1 Samwili 4 - Luganuzi Luswanu Kuli Wanhu Wose 2002

Lisandukulu lye Cilagane likusolwa

¹ Na mu vilo vivyo, Wafilisiti wakekongholela hamonga, wabite wakehome ne Waisilayeli, nawo Waisilayeli, wakawa kwiwikaniza wawahome Wafilisiti. Wene Waisilayeli wakayisimya nghambi yawo ku Ebene-zeli. Nawo Wafilisiti, wakayisimya nghambi yawo ku Afeki.

² Ale, wakawa kwanza kuwahoma Waisilayeli, no wulugu wukawa wukali muno, nawo Wafilisiti wakawawulaga Waisilayeli, wanhu elufu yine mu wulugu wawo.

³ Nawo Waisilayeli wono wasigala wakawuya ku nghambi yawo ku Ebene-zeli, i wawaha wawo wakawa kwanza kwiwuza wakutya, “Alu mwene 'nye, nhawule Muwaha Mulungu kacileceleza cisumwe ne Wafilisiti i zuwali? Ale, lu, ciba, cibite ku Shilo cikalisole Lisanduku lye Cilagane lyo Muwaha Mulungu, cililete ku kuno, u Muwaha Mulungu ho yawe yali hamonga nase, yaciponye mu walugu wetu.”

⁴ Ale, wakawa kutuma wanhu ku Shilo, wakawa kulisola Lisanduku lye Cilagane co Muwaha Mulungu we Mihanga, mono kekalaga haciligati ye makelubi, wakawa kulileta kuko ku nghambi yawo. Nawo wana wa Eli wejete we cilume, Hofuni na Finehasi, vikazana ne Lisanduku lye Cilagane lyo Muwaha Mulungu kuko ku nghambi.

⁵ Nalyo Lisanduku lye Cilagane lyo Muwaha Mulungu, lyali lyeza kufika baho ha nghambi, hodu, wa Isilayeli wakawa kwanza kuzoza izozo yiwaha so nyemo, sunga ne yisi yikabocelela.

⁶ Nawo Wafilisiti wali weza kulihulika lizozo lilyo, wakawa kwiwuza weneco wose wakutya, “Alu lizozo lilyo lya cici, lyono lili ku nghambi ye Wahebelaniya? Ne nhunizo yayo nyhici?” Ninga wali weza kumanya vyono Lisanduku lye Cilagane lyo Muwaha Mulungu, lyakondya kuza, lili mu nghambi ye Wahebelaniya,

⁷ hodu wakenjilwa no woga wuwaha muno muno, wakatya “Alu milungu yakondya kuwaziza mu nghambi yawo! Holeka alu langa camalika wose! Hambi nha hasina nghani yinji yono yinha yiyino, yono yacijelela ku wulawa na katali!

⁸ Alu nani mono kosuma kuciponya wulawa mu milungu yiyo ye vilungo? Hambi nha yo milungu yono yawongomeza Wamisili mu nyika!

⁹ Holeka alu anye nyo Wafilisiti mweze muli vilungo, kanyhi mwihome cilume-lume, ho cilece kuwa wawanda we Wahebelaniya, nha vyono wene wali wawanda wetu. Holeka mwihome cilumelume!”

¹⁰ Nawo Wafilisiti wakawahoma Waisilayeli kwe vilungo vyawo vyose, sunga wakawasuma. Waisilayeli wakatiziza ku zikaya zawo. Na mu wulugu wuwo wukali muno, wakawulagwa wasilikale elufu makumi madatu we Waisilayeli.

¹¹ Ne Lisanduku lye Cilagane co Muwaha Mulungu, nalyo likasolwa ne Wafilisiti, ne wana wa Eli wejete we cilume, Hofuni na Finehasi, nawo wakawulagwa nhavivyo.

