1 Samwili 8 - Luganuzi Luswanu Kuli Wanhu Wose 2002

I wanhu wakusaka watuje Mutemi

¹ Nayo Samwili yali yeza kukombipa, yakawanoza wanagwe we cilume wawe walamuzi muli wa Waisilayeli.

² U mwana mulongozi kulelwa yacemwaga Yoweli, no mwanakwawe yacemwaga Abiya. Nawo wakawa walamuzi ku Belisheba.

³ Ninga hamba siwatyatya zinzila zo sogo yawo yaye. Langa wene wakatyatya zinzila zawo weneco du zo wulondola mapesa. Na mu wuwe wuwo, wakawa wakubocela mafupo, holeka hamba si wasuma kulamula vyalo vye wanhu mu nzila ye ling'ani.

⁴ Hanyuma i walongola wose we Waisilayeli, wakekongholela hamonga, wakamubitila Samwili kuko ku Lama,

⁵ kamulonjela wakutya, “Alu, Samwili wakombipa, nawo wanago Yoweli na Abiya, hamba si wakuzityatya zinzila zako. Holeka cikukulomba wucisacile mutemi, ho ciwe cina mutemi mono kowa kucilamula, nha vyono genha makungugu ganji gose.”

⁶ Ninga Samwili hamba si yendezwa yaye no wuhile wawo wo kuwa no mutemi. Holeka yakamulomba Muwaha Mulungu,

⁷ nayo Muwaha Mulungu yakamupitula yakatya, “Agwe wuwahulicizaje du wanhu muli zose zono wokulonjela. Hambi nha si wakulemile agwe. Langa wakunema nene mono yo nili mutemi wawo.

⁸ Hambi nha ku wulawilila lono nawawusiza mu yisi ya Misili, nha wandeka, wakawa kuhemba milungu yinji. Sunga nalu wakukutendela nha vyono wanhendelaga nene nhondo zose.

⁹ Holeka agwe wuwahulicizaje du muli zose. Ninga hamba nhavivyo, wuwakagaje hawaha muno muno, kanyhi walolosezaje sunga na zono yuyo mutemi wawo kowatendela.”

¹⁰ Nayo Samwili yakawa kuwalonjela za muli zono wamulombaga, za muli mutemi, na za muli zose zono Muwaha Mulungu yamulonjeye.

¹¹ Samwili yakawaloloseza za muli mutemi wawo vyono kowekaza, yakatya, “Yuyo mutemi wenyu, kowasola wana wenyu we cilume, yawanoze wasilikale. Wanji muli wene, wokwituma mu matuka gakwe go wulugu, wanji mu wusilikale we wapanda fwalasi, na wanji, wowa kumangha walongoleye ku mwande ye matuka gakwe go wulugu.

¹² Na wanji kowawika wawe walongola, walanjilizi wa wasilikale elufu, monga monga, na wanji wawe walanjilizi wa wasilikale makumi mahano mahano. Kanyhi wanago we cilume wokwitumywa milimo yo kulima migunda yo mutemi, no kududula, hamonga no kunozeleza vitwalo vyakwe, hamonga ne vitumamilwa vye matuka gakwe go wulugu.

¹³ I wana wenyu we cicekulu nawo, kowasola yawanoze wawe wanoza mafuta gakwe ge mhunjile swanu, kanyhi wawe wo wateleci wakwe ne wanyanya mikate wakwe.

¹⁴ Yuyo mutemi wenyu, koyisola ne migunda yenyu miswanu, ne migunda yenyu ye mizabibu, hamonga na ye mizeyituni, yawagawile wetumami wakwe.

¹⁵ Kanyhi, kosola monga kwe kumi yo wuhemba wenyu, na ye zabibu zenyu, yawapele vitung'ati wakwe ne wetumami wakwe.

¹⁶ Kowasola sunga ne wetumami wenyu, ne zing'ombe zenyu zono zijinile, ne zindogowe zenyu, yazitumamile mweneco mu milimo yakwe.

¹⁷ Kanyhi, kosola monga kwe kumi ya mu matewa genyu ge zimitugo, sunga na nyenye nyo weneco mowa wawanda wakwe.

¹⁸ Ne lipango lilyo kolo likuza, nanye mololila ko wusungu muno, ku soko ya yuyo mutemi wenyu mono nyenye nyo weneco mumuhaguye. Ninga Muwaha Mulungu si kolomuhulicizenyi yaye mumo mu cililo cenyu.”

¹⁹ Ninga hamba nhavivyo, i wanhu hamba si wamuhulika Samwili yaye, langa wakatya, “Ng'o 'gwe! Ase cikusaka langa du cituje mutemi,

²⁰ ho ciwe cinha nha vyono wenha makungugo ganji, ciwe cina nase mutemi wetu du, mono kocitema, kanyhi mono kocilongoza na mu wulugu, sunga na mu milewo yetu.”

²¹ Hodu nayo Samwili yakawahulika muli zose zono wazisakaga, yakawa kubita kumulonjela Muwaha Mulungu.

²² Nayo Muwaha Mulungu yakapitula yakatya, “Ale, witume nha vyono weneco wakuhila, wapelaje mutemi.” Hodu Samwili yakawa kuwalonjela wawuye ku zikaya munhu na kwakwe.