1 Samwili 25 - Luganuzi Luswanu Kuli Wanhu Wose 2002

Wufwe wa Samwili

¹ Samwili yakafwa, nawo wa Isilayeli wose wakekonghola, wakamulilila, wakamuzika mu kaya yakwe ku Lama. Hanyuma ya zizo, Dawudi yakawa kubita ku nyika ya Palani.

Dawudi na Abijeli

² Na kuko kwali na munhu we mhuga ya Kalebi, litagwa lyakwe Nabali, munya ku cikaya ca Mawoni. Munhu yuyo, yali yena mugunda behi ne cikaya ca Kalimeli, kanyhi yali munhu mugoli muno, yali yasawile ngholo elufu yidatu, na mhene elufu monga. No mugolece wakwe, Abijeli, yali yena futa swanu muno, kanyhi yali mugolece we mahala.

³ Ninga mwene Nabali, yali munhu we likuwo yiwaha, kanyhi yali yali cilyacilya.

⁴ Dawudi lono yali yali ku nyika, yakahulika nha vyono Nabali yakucenyenha zingholo zakwe ku Kalimeli,

⁵ hobaho, yakatuma wazelelo yikumi, yakawalajiliza wabite kuko ku Kalimeli wakamulondole Nabali, wamupele mulamu wakwe.

⁶ Yakawalajiliza wabite wakamulonjele watye, “Dawudi yakukulamusa muno muno, na vyono ane nghumulombela mulamu weze muli mwene, na muli we mhuga yakwe wose, sunga na kuli wanhu wakwe wose wono yena nawo.

⁷ Kanyhi kahulika vyono agwe wukucenyenha zingholo zako. Mwene yakusaka yakumanyize du, vyono i wadimi wako wali hamonga nase, ninga hamba si cawatendela vibi yaye. Kanyhi hasina hamba cinji co cose ca muli vinhu vyawo cono cihizigwe, mu mapango go gose gono cali cili hamonga nawo ku Kalimeli.

⁸ Hamba wuwawuze, na weneco du wokulonjela. Nase ciziza mwi'zuwa liswanu, na Dawudi yakukunena wucibocele ko wuswanu. Kanyhi dedede, ase co wetumami wako, hamonga na Dawudi mwendece wako, cikukulomba wucipele cocose cono kowa wina naco.”

⁹ Nawo wanhu wa Dawudi, wakabita wakamulonjela Nabali nha vyono Dawudi yali yawatumile, hodu wakawa kunyamala.

¹⁰ Nayo Nabali yakawapitula yakatya, “Ati mukutya Dawudi? Alu Dawudi yo nani mwene? Ane nha nghali hamba namuhulika yaye! Hambi nha mowali wetumami wenji vilo avi mono yisi, wono wakutiza ku wawaha wawo!

¹¹ Holeka nane, hamba si nosuma yaye kusola mukate wangu ne malenga gangu hamonga ne mitugo yono nali nakondya kuwawulajila i wacenyenha zingholo wangu, ho niwe kuwapela wanhu wono si niwamanyile na kono walawile!”

¹² Nawo wanhu wa Dawudi, hodu wakawa kuwuya kuli Dawudi, wakawa kumulonjela zose zono Nabali yalonjile.

¹³ Nayo Dawudi yakawalajiliza wanhu wakwe yakatya, “Ale, mwiwopaje munhu na mumaje wakwe!” Nawo wanhu wakwe, wakanoza nha vyono yawalajiliza. Nayo Dawudi nhavivyo, yakewopa mumaje wakwe, yakawa kutuluka hamonga ne wanhu wakwe waficile nha magana mane, na kono nyuma wakasigala wanhu magana mejete, wakekala ne viya.

¹⁴ Ninga yumonga wa muli wetumami wa Nabali, yakamulonjela Abijeli u mugolece wa Nabali, yakatya, “Mwene wumanyile vyono Dawudi yatuma wanhu wakwe ku wulawa ku nyika waze wamulamuse muwaha wetu Nabali, ninga mwene Nabali yakawaliganga.

