1 Samwili 5 - Luganuzi Luswanu Kuli Wanhu Wose 2002

Lisanduku lye Cilagane lyo Muwaha Mulungu, lili mu Wafilisiti

¹ Nawo Wafilisiti wali weza kulisola Lisanduku lye Cilagane lyo Muwaha Mulungu, wakalidinghula, wakaliwusa kuko ku Ebene-zeli, wakalitegula kwi'kaya lyawo lya Ashidodi.

² Wakaliwika mugati ye nyumba ya Dagoni, u mulungu wawo, wakaliwika ha mhelo behi na Dagoni.

³ Nawo wanhu wa Ashidodi, wali weza kusinhuka hakali mitondo muno muno mwi'zuwa lye kejete, walanje nhavi, wakawa kuwona u mulungu wawo Dagoni, yagwiye wugubama ha mwande ye Lisanduku lye Cilagane lyo Muwaha Mulungu. Ale du, wakawa kumwinula yuyo mulungu wawo Dagoni, wakawa kumusimya kanyhi hanhu hayo hono yali.

⁴ Ninga mwi'zuwa lye kejete wali weza kusinhuka hakali mitondo muno muno, walanje, wakawa kuwona u mulungu wawo Dagoni yagwiye kanyhi wugubama, hamwande ye Lisanduku lye Cilagane co Muwaha Mulungu. Ninga muhinzo wuwu, Dagoni yakawa yabeneka mutwe wakwe, hamonga ne maganza gose vyono mejete, vigwiye vyose ha mulango, na Dagoni yasigala ne ciwili-wili cili wene.

⁵ (Holeka i wakohani hamonga ne wahembi wose wa Dagoni, si wakanyagaga ha mulango wa Dagoni kuko ku Ashidodi sunga nalu.)

⁶ Nayo Muwaha Mulungu yakawalipiciza wanhu wawo wa ku Ashidodi ko wusungu wuwaha muno. Yakawalipiciza wene, hamonga ne wanhu wose, wono wali wapilime behi behi ne yisi yawo, mu nzila yo kuwaletela mapu mu yisi yose.

⁷ Nawo wali weza kuziwona zizo zono zijeye, wakawa kutya, “Mulungu we wa Isilayeli yo yakucilipiciza sese, hamonga no mulungu wetu Dagoni. Holeka nase si cosuma kulileka kanyhi Lisanduku lye Cilagane lyo Muwaha Mulungu lijendelele kwikala hono hetu.”

⁸ Holeka wakawa kutuma wanhu, wakawaceme watemi wose wahano we Wafilisiti wekongholele hamonga. Wakawawuza wakutya, “Nye nyo watemi, alu cilinoze nhawule Lisanduku lili lye Cilagane lyo Muwaha Mulungu we wa Isilayeli?” Nawo watemi wakapitula wakatya, “Mulisolaje mulihamizye ku Gati.” Wakalisola wakalihamizya kwi'kaya linji lye Wafilisiti.

⁹ Ninga Lisanduku lilyo lyali lyeza kufiswa kuko, nayo Muwaha Mulungu, yakalilipiciza likaya lilyo nalyo ko wuhangawe wuwaha muno. Yakawatowa ne mapu, wose wa mwikaya lilyo, i wawaha ne wadodo.

¹⁰ Ale, du, nawo wakalisola Lisanduku lilyo lye Cilagane lyo Muwaha Mulungu, wakalihamizya kwi'kaya linji kanyhi lye Wafilisiti, lyono likucemwa Ekiloni. Ninga kanyhi, lyali lyeza kufika kuko, i wanhu wa mwi'kaya lilyo, nawo wakanza kulila muno muno, wakutya, “Alu mulanje, waciletela Lisanduku lye Cilagane lyo Muwaha Mulungu we Waisilayeli, ho liciwulaje nase wose!”

¹¹ Hodu, wakawa kuwakonghola kanyhi i watemi we Wafilisiti, wakawalonjela wakatya, “Nye watemi, muligomolaje Lisanduku lye Cilagane lye Waisilayeli hanhu halyo, ho lilece kuciwulaga ase wose hamonga na we zimhuga zetu.” Ne wanhu wose wa mwikaya, wakawa kwinjilwa na mahwele mawaha muno muno, hambi Mulungu nha yakawalipiciza ko wulipicizwe wo wusungu muno muno.

¹² Hambi nha sunga na wose wono si wafwa, wakatowa ne mapu. Ne wanhu wose wakawa wakulila, wakuyililila milungu yawo wakulondola wutazi.