1 Zinghomo 11 - Luganuzi Luswanu Kuli Wanhu Wose 2002

Dawudi yawa mutemi wa Isilayeli na Yuda

¹ Hobaho Waisilayeli wose wakamwikongholela Dawudi kuko ku Hebuloni, wakamutya, “Lanje ta, ase cili muwili wako ne sakami yako.

² Ikatali, na lono Sawuli yali yakali yacitemile, agwe yo gwegwe mono wawalongoza Waisilayeli ku wulugu. No Muwaha Mulungu, u Mulungu wako, yakwihuwiza nha vyono yo gwegwe mono kowatonga wanhu, kanyhi kowatema.”

³ Hobaho i walongola wose we Waisilayeli, wakamuziza mutemi Dawudi kuko ku Hebuloni. Nayo Dawudi yakanoza cilagane nawo. Nawo wakamwitila mafuta, wakamunoza yawe mutemi we Waisilayeli, zikawa nha vyono Muwaha Mulungu yamwihuwiziza muli Samwili.

⁴ Mutemi Dawudi hamonga ne Waisilayeli wose, wakabita kulihoma likaya lya Yelusalemi. Ninga lulo lyali limanyice mwi'tagwa lya Yebusi. Sunga ne Wayebusi wanyawusi wali wakali wali muno.

⁵ Ninga Wayebusi wakamulonjela Dawudi nha vyono, si kosuma kwinjila mwi'kaya. Ninga Dawudi yakalisola ligomawakali lyawo lya ku Sayuni, nalyo likamanyika nha vyono “Likaya lya Dawudi.”

⁶ Dawudi yakatya, “U munhu wo wose mono kowa mulongozi kuwahoma Wayebusi, yuyo yo kowa muwaha we lipuga lye wasilikale wo wulugu!” Ale, Yowabu munghalo nyina mono yacemwaga Zeluyiya, yo yakawa mulongozi kwinjila mu milewo, nayo yakawa yo muwaha.

⁷ Alu vyono Dawudi yakabita kwikala mwi'gomawakali, holeka likacemwa “Likaya lya Dawudi.”

⁸ Yakalizenga kanyhi likaya mbavu zose. Yakanziza kono kwamemywa muhangha, ku lubavu lwa kucilima ye litunda. Nayo Yowabu yakanozeleza likaya lyono lyasigala.

⁹ Dawudi yakajendelela kuwa yali vilungo muno, hambi u Muwaha Mulungu, nha yali yali hamonga nayo.

I wasilikale we lilumbo wa Dawudi

¹⁰ I wasilikale we lilumbo kanyhi vitung'ati wa Dawudi, hamonga ne Waisilayeli wono wali wasigaye, wose wakamutaza Dawudi ho wamutemye, nha vyono Muwaha Mulungu yehuwiza. Nawo wo wawukangaza no kuwupela vilungo wutemi wakwe.

¹¹ Ne wasilikale we lilumbo kanyhi vitung'ati, wono Dawudi yali yena nawo, wo awa: U mulongozi yali Yashobeyamu we mhuga ye Wahacimoni, u mulongola we “Wadatu.” Yuyu yakawahoma no mugoha wakwe, wanhu waficile magana madatu, yakawawulaga nghanghulo monga mu wulugu.

¹² Nayo mono yakutyatya muli wawo we citung'ati wadatu, yali Eleyezali u mwana wa Dodo, we mhuga ye Waahohi.

¹³ Yuyo nayo yali yali hamonga na Dawudi, lono wawahomaga Wafilisiti ku wulugu wa ku Pasi-damimu, mwi'lolo lyono limemile shayili. Na lono Waisilayeli, watizaga ha mwande ye Wafilisiti,

¹⁴ ninga mwene Dawudi na Eleyezali hamonga ne wanhu wakwe, wakema haciligati ye lilolo lilyo lya shayili, yakawahomanga Wafilisiti. No Muwaha Mulungu yakamupela wusume wuwaha muno.

¹⁵ Na mwi'zuwa linji, i walongola wadatu, wa muli walongola we makumi madatu, wakamubitila Dawudi behi ne mhango ye'bwe ya Adulamu, kono yali yekaye. Na mwi'pango lilyo, liwumbi lye Wafilisiti wali wapanjile nghambi, mwi'lolo lya Lefayimu.

¹⁶ Nayo Dawudi mu madaha gago, yali yali mwi'gomawakali mwi'tunda, i cipuga ce Wafilisiti nawo, wali wakondya kuyisola Betelehemu.

¹⁷ Baho Dawudi yakatuga cisukwa muno, yakatya, “Ciba munhu yali yamhele ning'we malenga ga mu cisima ca ku Betelehemu, cono cili behi no mulango, hambi nha nagakalucila muno!”

¹⁸ Baho wa walya wasilikale wakwe wadatu vitung'ati, wakenyeleleka mwi'wumbi lye Wafilisiti, wakanega malenga wulawa mu cisima cico ca Betelehemu, cono cali cili behi no mulango, wakamuletela Dawudi. Ninga Dawudi si yenda kugang'wa yaye, langa mwene yakagajida gawe cilavywa kuli Muwaha Mulungu.

