1 Samwili 9 - Luganuzi Luswanu Kuli Wanhu Wose 2002

Sawuli wakwitang'anila na Samwili

¹ Kwali na munhu citung'ati kanyhi we vilungo, litagwa lyakwe Kishi, mulawa mulango wa Benyamini. Munhu yuyu, yali mwana wa Abiyeli, kanyhi yali mwizukulu wa Zeloli, Zeloli yali mwana wa Bekolati, Bekolati yali mwana wa Afiya.

² Munhu yuyo Kishi, yali yena mwana wa cilume, litagwa lyakwe Sawuli, nayo Sawuli yali muzelelo muswanu muno mu mikalile yakwe kanyhi yali mutali ku wulawa mu mawega gakwe. Hakawa hasina hamba munhu yunji mu wa Isilayeli mono yali muswanu kuciza mwene.

³ Alu, zindogowe zinji za Kishi zikawa zajilila. Holeka yakamulonjela Sawuli yakatya, “Ale wumusolaje mwitumami monga, mubite nayo mukazilondole zindogowe.”

⁴ Nawo wakawa kutuluka, wakakola mu yisi ye matunda ya Efulayimu, na mu yisi ya Shalishali, ninga hamba si waziwona yaye. Hanyuma wakajendelela wakakola mu yisi ya Shayalimu, ninga zindogowe si zali zili kuko yaye. Hanyuma wakakola mu yisi ya Benyamini, ninga hamba si waziwona yaye.

⁵ Nawo wali weza kufika mu yisi ya Zufu, Sawuli yakamulonjela mwitumami wakwe yakatya, “Gwe, muyangu, alu ciwuye ku kaya, hambi baba nha koleka kwihwesa ze zindogowe, yawe kutuga mahwele ku soko yetu.”

⁶ Nayo mwitumami yakamupitula yakatya, “Alu, ta wime hadodo! Hambi mwi'kaya lilino, nha moyuli munhu wo Mulungu, kanyhi munhu we lilumbo muno muno, kalongaga ziwezaga za mbeka. Holeka, ale cimubitile, na lunji kosuma kucilonjela i hanhu hono cosuma kuziwona zindogowe zetu.”

⁷ Nayo Sawuli yakamuwuza yakatya, “Alu mwene, kolo camubitila, comupela cicici lo? Hambi nha cisina hamba ndigwa yo yose hamba cinhu cinji co cose cono cisigaze mu mifuko yetu. Holeka lu ho comupela cici?”

⁸ Mwitumami wakwe yakamupitula yakatya, “Ane mu mufuko wangu, nina cipande cidodo ca fweza, holeka nomupela cico, nayo yacilajile hanhu hono coziwona zindogowe zetu.”

⁹ (Sawuli nayo yakamupitula yakatya, “Ayo nghani swanu! Ale, cibite.” Hodu wakawa kwinjila mu cikaya cono yuyo munhu wo Mulungu yekalaga.)

¹⁰ Na lono wabitaga mucanyha ye citunda, mumo mu nzila waketang'anila na wahinza wanji wono wabitaga kunega malenga, nawo wakawawuza wawo wahinza wakatya, “Wulenyi, mono cikaya cici mo yuli muwoni?”

¹¹ Hambi mu mapango gago i wawizi nha wacemwaga Wawoni, holeka mu mapango gogose gono munhu yasakaga kuwuza nghani kuli Mulungu, yatezaga, “Alenyi, cibite ko Muwoni.”

¹² Nawo wahinza wakawapitula wakatya, “Heya mo yuli. Nayo kamutongolelenyi hadodo du, kuza. Na hono mujende mwiyohile, momwagana.

¹³ Na lono mukwinjila du mu cikaya, ale momuwona. Hambi nayo nha kaza baha du izuwali. Ne wanhu wolavya likumbiko mu cikumbicilo mwi'tunda. Ne wanhu wono walalikwe, hamba si wosuma kwanza kulya, sunga mwene yaze. Hambi nha yimunojeye yamule yalilugutize likumbiko. Na hono mwiyohe, momwagana yakali hamba si nabita kuko kwi'tunda ku wulya zindigwa.”

¹⁴ Hodu Sawuli hamonga no mwitumami wakwe, wakawa kutuluka, wakawa kubita kuko ku cikaya. Na lono wenjilaga du mu cikaya, wakamuwona nayo Samwili yakuza, vikwitang'anila nayo, yakubita i hanhu ho wuhembelo.

