zela, yali yena wana wahano, Zimuli, Etani, Hemani, Kalikoli, na Dalida.

⁷ Akani mwana wa Kalimi, wa muli wana wa Zela, yaleta wongomezwe wuwaha kuli Waisilayeli, vyono yavisola vinhu vyo mwiko, vyono vyali vilavywe kuli Mulungu.

⁸ Nayo Etani yali yena mwana monga, litagwa lyakwe Azaliya.

Wityatye we mhuga yo mutemi Dawudi

⁹ Hezeloni, yali yena wana wadatu, Yelameli, Lamu na Kalebi.

¹⁰ Wityatye we mhuga yiyo, ku wulawilila kwa Lamu sunga kuli Yese, wali wuli nhavi: Lamu yakamulela Amuminadabu, nayo Amuminadabu yakamulela Nahashoni, (yuyu Nahashoni yali yo munhu muwaha we lilumbo mu we mhuga ya Yuda.) Nayo Nahashoni yakamulela Salemoni,

¹¹ Salemoni yakamulela Bowazi, Bowazi yakamulela Obedi,

¹² Obedi yakamulela Yese.

¹³ Nayo Yese yali yena wana mupunghati, na mu ndelwa yawo wali wetyatizye nhavi, Mwana mulongozi kulelwa yali Eliyabi, hanyuma wakatyatya Abinadabu, Shama,

¹⁴ Nataneli, Ladayi

¹⁵ Ozemu na Dawudi.

¹⁶ Ninga wakawa ne walumbu zawo wejete nhavivyo, nawo wo awano, Zeluya na Abijeli. Nayo Zeluya u mwana we cicekulu wa Yese, yali yena wana wadatu, nawo wo awano, Abishayi, Yowabu, na Asaheli.

¹⁷ U mwanagwe we cicekulu Abijeli, nayo yakatolwa na Yefa wa mu lulelo lwa Ishumayeli. Nawo wakalela mwana yumonga litagwa lyakwe Amasa.

Wo lulelo lwa Hezeloni

¹⁸ Kalebi u mwana wa Hezeloni, yakamutola Azuba, nawo wakalela mwana yumonga we cicekulu, litagwa lyakwe Yeliyoti. Kanyhi yakalela na wana wadatu we cilume, nawo wo awano: Yesha, Shoba, na Alidoni.

¹⁹ Azuba yaza kufwa, Kalebi yakatola mugolece yunji, litagwa lyakwe Efulata. Wakalelana nayo mwana monga, litagwa lyakwe Huli.

²⁰ Nayo Huli yakalela mwana yumonga, litagwa lyakwe Uli. Nayo Uli yakamulela Bezaleli.

²¹ Nayo Hezeloni, lono yali yaficila myaka makumi mutandatu, yakamutola mwana we cicekulu wa Macili, u lumbulye lya Gileyadi, nawo wakalela mwana yumonga, litagwa lyakwe Segubu.

²² Nayo Segubu, yakalela mwana monga, litagwa lyakwe Yayili. Nayo yuyu Yayili, yakatema makaya makumi mejete na madatu ga mu yisi ya Gileyadi.

²³ Ninga wutemi wa Geshuli na Alamu, wukagasuma kuko makaya makumi mutandatu, hamonga ne vitumbi vya Yayili na Kenati, ne vikaya vyose vyono vyali vili behi behi. Ne wanhu wose wono wekalaga mumo, wali wo lulelo lwa Macili u sogwe wa Gileyadi.

²⁴ Na lono Hezeloni yali yeza kufwa, u mwanagwe Kalebi, yakamutola Efulata, u mucekulu mono yali wo sogwe Hezeloni. Wakalelana nayo mwana yumonga, litagwa lyakwe Ashihuli, mono yalizenga likaya lya Tekowa.

Wo lulelo lwa Yelameli

²⁵ Nayo Yelameli, mono yali yo mwana mulongozi kulelwa kwa Hezeloni, yali yena wana wahano, nawo wo awano. Lamu, u mwana u mulongozi kulelwa, hanyuma ho Buna, Oleni, Ozemu, na Ahiya.

²⁶ Nayo Lamu yali yena wana wadatu, nawo wo awano; Mayazi, Yamini, na Ekeli.

²⁷ Ninga yuyu Yelameli, yakawa yena mugolece yunji kanyhi we kejete, litagwa lyakwe Atala. Wakalelana nayo mwana monga, litagwa lyakwe Onamu.

²⁸ Nayo Onamu yali yena wana wejete, nawo wo awano, Shamayi na Yada. Nayo Shamayi yali yena wana wejete, Nadabu na Abishuli.

²⁹ Abishuli yakamutola mucekulu, litagwa lyakwe Abihayili, wakalelana wana wejete, Ahibani na Molidi.

³⁰ Nayo Nadabu u muwahawe wa Abishuli, yali yena wana wejete, Saledi na Apayimu. Ninga Saledi yakafwa si yaleka hamba wana.

³¹ Nayo yuyu Apayimu, yali yo sogwe wa Ishi. Nayo Ishi, yali yo sogwe wa Ahilayi.