¹⁵ Ninga wene ho wali wanhu waswanu muno kuli'se. Vyono mu mapango gose, gono cali cili hamonga nawo kuko mu mawimbi, wene si wacitendela vibi hamba hadodo. Kanyhi sunga ne vinhu vyetu vyono cali cina navyo, hasina cono cahizwa yaye.

¹⁶ Sunga na mu vilo vyose vyono cali cili hamonga nawo cikudima mitugo zetu, wene wacilindilizaga cilo na misi.

¹⁷ Holeka nghukunena wuzihwesaje zizi, sunga wuwone na vyono konoza. Hambi i nghani yiyi, nha yoleta wongomele kuli muwaha wetu Nabali, hamonga na wa mu kaya yakwe wose. Hambi nayo nha munhu mukamu, kanyhi yali cakacaka, hamba si kahulikaga za yunji!”

¹⁸ Hobaho baho, Abijeli, yakawa kukonghola musunho mikate magana mejete, hamonga na mifuko myejete ya nyhingo yimemile divayi, na ngholo yihano nghasice, na mbonho kilo yikumi na mupunghati, na vivunda yigana limonga vya Zabibu nghavu, hamonga na keki nghavu za nghuyu magana mejete, yakawa kuvipaciza mu zindogowe.

¹⁹ Hanyuma, yakawa kuwalonjela wetumami wakwe yakatya, “Alu anye mulongole ne vinhu vivi vyose, nane nomutyatyenyi munyuma.” Ninga hamba si yamulonjela mulume wakwe muli zizi zose.

²⁰ Ale, yakawa kutuluka yali mu ndogowe yakwe, nayo yali yeza kupilima he 'tunda, yaketang'anila na Dawudi nhinicizo yena ne wanhu wakwe.

²¹ Na mwi'daha lilyo, nayo Dawudi yali yali mu mahweso yakutya, “Alu nhawule nghebahula bwete kuyikamisa sawo yo munhu yuyu kono nyika, ho yinji yilece kwajilila hamba kuhizwa? Ninga lu lanje, mwene yakundipa zimbi muli ziswanu zono ane namutendela!

²² Ale, lu, Mulungu yambulagaje nane, hono niwe nghali si namuwulaga no munhu we ndumilizo muli wanhu wawo lono wusiku wukali si nela!”

²³ Nayo Abijeli yali yeza kumuwona Dawudi, hodu, yakawa kutima musunho mu ndogowe, yakawa kugwa wugubama ha mwande ya Dawudi, yakawa kumulonjela yakutya,

²⁴ “Gwe muwaha, nghukunena wuhulicize! Wundekaje nene yo niwudinghule wuhoswe wuwu.

²⁵ Nghukunena dedede, wulecele lukulu kuzityatya zinghani zo munhu ayulya mubi Nabali. Hambi nha yehwanile ne nhunizo ye litagwa lyakwe lya Nabali wo wutya Mulele! Hambi ane no mwitumami wako, nha nali nili hasina, lono wetumami wako waziza.

²⁶ Hambi nha Muwaha Mulungu du yo yakwimiye ho wulece kuwalipiciza no kuwawulaga i walugu wako. Alu nane zuwali, nghukwilahiza hali Muwaha Mulungu mumi, nha vyono i walugu wako sunga na wose wono wakusaka wakutendele vibi, wose wolipicizwa nha Nabali.

²⁷ Holeka alu nghukunena muwaha, wubocele vipegwa avi vyono nghuleteye, wuwagawile wanhu wako.

²⁸ Kanyhi nghukulomba muwaha wunenele muli zose zono nghusutizye. Ninga Muwaha Mulungu kokunoza wuwe mutemi, hamonga sunga no lulelo lwako nhavivilya. Hambi nha wukulewa milewo yakwe, hamba si kosuma kwituma zimbi mu vilo vyako vyose vyo wikale wako.

²⁹ Hamba munhu yunji yakusepe yasace yakuwulaje, u Muwaha Mulungu, u Mulungu wako, kokuponya nha vyono munhu kacidimaga ciwutwa cakwe co wuguzi wukamu muno. Holeka hamba ne walugu wako, Muwaha Mulungu kowagumila kutali, nha vyono munhu kagumilaga mabwe kutali ne nhago yakwe.

