1 Zinghomo 14 - Luganuzi Luswanu Kuli Wanhu Wose 2002

I milimo ya Dawudi, yono yetuma mu Yelusalemi

¹ Nayo Hilamu u mutemi wa Tulo, yakatuma wanhu kuli Dawudi, yakamutegulila ne mabici go muhagata, hamonga ne wazenji wanghula wo wuzenjela mabwe, ne waselemala, ho wamuzenjele Dawudi kaya ye likulu.

² Na ku soko yiyo, nhondo Dawudi ho yakamanya nha vyono Muwaha Mulungu, yakondya kumusikamya, ho yateme muli Waisilayeli, kanyhi na vyono wutemi wakwe wokumywa so wanhu wakwe Waisilayeli.

³ Na mumo mu Yelusalemi, Dawudi yakatola wacekulu wenji, na ku soko yiyo, yakatuga wana we cilume wenji, hamonga ne wana we cicekulu.

⁴ Ne wana awa, wo walelelwa ku Yelusalemi: Shama, Shobabu, Natani, Solomona,

⁵ Ibuhali, Elishuwa, Elipeleti,

⁶ Noga, Nefeji, Yafiya,

⁷ Elishama, Beliyada na Elifeleti.

Wafilisiti wakusumwa

⁸ Nawo Wafilisiti, wali weza kuhulika nha vyono, Dawudi yo yeza mutemi muli yisi yose ye Waisilayeli, hobaho lipuga lyawo lye wasilikale likawa kwikonghola, likawa kubita kumulondola Dawudi. Nayo Dawudi yali yeza kuzihulika zizo, nayo yakatuluka yabite viketang'anile nawo.

⁹ Wafilisiti wakafika mwi'lolo lya Lefayimu, wakawa kwanza kuliteka.

¹⁰ Ninga Dawudi yakamuwuza Mulungu yakatya, “Wule 'gwe go Muwaha Mulungu, niwahomaje Wafilisiti wawa, hamba ng'o? Wule, komhela vilungo vyo kuwasumila?” Nayo Muwaha Mulungu yakamupitula yakamutya, “Heya wubite wukawahome, nane nokupela vilungo vyo kuwasumila wene!”

¹¹ Hodu, hobaho Dawudi yakawahomela ku Baali Pelazimu, yakawasuma. Hanyuma yakatya, “Muwaha Mulungu kamhela wusume wo kwinjila mu walugu wangu nhe lihwazi lye malenga.” Ne hanhu baho hakacemwa Baali Pelazimu.

¹² Nawo Wafilisiti lono watizaga, wakavileka vihwani vye milungu yawo, nayo Dawudi yakalajiliza wavikongoje no moto vyose.

¹³ Ninga hanyuma hadodo, i Wafilisiti wakabita kanyhi kwilolo wakanza kuliteka.

¹⁴ Ninga nayo Dawudi yakamuwuza kanyhi Mulungu. Nayo Mulungu yakamupitula yakamutya, “Ninga wulece kuwahomela ku lubavu luluno, langa wupilime, wiwikanize, ho wuwahome ku wulawilila ku lubavu lulo luyagwe behi ne mibici ye mifolosadi.

¹⁵ Nagwe kolo wukulihulika lizi lilawiliye ku visonje vye mibici, kotya wanhu wakujenda, hobaho wuwahungucilaje Wafilisiti wuwahome, hambi ane nha nowa nghulongoleye kumwande yako, niwasume lipuga lye wasilikale we Wafilisiti.”

¹⁶ Nayo Dawudi yakanoza nha vyono Mulungu yamulajiliza. Na mu nzila yiyo, yakawawinga Wafilisiti, ku wulawa ku Gibeyoni, sunga ko ku Gezeli.

¹⁷ No lukumyo lwa Dawudi lukatandala hanhu hose, nayo Muwaha Mulungu yakaganoza makungugo gose gamogope Dawudi.