¹⁹ Yakatya, “Ane hamba si nogang'wela lukulu malenga gaga! Hono nigang'we, nowa nha nghung'wa sakami ye wanhu wawa wono wesuzize wumi wawo. Hambi nha wesuza wumi wawo, holeka wasuma kugaleta!” Na ku soko yiyo, holeka hamba si yenda kugang'wa yaye. Azi zo wetuma wawalya wasilikale vitung'ati wadatu.

²⁰ Nayo Abishayi u nduguye wa Yowabu, yali yo mulongola wa wawo vitung'ati we “Makumi madatu.” Yali yo munhu mono yawahomanga no mugoha wakwe, wanhu waficile magana madatu, yakawawulaga, yaketujila lilumbo lyo kuwa hamonga na wa walya i vitung'ati “Wadatu.”

²¹ Yali yo we lilumbo liwaha muno muli wawo we “Makumi madatu.” Nayo yakawa yo mulongola wawo. Ninga hamba nhavivyo, lilumbo lyakwe si lyali linha na lya awalya citung'ati “Wadatu.”

²² Kanyhi Benaya u mwana wa Yehoyada mulawa Kabuzeli, yuyo nayo yali munhu we vilungo, yetuma metumo mawaha muno. Na mwi'zuwa linji yawawulaga wasilikale vitung'ati wejete we Cimowabu. Kanyhi mwi'zuwa linji yakatenenhuka mwi'kweme, yakayiwulaga simba yono yali yili mumo, mu cipango ce cinyuli.

²³ Kanyhi yamuwulaga Mumisili mono yali munhu mono yena yiwili yiwaha muno, kanyhi mutali, yena wutali wa behi na mita nyejete, mono yali yebate mugoha wono wali wina yidete yiwaha, kotya mucici wa kaya. Ninga mwene Benaya, yakamubitila yakamutowa ne nhumbi, yakawusukula mugoha mu muwoko wo Mumisili, yakamuhoma no mugoha wuwo, yakamuwulaga.

²⁴ Na gago gali go metumo mawaha ge vilungo, gono yetuma Benaya mwana wa Yehoyada, yakawa ne lilumbo muli awalya vitung'ati “Wadatu.”

²⁵ Nayo yakatuga lilumbo yiwaha muli walya we “Makumi madatu.” Ninga hamba nhavivyo, lilumbo lyakwe si lyali linha lya awalya vitung'ati “Wadatu.” Nayo Dawudi yakamuwika Benaya yawe yo mulanjilizi we walindilizi wakwe.

²⁶ Awa nawo wo wasilikale vitung'ati wa Dawudi. Asaheli u nduguye wa Yowabu. Elihanani u mwana wa Dodo munya Betelehemu.

²⁷ Shamoti munya Halodi Helezi munya Peloni

²⁸ Ila u mwana wa Ikeshi munya Tekowa, Abiyezeli munya Anatoti,

²⁹ Sibekayi munya Hushahi,

³⁰ Mahalayi munya Netofa, Heledi u mwana wa Bana munya Netofa,

³¹ Itayi u mwana wa Libayi munya Gibeya ya Benyamini. Benaya munya Pilatoni.

³² Hulayi munya malolo, behi na Gasha, Abiyeli munya Alaba,

³³ Azimaveti munya Mubahulumu, Eliyahiba munya Shaliboni,

³⁴ Hashemu munya Giloni, Yonazani u mwana wa Shama munya Halali.

³⁵ Ahiyamu u mwana wa Sakali munya Halali, Alifali u mwana wa Uli.

³⁶ Hefeli munya Makati, Ahiya munya Peloni.

³⁷ Hezelo munya Kalimeli Nalayi u mwana wa Ezibayi.

³⁸ Yoweli u nduguye wa Natani Mibiha u mwana wa Hajili.

³⁹ Zeleki munya Amoni Nahalayi u mudinghuzi we vitwalo vya Yowabu, munya Beeloti.

⁴⁰ Ila na Galebu wanya Yatili.

⁴¹ Uliya u Muhiti, Zabadi u mwana wa Ahilayi.

⁴² Adina u mwana wa Shiza (u mulongola wa wo mulango wa Lubeni, hamonga ne cipuga cakwe ce wasilikale makumi madatu.)

⁴³ Hanani u mwana wa Maaka Yoshafati munya Mitani.

⁴⁴ Uziya munya Ashitela, Shama na Yeyiyeli i wana wa Hotamu munya Aloweli.

⁴⁵ Yediyayeli na Yoha i wana wa Shimuli munya Tizi.

⁴⁶ Eliyeli munya Mahava. Yelibayi na Yoshaviya i wanae wa Elinamu. Itima munya Mowabu

⁴⁷ Eliyeli na Obedi na Yasiyeli, wanya Zoba.