³⁰ Na kolo Muwaha Mulungu yakondya kwituma zose zono yakwihuwiziza, na kolo yakondya kukunoza wawa wuli mutemi wa Isilayeli,

³¹ ale baho nhondo ho kolowa wusina soko yo kukalala, hamba kuwona wusungu ku soko yo kumwaga sakami mbula soko, hamba wilipicize wono wilipicize. Na kolo Muwaha Mulungu yakondya kukulugutiza, ale nane wulece kusemwa yaye.”

³² Nayo Dawudi yakamupitula Abijeli yakatya, “Ale, Muwaha Mulungu yalumbwe, u Mulungu wa Isilayeli, mono yakuletile ho wuze witang'anile nane izuwali!

³³ Nghukulumba muno muno go Mulungu so wuswanu wako, na kuli zose zono wunhendeye izuwali. Hambi nha kunyhitila mu wubi wo wuwulaji, so wilipicize.

³⁴ Kanyhi Muwaha Mulungu, u Mulungu we Waisilayeli kanyhitila ho ndece kukutendela vibi. Alu nane izuwali, nghwilahiza hali Muwaha Mulungu mumi, nha vyono, hono wali wulece kunyiziza mbela, mbeka i wanhu wa Nabali, wali wawe wakondya kuwulagwa wose lono wusiku wukali nela!”

³⁵ Hodu Dawudi yakawa kuvibocela yipegwa vivilya vyono Abijeli yali yamuleteye. Hanyuma Dawudi yakawa kumulonjela Abijeli, yakatya, “Alu, wuwuye ku kaya, kanyhi wulece kuwa na mahwele yaye, ane nokwituma du nha vyono wusacile.”

³⁶ Ale, Abijeli yakawa kuwuya kwa Nabali. Yakamwagana yali ha kaya yatenjile ndigwa nyinji ha meza ye citemi-temi. Kanyhi yali yagalile wujimbi muno muno, yakawa yasangalaye muno. Holeka nayo Abijeli hamba si yasuma kumulonjela nghani yoyose mwizuwa lilyo, sunga wukela mitondo yaco.

³⁷ Ale, wugale waza kuwuka, nhondo Abijeli ho yakawa kumuloloseza zinghani zose. Nayo Nabali yali yeza kuzihulika zizo, yakatinuka muno muno, yakatuga wutamwa wo kudejepa muwili wose.

³⁸ Na vyali vyeza kupuluta vilo yikumi, Muwaha Mulungu yakamutowa Nabali, yakafwa.

³⁹ Nayo Dawudi yali yeza kuhulika vyono Nabali yakondya kufwa, hodu yakawa kutya, “Muwaha Mulungu yalumbwe! Vyono yakondya kumulipiciza Nabali so maligo gono yakandiga, kanyhi kanyhitila ane no mwitumami wakwe ho ndece kusutya. Muwaha Mulungu kamulipiciza Nabali so wubi wakwe.” Hanyuma ya zizo, Dawudi yakawatuma wanhu wakamupogozeze Abijeli, ho yamutole.

⁴⁰ Nawo wetumami wakwe wakawa kubita kuli Abijeli ku Kalimeli, wakawa kumulonjela wakatya, “Dawudi kacituma cize cikusole cikutegule kuli mwene, wukawe mugolece wakwe.”

⁴¹ Nayo Abijeli yakagundama ho hasi yakatya, “Ane nili mwitumami wakwe, niwikanize niwazuguze magulu i wetumami wakwe.”

⁴² Hodu yakawa kwinuka musunho, yakawa kuyiwikaniza ndogowe yakwe yakawa kuwasola ne wetumami wakwe we cicekulu wahano, yakawa kubitana hamonga ne wetumami wa Dawudi, yakawa mugolece wa Dawudi.

⁴³ Ninga Dawudi, yali yakondya kumutola Ahinowamu munya Yezileyeli. Alu kanyhi Abijeli nayo, yawa mugolece wakwe.

⁴⁴ Ninga kanyhi kuko ku nyuma Sawuli, yali yakondya kumutoza u mwanagwe we cicekulu Mikali, mono yali mugolece wa Dawudi kuli Paliti u mwana we cilume wa Layishi mono yali munya kwi'kaya lya Galimu.