Wufwe wa Eli mukohani

¹² Munhu yunji mulawa mu mulango wa Benyamini, yakawa kumangha ku wulawilila kwi'wanza lyo wulugu, sunga ku Shilo, nayo yakafika kuko ku Shilo mwi'zuwa lililya du. Yakawa kuyidemulanga myenda yono yali yayivwalile, yakeyitila ne manghundi mu mutwe wakwe, ho yalajile wukalale no wusungu wono yali yena nawo.

¹³ Nayo Eli vyono yali yena nyhilu muno yo kuliwona Lisanduku lye Cilagane lyo Muwaha Mulungu, yali yekaye mwi'goda, hamhelo ye nzila, yakulanjilila. Nayo munhu yuyulya, yakawa kwanza kuzilonga zinghani mwi'kaya lyose. Ne wanhu wose wono wazihulika, wakawa kulila muno so woga.

¹⁴ Nayo Eli kumbe, yakalihulika lizozo lilyo, yakawa kuwuza yakutya, “Alu, 'nye, lizozo lili lina nhunizoci?” Nayo munhu yuyulya yakawa kumubitila Eli mbela mbela, yakawa kumulonjela zose nha vyono zinha.

¹⁵ (Lulo nayo Eli, yali yaficila myaka makumi yicenda na munana, ne meso gakwe gali gakondya kutukuwala, hamba si yakusuma kanyhi kuwona.)

¹⁶ Nayo munhu yuyo yakamulonjela Eli yakatya, “Ane mhonamhona mu wulugu zuwali, niwa kutiziza akuno.” Nayo Eli yakamuwuza yakatya, “Alu ma wanangu zinyhici zono ziwejeleye kuko?”

¹⁷ Nayo munhu yuyo yakamupitula yakamutya, “Waisilayeli wasumwa, kanyhi watiza ha mwande ye Wafilisiti. Na mbeka wacisumiliza vibi muno muno! Ninga hamonga na zizo, sunga ne wanago, Hofuni na Finehasi, wose wawulagwa. Ne Lisanduku lye Cilagane lyo Muwaha Mulungu, nalyo lisolwa ne Wafilisiti!”

¹⁸ Nayo munhu yuyo, yali yeza kutambula ze Lisanduku lye Cilagane lyo Muwaha Mulungu du, hobaho Eli, yakawa kugwa cinghata, mu wulawa mwigoda lyakwe lyono yali yekaliye, baho hamhelo yo mulango we likaya. Nayo yali yeza mukombi muno, kanyhi yali yo munhu mono yali yajinile muno. Holeka mu wugwe wuwo, singo yakwe yikabeneka, nayo hobaho du yakawa kufwa. Nayo yali mulamuzi mu Waisilayeli myaka makumi mane.

Wufwe wo mugolece wa Finehasi

¹⁹ Nayo mukwewe we cicekulu wa Eli, mono yali yo mugolece wa Finehasi, mu vilo vivyo yakawa yena 'nda. Ne vilo vyakwe vyo kusawa, vikawa vyafika. Nayo yali yeza kuhulika nha vyono Lisanduku lye Cilagane lyo Muwaha Mulungu lyasolwa ne Wafilisiti, na vyono Eli u mukwewe hamonga no mulume wakwe, wose wakondya kufwa, hodu nayo hobaho du yakawa kwibatwa no wusungu wo kusawa, yakawa kusawa.

²⁰ Na lono yali yeza behi no kufwa i wacekulu wono wamutazaga, wakamutya, “Wulece kogopa, hambi nha kolela mwana wa cilume!” Ninga mwene hamba si yapitula cinji, hamba kumulanga mwana.

²¹ Nayo yakamucemela mwanagwe litagwa lyakwe Ikabodi, nhunizo yayo, “Lukumyo lwo Muwaha Mulungu lwawaleka Waisilayeli.” Yakawa kutuniliza wusolwe we Lisanduku lye Cilagane co Muwaha Mulungu, hamonga no wufwe wo mulume wakwe hamonga no mukwewe Eli.

²² Yakatya, “Lukumyo lwawawucila Waisilayeli. Hambi Lisanduku lye Cilagane lyo Muwaha Mulungu nha lyasolwa.”