1 Samwili 3 - Luganuzi Luswanu Kuli Wanhu Wose 2002

U Muwaha Mulungu, yakwilajila kuli Samwili

¹ Na mu vilo vivyo, lono muzelelo Samwili, yamwitumamilaga Muwaha Mulungu, hasi yo wulanjilizi wa Eli mukohani, nghani yo Muwaha Mulungu yikawa nyhefu, no wugubulilwe nawo, wono wukulawa kuli Mulugu wukawa wa kamonga kamonga muno.

² Ale, mwi'zuwa linji ne cilo, lono na Eli yali yeza behi no kubofula, yali yagonile mu cinyumba cakwe,

³ Samwili nayo, yali yagonile hono hali liwicigwe Lisanduku lye Cilagane mu Nyumba yo Mulungu. Na hakali mitondo muno, lono kwali kukali kutitu ne zitala zali zikali nazima,

⁴ Muwaha Mulungu yakamucema Samwili, nayo Samwili yakedika yakatya, “Ane nili baha.”

⁵ Yakatuluka lumangho yakamubitila Eli mukohani, yakamutya, “Ane naza, hambi nha hulika wukunyhema.” Ninga Eli mukohani yakamupitula yakamutya, “Ane si nghucemile yaye, wubite wukagone.” Nayo Samwili yakawa kubita kugona.

⁶ Muwaha Mulungu yakamucema Samwili kanyhi. Nayo Samwili hamba si yamanya vyono, mono yakumucema, yo Muwaha Mulungu, hambi Muwaha Mulungu nha yali yakali nalongana nayo mwi'zuwa linji lyo lyose.

⁷ Ale, Samwili yakenuka, yakamubitila Eli mukohani kanyhi, yakamutya, “Ane naza, hambi nha hulika wukunyhema.” Ninga Eli mukohani yakamupitula yakamutya, “Gwe mwanangu Samwili, ane singhucemile yaye, wubite wukagone.”

⁸ Muwaha Mulungu yakamucema Samwili kanyhi lwe kadatu. Nayo Samwili yakenuka, yakamubitila Eli mukohani, yakamutya, “Ane naza, hambi nha hulika wukunyhema.” Nhondo baho Eli mukohani, yakezuka vyono yo Muwaha Mulungu mono yali kumucema mudodo.

⁹ Holeka Eli yakawa kumulonjela Samwili yakatya, “Alu wubite kanyhi wukagone, na hono wuhulice yakucema kanyhi, agwe wumupitulaje wutye, ‘Wulonje Muwaha, u mwitumami wako yakuhulika.’ ” Nayo Samwili yakawa kubita kugona.

¹⁰ Muwaha Mulungu yakaza yakema bahalya kanyhi, yakawa kucema, nha vyono yakacema halulongozi yakatya, “Samwili! Samwili!” Nayo Samwili yakedika yakatya, “Wulonje Muwaha, u mwitumami wako yakuhulika.”

¹¹ Muwaha Mulungu yakamulonjela yakatya, “Lanje, ta Samwili, ane nokwituma nghani muli wanhu wa Isilayeli, nghani ya kogofya, yono munhu wo wose mono koyihulika, yomucelewaza.

¹² Na mwizuwa lilyo, nomufisiliziza Eli, zose zono nalonga ze kaya yakwe, ku wulawa mwamulizo sunga ko ku ndumilizo.

¹³ Hambi nha nakondya kumumanyiza vyono, noyilipiciza kaya yakwe cibitilila. Hambi i wanagwe we cilume nha walonga nghani zimbi kuli'ne. Nayo Eli yali yamanyile, nha vyono wetumaga zizo, ninga hamba si yasuma kuwemila yaye.

¹⁴ Holeka nane nayilahila nyumba ya Eli vyono, makumbiko ne vilavywa, si vyosuma kuwukwema wubi we nyumba ya Eli cibitilila.”

¹⁵ Nayo Samwili yakajendelela kugona, sunga wukela hakali mitondo. Hanyuma yakawa kwinuka, yakawa kuyidigula milango ye Nyumba yo Muwaha Mulungu. Ninga yakogopa kumumanyiza Eli zizo zono zimwijeleye.

¹⁶ Ninga Eli yakamucema Samwili yakatya, “Gwe Samwili mwanangu!” Nayo Samwili yakedika yakatya, “Ane nili baha.”

¹⁷ Eli yakamutya Samwili, “Alu Muwaha Mulungu kakulonjela cici? Nghukunena wulece kuhundicila nghani hamba monga. Hambi u Muwaha Mulungu nha kokulipiciza ko wukali muno muno hono wulece kundoloseza zose zono yalonjile.”

¹⁸ Ale, Samwili yakawa kumuloloseza zose, si yamuhundika nghani hamba monga yaye. Eli nayo yakamupitula yakamutya, “Hambi nha yo Muwaha Mulungu, holeka kosuma kwituma nghani yo yose yono mweneco koyiwona swanu.”

¹⁹ Nayo Samwili yakajendelela kuwiluka, no Muwaha Mulungu yali yali hamonga nayo. Muwaha Mulungu yakazifisiliza zose zono Samwili yazilonga.

²⁰ Na ku soko yiyo, i wanhu wose wa mu yisi yose ya Isilayeli, ku wulawilila mhelo ayi sunga ku mhelo nzagwe ye yisi, wose wakamanya vyono mbeka Samwili yali muwizi wo Muwaha Mulungu.

²¹ Nayo Muwaha Mulungu yakajendelela kwilajila baho ha Shilo, hono yelajilila kuli Samwili no kulongana nayo. Holeka i wanhu wose wa Isilayeli, wamuhulicizaga muno Samwili muli zose zono yalongaga.