1 Zinghomo 12 - Luganuzi Luswanu Kuli Wanhu Wose 2002

Iwatyatyi walongozi wa Dawudi, wo mulango wa Benyamini

¹ Ale, mu madaha gago Dawudi yali yehundice ku Zikilagi, yamutizaga mutemi Sawuli. Ne wasilikale wenji we vilungo, kanyhi wono wali vitung'ati mu wulugu,

² i wanhu wo mulango wa Benyamini, wono wali wali ku lubavu lwa Sawuli, wono wali wezoweleze muno kuguma songa no kugumila nhago, kwe miwoko yawo yose, muwoko wo kulume hamba wo kucekulu wakamutyatya kuko.

³ Nawo wakawa hasi yo wulanjilizi wa Ahiyezeli na Yowashi, i wana wa Shemaya munya Gibeya. Ne wasilikale wawo, wali wo awa: Yeziyeli na Peleti i wana wa Azimaveti, Belaka na Yehu wanya Anatoti.

⁴ Ishimaya munya Gibeyoni, u musilikale citung'ati, muli awalya we makumi madatu kanyhi yali yo mulongola wawo, hamonga na Yelemiya na Yahaziyeli na Yohanani, na Yozabadi wanya Gedela.

⁵ Eluzayi, na Yelimoti, na Beyaliya, Shemaliya na Shefatiya, wanya Halifu.

⁶ Elikana na Ishiya, na Azaleli, na Yoyezeli, na Yoshobeyamu we mhuga ya Kola.

⁷ Yoyela na Zebadiya, i wana wa Yelohamu munya Gedoli.

I watyatyi wa Dawudi wo mulango wa Gadi

⁸ Aga hano, go matagwa ge vitung'ati. I wasilikale wo mulango wa Gadi wono wali wazoweye muno mulimo wo wusilikale, wono wakabita kwihanza ne mapuga ge wasilikale wa Dawudi, lono yali yali mu nyika. Nawo wawa, wakawa wanghula muno mu wicita ne zingula, hamonga no wuguma migoha, wena meso ga kogofya genha ga simba, kanyhi wapelupelu ku lumangho, wehwanile nzimba za mu matunda.

⁹ Nawo wali wawicigwe mu wityatye wo wulongola wawo: Yezeli yali yo muwaha mulongola mono yamulecela Obadiya, Obadiya yakamulecela Eliyabi.

¹⁰ Nayo Eliyabi yakamulecela Mishimana, nayo Mishimana yakamulecela Yelemiya, nayo Yelemiya yakamulecela Atayi.

¹¹ Nayo Atayi yakamulecela Eliyeli.

¹² Nayo Eliyeli yakamulecela Yohana, nayo Yohana yakamulecela Elizabadi.

¹³ Nayo Elizabadi yakamulecela Yelemiya, nayo Yelemiya yakamulecela Mekebanayi.

¹⁴ Na wanji wa muli wanhu wawa wo mulango wa Gadi, wali wo walongola wawaha we wanhu elufu monga monga, na wanji wa wanhu yigana limonga limonga.

¹⁵ Na mu mwezi mulongozi wa mu mwaka, mu mapango gono likolongo lya Yoludani lyamemaga malenga gayo ko ku nhumbi wene walowokaga likolongo, wawa kuweyagaza wanhu wono wekalaga mu malolo, mu mbavu zose, kucilima na kumwezi ye likolongo.

I watyatyi we milango ya Benyamini na Yuda

¹⁶ Mwizuwa linji, lipuga lye wanhu we milango ya Benyamini na Yuda, wakabita kwi'gomawakali, kono yekalaga Dawudi.

¹⁷ Nayo Dawudi yakawahinjiliza, ninga yakawatya, “Anye! Hono muwe mukuza no mulamu, ho munhazilize, ale muze! Ninga hono muwe mukuza ho mungaluce kuli walugu wangu, hamba yiwe ane sina wuhile wo kumutamisenyi 'nye, ninga u Mulungu we walezi wetu, yo kozimanya zizo, kanyhi komulipicizenyi.”

¹⁸ U muhe wo Mulungu yakamuziza Abishayi vyono nayo yo mulongola we wanhu wawo “Makumi madatu.” Yakalonga yazozize, yakatya, “Gwe Dawudi go mwana wa Yese, ase cili wako! Mulamu weze kuli'gwe, na kuli wose wono wakukutaziliza! U Mulungu yali ku lubavu lwako.” Hodu, nayo Dawudi nhondo ho yakawa kuwabocela, yakawa kuwawika wawe wawaha we lipuga lyakwe lye wasilikale.

I watyatyi wo mulango wa Manase

¹⁹ Wasilikale wanji wo mulango wa Manase, nawo wakelunza na Dawudi, lono yabitaga hamonga ne Wafilisiti kwihoma na Sawuli. Ninga i mbeka, yali yasina wuhile wo kuwataziliza i Wafilisiti, hambi nha yogopa vyono lunji i watemi, wawo wokwihwesa nha vyono mwene Dawudi, yakuhila yawagwizize kwa Sawuli u muwaha wakwe we katali. Holeka wakamugomola Dawudi ku Zikilagi.