¹⁵ Na mwi'zuwa lye 'golo yayo, Muwaha Mulungu yali yamulonjela Samwili vyono,

¹⁶ “I mitondo, mu mapango gono genha gaga, ane nokuletela munhu yakulawa mu mulango wa Benyamini, holeka nhondo mwitile mafuta munhu yuyo, yawe mutemi muli wanhu wangu Waisilayeli. Mwene yo kowaponya mu miwoko ye Wafilisiti. Hambi nha nakondya kuwuwona wugaye we wanhu wangu. Kanyhi nakondya kucihulika ne cililo cawo, vyono wakusaka wutazi.”

¹⁷ Nayo Samwili yali yeza kumuwona Sawuli, Muwaha Mulungu yakamulonjela yakatya, “Ale, Samwili, ayu yo munhu mono nakulonjela. Mono yo kowatema wanhu wangu.”

¹⁸ Nayo Sawuli yakawa kumubitila Samwili, lono Samwili yali yeza yali behi ne lilango. Sawuli yakamuwuza Samwili yakatya, “Gwe muyangu, ndajilaje ta kono yekaye Muwoni.”

¹⁹ Nayo Samwili yakamupitula yakatya, “Ane yo nene Muwoni. Ale lu wolongolele ku mwande yangu, cibitane sunga hanhu ho wuhembelo. Nanye wose vyono muli wejete colizana zindigwa zuwali. I mitondo langa, ho nosuma kumupitulenyi mawuzo genyu gose. Hanyuma ho niwe kumukombolenyi muwuye kwenyu.

²⁰ Kanyhi mulece kuwa na mahwele so zindogowe zenyu, zono zajilila ku wulawa vilo vidatu vyono vipulute. Hambi nha zikondya kwijela. Hambi lu nani kanyhi mono wanhu wose wa Isilayeli wamwilowaga, hono si gwegwe du, hamonga ne mhuga yo sogo.”

²¹ Nayo Sawuli yakamupitula yakamutya, “Ane wayiko, nili wo mulango wa Benyamini, i mhuga yono ndodo du muno muno, muli nghungugo yose ye Waisilayeli, sunga ne mhuga yangu yo mhuga ndodo muno muno muli zimhuga zose za Benyamini. Alu nhawule 'gwe wukunonjela zinghani zono zinha zizi?”

²² Ninga mwene Samwili yakawa kumusola Sawuli hamonga no mwitumami wakwe, yakawa kuwenjiza he kumbo, yakawa kuwekaza hanhu he'lumbo, hono wali wekaye wajenzi makumi madatu.

²³ Ale, baho Samwili yakawa kumulonjela muteleci we zindigwa, yakumutya, “Ale, wulete yi yilya mhonje ye nyama yono nghupelile yono nghuteye wuyiwice ha mhelo.”

²⁴ Muteleci yakawa kuyileta nyama ye cima, yakawa kuyiwika hamwande ya Sawuli. Nayo Samwili yakamutya Sawuli. “Ale, wulonje! Ayi yo mhonje ye nyama yono yali mbikwe so gwegwe. Alu wutenje wulye. Hambi nha nali nghuwiciye gwegwe, ho wuze wuyilye mu cipango cici, hamonga ne wanhu wa wano wono niwalalice.” Ale du, nayo Sawuli yakawa kuyilya nyama yiyo mwi'zuwa lilyo, wakahanga wose na Samwili.

²⁵ Na lono watenenhukaga wakulawa ha wuhembelo, lono wakubita ku cikaya, wakamutandicila Sawuli citanda mwi'tembe mucanyha. Nayo Sawuli yakagona baho.

Samwili, yakumwitila Sawuli mafuta, yawe mutemi

²⁶ Wali weza kwela, hakali mitondo muno muno, Samwili yakawa kumubitila Sawuli kuko kwi'tembe, yakawa kumulonjela yakutya, “Alu wela, winukaje nghusindicize.” Ale du, Sawuli yakawa kwinuka, nayo Samwili yakawa kumusindiciza.

²⁷ Ninga wali weza kufika ku mhelo ye kaya, baho Samwili yakamulonjela Sawuli yakatya, “Ale mulonjele mwitumami wako yabite yalongole.” Ale u mwitumami yakawa kulongola, nayo Samwili yakajendelela kutya, “Sawuli, wime ta hadodo, nghuhila nghulonjele zono Mulungu yateye.”