1 Samwili 29 - Luganuzi Luswanu Kuli Wanhu Wose 2002

Dawudi yakulemwa ne Wafilisiti

¹ Wafilisiti wakawakongholela hamonga i wasilikale wawo wo wulugu ku Afeki, lono nawo Waisilayeli wakawa wasitile nghambi yawo ha mumvwilo wono wuli mwilolo lya Yezeleli.

² Nawo i watemi wahano we Wafilisiti, wakawa kukola ne vipuga vyawo vye wanhu magana magana, na vye maelufu. Nayo Dawudi hamonga ne wanhu wakwe, wakawa kutyatya munyuma wali hamonga no mutemi Akishi.

³ I wawaha we wasilikale we Wafilisiti, wakawawona Dawudi hamonga ne wanhu wakwe. Hodu wakawa kuwuza wakutya, “Alu Wahebelaniya wawa wakunoza cici ahano?” Mutemi Akishi yakapitula yakatya, “Ayuno yo Dawudi, u mwitumami wo mutemi Sawuli we Waisilayeli. Yali yali hamonga nane vilo vinji. Nayo yakali hamba si netuma nghani yinji yo yose 'mbi ku wulawa vyono yaza.”

⁴ Ninga i wawaha we wasilikale we Wafilisiti, wakamukolelwa muno Akishi yikuwo wakamutya, “Mugomolaje mbela yuyo Dawudi yabite ku cikaya cono wamupela, wulece kumuleceleza yenjile yacitaze mu wihomi hambi nha kosuma kucigaluka kamonga mu wulugu. Ase cikuwona yili ciba yali yabite vikelamule no mutemi Sawuli, si nho kuwambuza wanhu wetu wafwe.

⁵ Hamba nhavivyo, ayu yo Dawudi mono wacekulu wamwimba wakawa kutya, ‘Sawuli kawulaga maelufu gakwe, ninga Dawudi makumi elufu gakwe.’ ”

⁶ Akishi yakawa kumucema Dawudi, yakawa kumulonjela yakatya, “Ane nghwilahiza hali Mulungu mumi we Waisilayeli, vyono mbeka agwe wali wuli cihuliko kuli'ne, sunga nali nyende cibitane nagwe ku wulugu. Hambi mbeka nha sinawona nghani yinji 'mbi kuli'gwe, ku wulawa vyono waziza mu yisi yangu. Ninga i watemi wanji si wakukwitumbila yaye.

⁷ Holeka alu, wuwuye ku kaya no mulamu. Ninga wulece kuwanozeza nghani yinji yono yowakalaza i wawaha wawa we Wafilisiti.”

⁸ Dawudi yakamupitula Akishi yakatya, “Alo nghanici 'mbi yono nitumile? Alu nha vyono gwegwe wulonjile, kutya vyono, wukali hamba nawona yisutya lyo lyose kuli'ne, ku wulawa lono naziza kukwitumamila. Alu cono conyimila kanyhi cicici, ho ndece kubitana nagwe, go muwaha no mutemi wangu nghawahome walugu wako?”

⁹ Akishi yakatya, “Ane heya nghuvumila. Hambi nha manyile vyono agwe, wina cihuliko nha malayika wo Mulungu. Ninga alu, i watemi wanji nha wakutya, vyono agwe si wunojeye wubitane nase ku wulugu.

¹⁰ Holeka aluno Dawudi, i mitondo hakali mitondo, anye wose mono mukamutiza Sawuli mukaza akuno kono kwangu, munojeye mwilawe hakali mitondo muno muno, muwuce mbela mbela mubite.”

¹¹ Hodu Dawudi hamonga ne wanhu wakwe wakelawa kwinuka hakali mitondo muno muno, wakawa kutuluka wakuwuya ku yisi ye Wafilisiti. Ninga wene Wafilisiti wakajendelela wakabita ku Yezeleli.