1 Samwili 21 - Luganuzi Luswanu Kuli Wanhu Wose 2002

Dawudi yakutiza hali Sawuli

¹ Dawudi yakawa kubita kuli mukohani Ahimeleki ku Nobu. Yali yeza kufika, Ahimeleki yakalawila kunze akuno yakucicima muno ho yamuhinjilize. Ahimeleki yakamuwuza Dawudi yakatya, “Alu nhawule kuza wuli wene?”

² Nayo Dawudi yakamupitula yakatya, “Ane nhumwa no mutemi Sawuli nize nitume zono yanhumile, kanyhi kanghong'onheza nha vyono, yunji wo wose yalece kuzimanya zono yanhumile nizitume. Langa i wanhu wangu niwalonjela vyono, citang'anile nawo ha wutunga.

³ Alu agwe kowa wina ndigwa ci baha? Wumhele mikate mihano mbite nayo, hamba cinhu co cose cono kowa wina.”

⁴ Ahimeleki mukohani yakamupitula yakatya, “Ahano sina mikate yo kulya wanhu wose, langa ho yili mikate yono yelile du yono yinojeye kuligwa ne wakohani wali wene. Holeka kosuma kuyilya mikate yiyo, hono i wanhu wako wawe wali weyimiye, si wagonile ne wacekulu, mu vilo vivi vicefu.”

⁵ Nayo Dawudi yakapitula yakatya, “Na mbeka wakali netuma zizo. Hambi wanhu wangu nha wazoweye nhondo zose, lono cikutumwa cibite ciketume nghani yo yose, wawikaga mwiko, no kuwa welile. Alu muhinzo awu nhondo, wo ko muno, vyono wo muhinzo wo mulimo wono wisimajiye muno, si nha milimo ye mihinzo yose!”

⁶ Ale du, mukohani Ahimeleki yakawa kumupela Dawudi mikate yiyilya yono yelile. Hambi nha hali hasina mikate yinji yono yali yisigaye, langa hono si mikate yiyo du yono yelile i mikate yono yali milavye kuli Muwaha Mulugu, yono, lono yikuwuswa mu meza yono yelile, yakawanizwaga du na yinji yono yili moto.

⁷ (Na mwi'zuwa lilyo, hali na munhu yunji u mwitumami wa Sawuli, litagwa lyakwe Dowegu, munya ku Edomu, mono yali yo muwaha kuli wetumami wa Sawuli, yakawa yazize baho ho yafisilize wulajilize.)

⁸ Dawudi yakamutya Ahimeleki, “Wule, kowa wina baha mugoha hamba mumaje wumhele? Hambi mutemi nha yandajiliza nhuluce musunho, nane si nasuma hamba kusoleleza hamonga ne vitwalo vyangu yaye.”

⁹ Ahimeleki yakamupitula Dawudi yakatya, “Ane baha nina mugoha wuwulya du, wono wali wa Goliyati Mufilisiti mono gwegwe wamuwulajila mwi'lolo lya Ela. Nawo wuli baha mupalinjize no mwenda, muwice ku nyuma ye Efodi. Holeka hono wuwe wukukwendeza, ale, wusolaje. Hambi nha co citwalo cili wene du, cono nina naco bahano.” Dawudi yakatya, “Heya! Wumhelaje wuwo wokwila, hambi nha heza hasina kanyhi ho hose mumaje wunji.”

¹⁰ Hobaho Dawudi yakawa kutuluka yakumutiza Sawuli. Yakawa kubita sunga kuli mutemi Akishi wa ku Gati.

¹¹ Nawo i wetumami wo mutemi, wakamulonjela Akishi wakatya, “Alu mwene, si yo yuyu Dawudi u mutemi we yisi yakwe? Ayu yo yuyu u munhu mono, ne wacekulu lono wavinaga wakamwimba wakutya, ‘Sawuli kawulaga maelufu gakwe, ninga Dawudi makumi elufu gakwe.’ ”

¹² I zinghani zizo zikamwinjila muno Dawudi mu nhumbula yakwe, yakamogopa muno Akishi u mutemi wa Gati.

¹³ Hodu, Dawudi yakawa kwikawaniza mijendele yakwe hali wene, yakenoza kuli wene nha mumangha lukwale. Na lono wasakaga wamutuze, mwene yakawa kukwangula kwangula mu malango ga mwikaya, no kuzihohela zindevu zakwe.

¹⁴ Baho mutemi Akishi, yakawa kuwalonjela wetumami wake yakatya, “Ale mulanje ta! Munhu ayu yena lukwale ye! Alu nhawule mumuleta kono kwangu?

¹⁵ Anye si mumanyile vyono nina wanya lukwale wenji? Alu nhawulenyi mukundetela yunji kanyhi, ho yaze yangaze ne metumo gakwe go wulele hono kaya yangu?”