1 Samwili 6 - Luganuzi Luswanu Kuli Wanhu Wose 2002

Wugomolwe we Lisanduku lye Cilagane lyo Muwaha Mulungu

¹ Nalyo Lisanduku lye Cilagane lyo Muwaha Mulungu, lyali lyeza lyekala mu yisi ye Wafilisiti myezi mupunghati.

² I Wafilisiti wakawacema i wakohani ne waganga, wakawawuza wakutya, “Alu 'nye, cilitendele wule Lisandukulu lye Cilagane lyo Muwaha Mulungu? Na hono cende, ciligomole kono lyalawilila, coligomole hamonga ne cinhuci?”

³ Nawo wakawapitula wakawatya, “Hono muwe mukusaka kuligomola Lisanduku lye Cilagane lyo Muwaha Mulungu we wa Isilayeli, munojeye muligomoleze hamonga ne cipegwa kuli Muwaha Mulungu, so wubi wenyu. Holeka mulanjilile, mulece kuligomola Lisanduku lye Cilagane lyo Muwaha Mulungu lisina hamba cipegwa cocose. Vyono mu nzila yiyi mo moponela, kanyhi ho momanya soko yono yilecile yakumulipicizenyi.”

⁴ Nawo Wafilisiti wakawuza wakatya, “Alu cilavywaci ce lisutya cono comugomolela.” Nawo wakohani we waganga wakawapitula wakatya, “Mutegule mapu mahano ga zahabu, na ngule yihano za zahabu, vyono linha liwalo lye walongola wahano we Wafilisiti. Hambi nhe lipicizo limonga lyono mulipicizwe nyenye wose, hamonga ne walongola wenyu wahano.

⁵ Ale, munoze vihwani vye mapu genyu, ne vihwani vye magule genyu, vyono vihodangaga yisi yenyu. Kanyhi mumupele Muwaha Mulungu we Waisilayeli cogopo. Holeka lunji nayo koleka kumulipicizenyi nyenye, ne milungu yenyu hamonga ne yisi yenyu.

⁶ Alu nhawule mweza musina cihuliko, nha vyono yali yenha u mutemi Falawo wa Misili ne Wamisili, wono wali wasina cihuliko? Mukumbucile vyono Mulungu yawanoza, sunga nhondo, wakawa kuwakombola Waisilayeli wawuce mu Misili.

⁷ Holeka aluno, munoze mukokoteni wo kulikwega, muwikanize na ng'ombe nyejete zono zikali si zinetuma mulimo, muziwopeleze ng'ombe zizo mu mukokoteni wuwo. Ninga zinyehe zazo, muzigomoleze mwi'bululu.

⁸ Hanyuma mulisole Lisanduku lye Cilagane lyo Muwaha Mulungu, mulijelece mucanyha yo mukokoteni wuwo, hanyuma yayo, musole vivilya vihwani vye zahabu vyono mukumutegulila nha cilavywa so wubi wenyu, muvitajile mu cisanduku ca ha mhelo yalyo. Hanyuma ho mulilajile nzila, u mukokoteni wubite wuli wene.

⁹ Ninga nanye mweze mulilanjiliye hono liwe likukolela mu wulunji wo kubita ku yisi yalyo ku cikaya ca Bete-shemeshi, baho ho comanya vyono mbeka u Mulungu wa Isilayeli, yo yacileteye wongomezwe wuwu. Na hono yilece kuwa nhavivyo, naho comanya vyono kumbe Mulungu si yacitendeye zizo, langa ziyiziza zeneco du.”

¹⁰ Nawo Wafilisiti, wakazinoza zose nha vyono walonjelwa. Wakazisola ng'ombe nyejete, wakaziwopeleza mu mukokoteni, zinyehe zazo wakazidindila mwi'bululu.

¹¹ Wakalisola Lisanduku lye Cilagane, wakalijeleka mucanyha yo mukokoteni, hamonga ne cisanduku cono wali watajiye mugati vihwani vye zahabu vye magule ne mapu.

¹² Nazo zing'ombe zikawa kutuluka, zikawa kukola mu nzila yono yibitile ku Bete-shemeshi, zikawa kujendelela zisonjile ku cikaya cico, hamba si zayumbila kumhelo ye nzila yaye, langa zikawa zityatyizye nzila zigolocile akuno zikulila. Nawo i watemi wahano we Wafilisiti wali wali mu nyuma yazo wakuzityatya, sunga wakazifisa ha mupaka wa Bete-shemeshi.

¹³ Nawo wanhu wa Bete-shemeshi mu mapango gago, wali wali mu ndudula yo wuhemba mwi'lolo. Nawo walanje nhavi, nhinicizo, wakaliwona Lisanduku lye Cilagane. Wakasangalala muno muno.

¹⁴ Nawo mukokoteni wukawa kuza wukawa kwinjila mu mugunda wa Yoshuwa, mono yali munya baho ha Bete-shemeshi, wukawa kwima mumo behi ne libwe yiwaha. Nawo wanhu wakawusola mukokoteni, wakawusananga ngwagu, wakaziwulaga na zizo zing'ombe, wakamulavizya Muwaha Mulungu likumbiko linyanywe.

¹⁵ Nawo Walawi wakalitimya Lisanduku lye Cilagane mu mukokoteni, hamonga ne cisanduku cono cali cina vihwani vye zahabu wakavijeleka mucanyha ye libwe liwaha. Nawo wanhu wa Bete-shemeshi, wakamulavizya Muwaha Mulungu makumbiko manyanywe, hamonga ne makumbiko ganji ganji.

¹⁶ Nawo watemi wawalya wahano we Wafilisiti, wali wali baho baho du, wazilanjiliye zose zono zetumwagwa. Hanyuma nhondo, wakawa kuwuya kanyhi ku Ekiloni mwizuwa lilyo du.

¹⁷ Wafilisiti wamutegulila Muwaha Mulungu mapu mahano ga zahabu gawe vilavywa so wubi wawo, yipu limonga limonga so makaya gose, likaya lya Ashidodi, na Gaza, na Ashikeloni, na Gati, na Ekiloni.

¹⁸ Kanyhi wakasola ne zingule zi zilya yihano ze zahabu, wakazitegula mu makaya mahano gono gali ge wawaha wawalya wahano we Wafilisiti. Na mu makaya ge magomawakali, hamonga na mu vitumbi vyono vyali visina majinji. Ne libwe li lilya liwaha lya ku Bete-shemeshi lya mu mugunda wa Yoshuwa, lyono walijeleka Lisanduku lye Cilagane lyo Muwaha Mulungu, likali lili baho, ho liwe wuhomelezi wa kuli zono zejela lulo.

¹⁹ Muwaha Mulungu yakawawulaga lwa kamonga wanhu makumi mupunghati, wa Bete-shemeshi vyono walisunjilila Lisanduku lye Cilagane. Ne wanhu wakalila muno muno, vyono Muwaha Mulungu yakaleta mafwa mawaha muli wene.

Lisanduku lye Cilagane, ha Kiliyati Yeyalimu

²⁰ Holeka i wanhu wa Bete-shemeshi wakatya, “Nani 'mbi kanyhi mono kosuma kwima hali Muwaha Mulungu yuyu, u Mulungu mono yelile? Alu hamba cimutegule hayi, ho yawuce kono kwetu?”

²¹ Hodu wakawa kutuma munhu yabite yakawalonjele wanhu wa ku Kiliyati Yeyalimu yatye, “Wafilisiti waligomola Lisanduku lye Cilagane co Muwaha Mulungu. Holeka muze mulisole.”