³² Nayo Yada u mwanakwawe wa Shamayi, yali yena wana wejete, Yeta, na Yonazani. Ninga Yeta yakafwa si yaleka hamba wana.

³³ Yonazani yali yena wana wejete, Peleti na Zaza. Na wawano wose wali wo wana wa Yelameli.

³⁴ Nayo Sheshani yali yasina wana we cilume, yali yena wana wa cicekulu wose. Yakawa yena mwitumami we Cimisili, litagwa lyakwe Yeliha.

³⁵ Sheshani yakamukombolela Yeliha mwanagwe monga we cicekulu vitole nayo. Nawo wakalelana mwana yumonga, litagwa lyakwe Atayi.

³⁶ No wityatye we mhuga yawo, ku wulawilila Atayi sunga ko kwa Elishama, wali wuli nhavi: Atayi, yakamulela Natani, Natani yakamulela Zabadi,

³⁷ nayo Zabadi yakamulela Efilali, nayo Efilali yakamulela Obedi.

³⁸ Nayo Obedi yakamulela Yehu, na Yehu yakamulela Azaliya.

³⁹ Nayo Azaliya yakamulela Helesi, nayo Helesi yakamulela Eleyasa,

⁴⁰ nayo Eleyasa yakamulela Sisimayi, nayo Sisimayi yakamulela Shalumu.

⁴¹ Nayo Shalumu yakamulela Elishama.

Wo lulelo wanji kanyhi wa Kalebi

⁴² Nayo Mesha mwana wa Kalebi, u mwana mulongozi kulelwa, yuyu yali yo sogwe wa Zifu, nayo Zifu yali yo sogwe wa Melesha, nayo Melesha yali yo sogwa wa Hebuloni.

⁴³ Nayo yuyu Hebuloni, yali yena wana wane, Kola, Tepuwa, Lekemu na Shema.

⁴⁴ Shema yali yo sogwe wa Lahamu, kanyhi yali yo kukuye wa Yolekeyamu. Nayo Lekemu u muwahawe wa Shema, yali yo sogwe wa Shamayi,

⁴⁵ nayo shamayi yali yo sogwe wa Mawoni, nayo Mawoni yali yo sogwe wa Betizuli.

⁴⁶ Nayo Kalebi kanyhi, yali yena mujitulwa wakwe, litagwa lyakwe Efa. Kalebi vikalelana na yuyo mujitulwa wakwe wana wanji wadatu, Halani, Moza na Gazezi. Nayo Halani yali yena mwana yumonga, litagwa lyakwe Gazezi.

⁴⁷ (Hakawa ho yuli munhu yunji, litagwa Yahidayi. Munhu yuyu, yali yena wana mutandatu, nawo wo awano; Legemu, Yotamu, Geshani, Peleti, Efa, na Shayafu.)

⁴⁸ Kanyhi Kalebi, yakawa na mujitulwa yunji kanyhi, litagwa lyakwe Mayaka, vikalelana nayo wana wejete, Sheba na Tilihana.

⁴⁹ Hanyuma yayo kanyhi, yakatuga wana wejete, Shayafu mono yalizenga likaya lya Madimana. Nayo Shava yo yagazenga i makaya ga Makibena na Gibeya. Hamonga na zizo, Kalebi kanyhi yali yena mwana monga wa cicekulu, litagwa lyakwe Akisa.

⁵⁰ Na wawano wono wetyatizye, nawo wali wana wa Kalebi nhavivyo. Huli, mono yali yo mwana u mulongozi kulelwa kwa Kalebi, no mugolece wakwe litagwa lyakwe Efulata. Nayo Shobali u mwana wa Huli, yuyo yo yalizenga likaya lya Kiliyati Yeyalimu.

⁵¹ Nayo Salema u mwanagwe we kejete, yo yalizenga likaya lya Betelehemu. No mwanagwe we kadatu, mono yacemwaga Helefu, nayo yo yalizenga likaya lya Betigada.

⁵² Yuyu nayo Shobali mono yayizenga Kiliyati Yeyalimu, yali yo sogo we wanhu wa ku Halowe, yono yali yimemile nusu ye wanhu wa ku Menuhoti.

⁵³ Hamonga ne wanhu we zimhuga azino zono zekalaga kuko ku Kiliyati Yeyalimu, nha cinji Wayitili, Waputi, Washumati, Wamishilayi. (Ne wanhu wono wekalaga mu makaya ga Zola na Eshitayoli, wose walawa mu zimhuga zizi.)

⁵⁴ Nayo Salema mono yalizenga likaya lya Betelehemu, yali yo sogwe we wanhu wono wekalaga ku Netofati, na ku Atiloti-beti-yowabu, na wono wekalaga ku Zoli, wono wali wo wayagwe ne zimhuga zinyejete za ku Manahati.

⁵⁵ (Ne zimhuga zizi zono zityatizye, zali zo mhuga ze wanghula wo kwandika mandiko, wali wekaye ku cikaya ca Yabezi, Watilati, ne Washimeyati, ne Wasukati. Wawo wo Wakeni, wono wetolanilaga ne Walekabi.)