1 Zinghomo 13 - Luganuzi Luswanu Kuli Wanhu Wose 2002

Lisanduku lye Cilagane, likuhamywa ku Kiliyati Yeyalimu

¹ Mutemi Dawudi, yamula kuduwana ne wetumami wakwe i walongola wawaha, we vipuga vye wasilikale elufu monga monga, ne walongola we vipuga vye wasilikale yigana yigana.

² Hanyuma, ho yakawa kuwalonjela wanhu wose wa Isilayeli yakawatya, “Hono yiwe viswanu kuli'nye, na hono wuwe wo wuhile wo Muwaha Mulungu, u Mulungu wetu, ale, citume wanhu, wabite mu matumbi gose, kuli wandugu zetu wono wekaye mu yisi yose ya Isilayeli, wono muli wene, mo wali ne Wakohani, ne Walawi, wawalonjele wekongholele kono kwetu.

³ Hanyuma ho cibite cikalisole Lisanduku lye Cilagane, lyono si walicelelela yaye lono Sawuli yali yakali yatemile.”

⁴ Nawo wanhu wose wakendezwa muno ne lihweso lilyo, wakalivumila.

⁵ Hobaho, Dawudi yakawakonghola hamonga wanhu wose wa Isilayeli ku wulawa mu yisi yose. Ku wulawa mu mipaka ye yisi ya Misili kutakama, sunga ko ku Hamati Pasi, lubavu lwe sumuka, ho yasume kuligomola Lisanduku lye Cilagane ku wulawa Kiliyati Yeyalimu, walitegule ku Yelusalemi.

⁶ Hanyuma, Dawudi, hamonga ne wanhu, wakabita kwi'kaya lya Bala nha cinji ku Kiliyati Yeyalimu, ku yisi ya Yuda, wakalisole Lisanduku lye Cilagane lyo Mulungu, u Mulungu mono yekaye mucanyha ye makelubi.

⁷ Wakalisola lilyo Lisanduku lye Cilagane mu kaya ya Abinadabu, wakalijeleka mucanyha yo mukokoteni mupya. Uza na Ahiyo wo wakapegwa mulimo wo kulibidusa.

⁸ Mwene Dawudi hamonga ne wanhu wose, wakawa wakuvina kwe vilungo vyawo vyose, wakumulumba Mulungu. Wakawa wakwimba akuno wakuvina, wakutowa ne zifilimbi, ne zindonondo, ne zing'oma, ne zimbilili, ne zindulele.

⁹ Nawo wali weza kufika ha cuga ca Gidiyoni, zing'ombe zikekobala, nayo Uza yakagolola muwoko wakwe, yakalibata Lisanduku lye Cilagane ho lilece kugwa.

¹⁰ Hobaho baho Muwaha Mulungu yakamukolelwa likuwo Uza, yakamuwulaga, vyono Uza yalipamiza Lisanduku lye Cilagane. Yakafwila baho du hali Mulungu.

¹¹ Na ku soko yiyo, ku wulawilila lulo, i hanhu baho hakacemwa Pelezi-uza, sunga nalu. Nayo Dawudi yakakolwa muno likuwo vyono Muwaha Mulungu, kamulipiciziza Uza mwi'kuwo.

¹² Na ku wulawa baho, Dawudi yakamogopa Mulungu, yakatya, “Alu ho nolitegula wule Lisanduku lye Cilagane kwangu?”

¹³ Na ku soko yiyo, Dawudi si yasaka kanyhi yalitegule Lisanduku ku Yelusalemi, langa yakalileka mu kaya ya munhu litagwa Obedi Edomu, munyawusi we likaya lya Gati.

¹⁴ Nalyo Lisanduku, likekala baho myezi midatu. Nayo Muwaha Mulungu, yakamulugutiza Obedi, mhuga ya Edomu, hamonga na vyose vyono yali yena navyo.