1 Zinghomo 18 - Luganuzi Luswanu Kuli Wanhu Wose 2002

Wusume wa Dawudi ku wulugu

¹ Hanyuma mutemi Dawudi, yakawahoma kanyhi Wafilisiti yakawasuma. Yakawawusiza lukulu mwi'kaya lya Gati.

² Hanyuma kanyhi, yakawasuma Wamowabi, wakawa wetumami wa Dawudi, wakawa wakumulipa sunga ne kodi.

³ Hanyuma kanyhi Dawudi, yakamuhoma Hadadezeli u mutemi wa Siliya ya Zoba, behi ne yisi ya Hamati. Hambi mwene Hadadezeli nha yasakaga yetujile yisi ya Efulata ya kucanyha.

⁴ Lulo Dawudi yakamuboka Hadadezeli matuka go wulugu gaficile elufu monga, hamonga ne wapanda fwalasi elufu mupunghati, ne wasilikale wajenda ne magulu, nawo elufu makumi mejete. Yakasola fwalasi zificile liwalo lyono lyali likwiliye ku wukwega matuka go wulugu, yigana limonga. Ne zifwalasi zose zono zasigala, yakazidumulanga matimba gazo.

⁵ Nawo Washami wanya Siliya ya ku Damesiki, wakategula wasilikale wakamutazilize mutemi Hadadezeli, ninga Dawudi yakawahoma Washami, yakawawulaga wanhu waficile elufu makumi mejete na nyejete.

⁶ Hanyuma yakawa kusita ne zinghambi ze wasilikale wakwe mu yisi yawo. Washami wakawa wetumami wakwe, wakumulipa sunga ne kodi. Nayo Muwaha Mulungu, yakamupela Dawudi wusume wuwaha muno hanhu hose.

⁷ Dawudi yakaziteka zingula zose ze zahabu zono zali zidinghuywe ne wetumami wa Hadadezeli, yakazitegula zose ku Yelusalemi.

⁸ Yakasoleleza hamonga ne shaba nyinji muno, yono yali yili ku Tibuhati na Kuni, i makaya ga Hadadezeli. (Na hanyuma yayo, Solomona yakayitumamila shaba yiyo mu wuzenjela litanji lye malenga, hamonga ne masumbili, ne viya vya mu Nyumba yo Mulungu.)

⁹ Nayo Towi u mutemi wa Hamati, yakahulika nha vyono mutemi Dawudi yagasumiza mapuga gose ge wasilikale wa Hadadezeli.

¹⁰ Hodu yakawa kumutuma Yolamu u mwanagwe yabite yakamulamuse mutemi Dawudi, no kumuhonjeza so wusume wakwe wono yakondya kumusuma Hadadezeli, mono vyekalaga vikwihoma na Towi kenji na kenji. Nayo Yolamu yakawa kumutegulila mutemi Dawudi vipegwa vye zahabu, ne fweza, hamonga ne shaba.

¹¹ Nayo mutemi Dawudi yakavisiwanula, ho viwe kwitumamilwa mu wuhembi, hamonga ne zifweza, ne zizahabu zono yali yakondya kuzisola ku wulawa mu makungugo gono yagasuma, ge Waedomu, Wamowabi, Waamoli, Wafilisiti, hamonga ne Waamaleki.

¹² Nayo Abishayi munghalo nyina mono yacemwaga Zeluya, yakawasuma Waedomu mwi'lolo lyo Mwino, yakawawulaga wanhu waficile elufu yikumi na munana liwalo lyawo.

¹³ Nayo yakasita nghambi nyinji ze wasilikale mu yisi yose ye Waedomu. Ne wanhu wayo, wakawa wetumami wo mutemi Dawudi. Nayo Muwaha Mulungu yakamupela Dawudi wusume wuwaha hanhu hose.

¹⁴ Mutemi Dawudi yakatema mu Isilayeli yose, yakayinoza mikalile ye wanhu wakwe, yiwe yili mu ling'ani ne mbeka nhondo zose.

¹⁵ Nayo Yowabu u nduguye wa Abishayi, yali yo muwaha we wasilikale. Ayu nayo Yehoshafati u mwana wa Ahiludi, yali yo mulanjilizi we liwalo lye vilo.

¹⁶ Zadoki u mwana wa Ahitubu, na Ahimeleki u mwana wa Abiyatali, wali wo wakohani. Ayu Selaya yali yo mwandici.

¹⁷ Benaya u mwana we cilume wa Yehoyada, yali yo mulanjilizi we cipuga ce wasilikale wono wamudimaga mutemi Dawudi, i wanagwe Dawudi, nawo wakawa wo wakohani.