Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Zinghomo 10 - Luganuzi Luswanu Kuli Wanhu Wose 2002


Wufwe wo mutemi Sawuli
( 1Sa 31:1-13 )

1 I wafilisiti wakawa kwihoma ne Waisilayeli, he 'tunda lya Gibowa. Ne Waisilayeli wenji wakawulagwa, na wono wasigala, wakatiza wose hamonga no mutemi Sawuli ne wanagwe wadatu.

2 Ninga Wafilisiti wakawatyatilila sunga wakawebata, wakawawulaga i wana wa Sawuli wadatu, Yonazani, Abinadabu, na Milikishuwa.

3 Na lulo wulugu wukawa wukali muno muli Sawuli. I wagumi we zisonga, wakamuguma Sawuli, wakamupela nghomele 'mbi muno.

4 Nayo yali yeza kuwona vyono yakondya kutamiswa muno, hobaho yakawa kumucema muzelelo mono yali yadinghuye vitwalo vyakwe, yakamutya, “Wusomole mumaje wako mu njasulu, wumbulaje, walece kuza wawo wanhu i Wafilisiti wono si wamumanyile Mulungu wanyidawalile.” Ninga yu yulya muzelelo yakogopa muno kuyituma nghani yiyi. Hodu Sawuli yakawusomola mumaje wakwe mu njasulu, yakawugwila, yakehomeleza mweneco.

5 Nayo muzelelo yuyo yali yeza kuwona vyono Sawuli yakondya kufwa, hobaho nayo yakawa kwigumila, yakawugwila mumaje wakwe yakawa nayo kwiwulaga.

6 Hodu, Sawuli hamonga ne wanagwe wadatu, wakawa wose wakondya kufwa. Na hakawa hasina kanyhi hamba monga wa muli wanagwe, mono yatema.

7 Nawo Waisilayeli wono wekalaga mwilolo lya Yezeleli, wali weza kuhulika nha vyono, Wasilikale wawo watiza hali Wafilisiti, na vyono Sawuli hamonga ne wanagwe wose wakondya kufwa, hobaho nawo, wakawa kugaleka makaya gawo wakatiza. Nawo Wafilisiti wakaza wakagasola.

8 Na mwi'zuwa lye kejete, Wafilisiti wakabita wakapumhe vinhu vya wono wafwiye, na kuko wakawuwona muwili wa Sawuli hamonga ne miwili ye wanagwe, yigwiye hasi he'tunda lya Gibowa.

9 Hobaho wakawudumula mutwe wa Sawuli, wakavisola ne vitwalo vyakwe. Wakatuma wanhu wavidinghule wavipilimye mu yisi yose ye Wafilisiti, no kuwalonjela wanhu wawo, hamonga ne milungu yawo, ze nghani yiyo swanu.

10 Wakavitumbika vitwalo vyakwe mu nyumba monga ya mu zinyumba zo wuhembelo we milungu yawo. No mutwe wakwe nawo, wakawutumbika mu nyumba yo wuhembelo yo mulungu wawo Dagoni.

11 Nawo wanhu wa ku Yabeshi ya Gileyadi, wali weza kuzihulika zono Wafilisiti wetumile kuli Sawuli,

12 hobaho i wanhu we vilungo, wakabita wakawusola muwili wa Sawuli hamonga ne miwili ye wanagwe wadatu, wakayitegula ku Yabeshi. Wakayizika kuko hasi yo mubici wo munghola. Wakaleka kulya vilo mupunghati.

13 Nayo Sawuli yafwa, vyono si yali mwihuwilwa kuli Muwaha Mulungu. Si yasaka kumuhulika Muwaha Mulungu, hamba kugebata malajilizo gakwe. Langa mwene yali yendile kwilaguliza kuli wono wena macisi, no kusaka wutonji kuli myuhe ye wanhu wono wafwa,

14 hamba si yendaga kuwuza kuli Muwaha Mulungu yaye. Na ku soko yiyo, Muwaha Mulungu yakamuwulaga, yakawa kumupela wutemi Dawudi, mwana wa Yese.

Cigogo Bible © Bible Society of Tanzania, 2002.

Bible Society of Tanzania
ကြှနျုပျတို့နောကျလိုကျပါ:



ကြော်ငြာတွေ