1 Samwili 22 - Luganuzi Luswanu Kuli Wanhu Wose 2002

Sawuli yakuwawulaga Wakohani

¹ Hobaho Dawudi, yakawa kuwuka baho he 'kaya lya Gati, yakawa kutiziza ku mhango, behi ne likaya lya Adulamu. Nawo wanduguze, hamonga na we mhuga yakwe wono wali wasigaye, wali weza kuhulika nha vyono Dawudi yali kuko, wakawa kumubitila no kwilunza nayo.

² Ne wanhu wose wono wali wali mu wugaye, na wono wali wena migawa, na wose wono wali wena wukalale mu zinhumbula zawo, wose wakamubitila Dawudi, nawo wali waficile nha wanhu magana mane we cilume. Nayo Dawudi yakawa mulongola wawo.

³ Hanyuma Dawudi yakawa kuwuka baho ha mhango, behi ne likaya lya Adulamu, yakawa kubita ku Mizipa mu yisi ya Mowabu. Yakawa kumulonjela u mutemi wa Mowabu yakatya, “Nghukunena wumvumile niwalete wa baba na yaya waze mwikalane nawo hono hako, sunga kolo nakondya kuzimanya zono Mulungu yakusaka yanhendele.”

⁴ Hobaho Dawudi yakawa kuwaleka sogwe no nyina mu miwoko yo mutemi wa Mowabu. Nawo wakajendelela kwikala baho mu vilo vyose vyono Dawudi yali yakali yehundice mu mhango.

⁵ Hanyuma u muwizi Gadi, yakamuziza Dawudi yakamutya, “Dawudi, alu wulece kujendelela kwikala bahano. Ninga wuwuce lwa kamonga, wubite ku yisi ya Yuda.” Hobaho Dawudi yakawa kuwuka, yakawa kubita kwibago lya Heleti.

⁶ Ninga mwi'zuwa linji, lono Sawuli yali yali ku Gibeya, lono yali yekaye ha cigongo, hasi yo mubici wono wukucemwa musisi, yebate no mugoha wakwe mu muwoko, akuno ne wetumami wakwe wamupilime, baho yakalonjelwa nha vyono Dawudi hamonga ne wanhu wakwe, wakondya kwijela kono wali wehundice. Hodu, yakawa kuwalonjela wetumami wakwe yakatya,

⁷ “Anye nyo wanhu wa Benyamini, muhulicize ta, alu anye mukwihwesa nha vyono mbeka Dawudi kosuma kumutemelenyi migunda nyenye wose, hamonga ne migunda ye mizabibu, kanyhi yamunozenyi muwe wawaha mu mhuga ye wasilikale wakwe wo wulugu hongo?

⁸ Alu kumbe, yo soko yono yikuleka mukunozeza maheho? Hambi nha hasina hamba monga muli'nye mono yanonjeye vyono u mwanangu Yonazani yakondya kwilunza na Dawudi. Alu yikwijela vyono, hasina hamba monga muli'nye mono yakunghalalila ane, hamba kunonjela nha vyono Dawudi mono yo yumonga ne wanhu wangu, yali mu muno, na vyono yakulondola cilejeho yasepe, yambulaje. Kanyhi nha vyono no mwanangu Yonazani yo yakumutaziliza!”

⁹ Ninga nayo Dowegu yali yemile baho, hamonga ne wetumami wa Sawuli, holeka yakamulonjela Sawuli yakatya, “Ane namuwona Dawudi lono yabitila kuli Ahimeleki u mwana wa Ahitubu kuko ku Nobu.

¹⁰ Na vyono Ahimeleki yakamulombela Dawudi kuli Muwaha Mulungu, muli zose zono Dawudi kozituma, hanyuma yakawa kumupela Dawudi ndigwa, hamonga no mumaje wono wali wa Goliyati u Mufilisiti.”

¹¹ Hodu, mutemi Sawuli yakawa kumucema mukohani Ahimeleki, hamonga ne wanduguze wose, wono nawo wali wakohani mumo mu Nobu, na wose wakawa kumuziza.

¹² Baho, mutemi Sawuli, yakawa kumuwuza Ahimeleki yakatya, “Ahimeleki, ta wuhulicize!” Nayo Ahimeleki yakapitula yakatya, “Ane nili baha mutemi nghuhulicize.”

¹³ Nayo mutemi Sawuli yakamuwuza Ahimeleki yakatya, “Alu agwe hamonga na Dawudi, nhawule mweza mwina maheho mukuheha? Hamba nhawule 'gwe wukamupela Dawudi ndigwa, hamonga no mumaje, kanyhi wukamulombela kuli Mulungu? Alu wulanje, yakondya kungaluka, sunga nalu yakulondola cilejeho du yambulaje.”

¹⁴ Nayo Ahimeleki yakamupitula yakatya, “Ayu Dawudi yo mwitumami du mwihuwilwa yali wene, mono wina nayo! Mwene yo mukwemulima wako, kanyhi yo mulongola we walindilizi wako, kanyhi yo munhu mono yena lilumbo yiwaha kuli wanhu wose wa mu kaya yako.

¹⁵ Heya, ane namulombela kuli Mulungu, ninga ayi, yali si nghanghulo nongozi yaye ya ane kumulombela kuli Mulungu. Holeka hono hawe hogali maheho go kukuheha agwe, nghukunena go mutemi, wulece kusonjeza ane, hamba yunji wo wose wa mu mhuga yangu. Ane si manyile yinji yo yose ya muli zinghani zizi!”

¹⁶ Mutemi Sawuli nayo yakatya, “Alu, Ahimeleki, gwegwe hamonga na we mhuga yenyu wose, munojeye muwulagwe.”

¹⁷ Hodu yakawa kuwalajiliza i walindilizi wakwe wono wali wemile behi nayo, yakawatya, “Ale, muwawulagaje wakohani wose wo Mulungu! Hambi nha wemile ku lubavu lwa Dawudi, kanyhi, hamba si wali kunonjela vyono Dawudi yakondya kutiza, hamba yiwe kumbe nghani yiyi, wene wali wayimanyile.” Ninga i walindilizi wakalema kuyinula miwoko yawo wawawulaje wakohani.

¹⁸ Hodu mutemi Sawuli yakawa kumutya Dowegu, “Ale, gwegwe wawulagaje!” Hodu nayo Dowegu mbeka yakawa kuwawulaga wakohani wose. Na mwi'zuwa lililya yawulaga wakohani makumi munana na wahano, wono wali wavwalile efodi.

¹⁹ Sawuli yakalajiliza kanyhi, vyono i wekazi wose wono wekaye mu Nobu likaya lye wakohani, i walume ne wacekulu hamonga ne wana, ne wana wagalika wose wawulagwe. Hamonga ne zing'ombe, ne zindogowe, ne zingholo zawo.

²⁰ Ninga hamba nhavivyo Abiyatali, mwana monga we cilume, mwana wa Ahimeleki, yuyo yakeponya, yakatiza, yakabita kwilunza na Dawudi.

²¹ Yakawa kumuloloseza vyono Sawuli yawawulaje wakohani wo Muwaha Mulungu.

²² Nayo Dawudi yakamulonjela Abiyatali yakatya, “Ane mwi'zuwa lililya nali neza kumuwona Dowegu bahalya, nghamanya du vyono mwene komulonjela Sawuli. Holeka yonene mono nawambuza wanduguzo wawulagwe.

²³ Ninga alu, agwe wikalaje nane, wulece kuwa na woga. Sawuli, mwene kosaka yaciwulaje wose, ane na gwegwe. Ninga agwe kokwikala wupolile du hono hangu.”