²⁰ Nawo awa wo wasilikale wo mulango wa Manase, wono wamubitila Dawudi no kwilunza nayo, lono yali yakondya kuwuya ku Zikilagi. Adina, Yozabadi, Yediyayeli, Mikayeli, Yozabadi, Elihu, hamonga na Ziletayi. Na mumo mu Wamanase, wali wakondya kwiwikaniza vipuga vipuga, vya wanhu elufu monga monga.

²¹ Nawo wakamwitumamila Dawudi mu vipuga vyakwe vye wasilikale, hambi wose nha wali wasilikale vitung'ati. Na hanyuma yayo, wakawa wetumami mwi'puga lye wasilikale we Waisilayeli.

²² Hambi nha wazaga izuwa ne zuwa, wanhu wono wamutazaga Dawudi, sunga ne wasilikale wakwe wakenjipa muno muno.

I liwalo lye wasilikale wa Dawudi

²³ Nayo Dawudi lono yali yali ku Hebuloni, wasilikale wenji wakaza kwilunza ne mapuga gakwe ge wasilikale, ho wamutazilize, wamunoze yawe mutemi, yahalile ho mutemi Sawuli, nha vyono Muwaha Mulungu yehuwiza. Ne liwalo lye wasilikale wawa lyali nhavi:

²⁴ Wa muli wana wa Yuda, wono wali wena ngula ne migoha, wali waficile wanhu elufu mutandatu na magana munana.

²⁵ We wana wa Simiyoni, wali wali elufu mupunghati ne 'gana limonga.

²⁶ We wana wa Lawi, elufu yine na magana mutandatu.

²⁷ Nawo i watyatyi wa Yehoyada u mwana wa Haluni, wali waficile wanhu elufu yidatu, na magana mupunghati.

²⁸ Nawo we ndugu ya Zadoki, mono yali muzelelo we vilungo, wali waficile wanhu makumi mejete na wejete.

²⁹ Nawo i wana wa Benyamini u nduguye wa Sawuli, wali waficile wanhu elufu yidatu. (Ninga hamba nhavivyo, wanhu wanji wo mulango wa Benyamini, wasigala ku lubavu lwa Sawuli.)

³⁰ Ne wana wa Efulayimu, wono wali wena lilumbo mu mhuga zawo, wali waficile wanhu elufu makumi mejete na magana munana.

³¹ Ne nusu ya wo mulango wa Manase wa kumwezi, wali waficile wanhu elufu yikumi na munana cititila, wono wahagulwa wabite wakamutemye Dawudi yawe mutemi.

³² Na muli wana wa Isakali, i wanhu wono wali wena mahala go wumanya madaha, na zono zowanojela Waisilayeli wazitume, nawo wali waficile wanhu magana mejete.

³³ Ne Wazebuloni, wono wali wali cihuliko, na kanyhi wali wena nhumbula yono yisina woga, na kanyhi wewikanize ku milewo, weyijize sunga no kwitumamila mawala gose ge vitwalo, nawo wali waficile wanhu elufu makumi mahano ho wamutaze Dawudi.

³⁴ Na muli wana wa Nafutali, mwali na walongola elufu monga. Nawo iwasilikale wono wali wena zingula ne migoha, wali waficile wanhu elufu makumi madatu na mupunghati.

³⁵ Nawo wana wa Dani, wali waficile wanhu elufu makumi mejete na munana, na magana mutandatu.

³⁶ Nawo wana wa Asheli, wanhu wono wewikanize so wulugu, wali waficile wanhu elufu makumi mane cititila.

³⁷ Nawo wa ku nhumbi ya kucilima ye likolongo lya Yoludani, wali wana wa Lubeni, na wa Gadi, hamonga ne Wamanase wa kucilima, wali waficile wanhu elufu yigana limonga na makumi mejete cititila. Nawo wali wo wanhu wono wali wejizwe muno ku witumamila vitwalo vye mawala gose.

³⁸ Ne wasilikale wawano wono wali wewikanize so wulugu, wose wakabita ku Hebuloni. Na wose wakabita no wuhile wumonga du, ho wamutemye Dawudi yawe mutemi muli Waisilayeli wose. Ne Waisilayeli wono wali wasigaye ku zikaya, wose wali wena wuhile wumonga du, wo kumutemya Dawudi.

³⁹ Nawo wakaswa baho vilo vidatu wali hamonga na Dawudi, wakulya no kung'wa, vyono wanyawusi wa baho wali wakondya kuwawikaniziza.

⁴⁰ Ne wayawo wo kutali ku lubavu lwa kusumuka, we milango Isakali na ya Zabuloni, na ya Nafutali, wanhu wakaza wakaleta ndigwa, no wusaje, ne zinghuyu, na zabibu nghavu, ne divayi, hamonga ne mafuta. Ne vinhu vyose vivino, wavileta wapacize mu zindogowe, na mu zingamiya, na mu zinyumbu, na mu zing'ombe. Waleta hamonga ne zing'ombe ne zingholo, nyinji du, wakaziwulaga wakazilya. Na zizi zose zikanozwa so nyemo yono wali wayituga mu yisi yose.