1 Samwili 2 - Luganuzi Luswanu Kuli Wanhu Wose 2002

Wulombe wa Hana

¹ Nayo Hana yakalomba yakutya, “Muwaha Mulungu kayimemya nhumbula yangu nyemo, Nane sangalaye muno so zose zono yanhendeye! Nane nowaseka walugu wangu so nyemo yono nina nayo, vyono nghuyisanglalila mhonelo yakwe!

² “Hasina mono yelile nha vyono Mulungu yelile, hambi nha hasina yunji, langa gwegwe du, hamba hasina mudimi yunji mono yehwanile no Mulungu wetu.”

³ Mulecele lukulu wulonji wenyu wo wiwoni, munyamalile lukulu ne zinghani zenyu zo widunhumuzi, Hambi u Muwaha Mulungu, nha yo Mulungu mono yazimanyile zose, Nayo kaling'anizizaga muli zono wanhu wakwituma.

⁴ I mapinde ge vitung'ati, gabeneka. Ninga i wasocele wakucila kutuga vilungo.

⁵ I wanhu wono wali wali ciguto ha lulongozi, alu weza kwilimiliza kuli wanji ho watuje ndigwa, Ninga wono wali nzala, hamba si wodabucila lukulu. No mugolece mugumba, alu yalela wana mupunghati. Ninga mucekulu we wana wenji, kalekwa yali bwete.

⁶ U Muwaha Mulungu kawulagaga, kanyhi kawumifyaga, kawategulaga wanhu ko ku yisi ye wafu, kanyhi kawagomola.

⁷ Kawanozaga wanhu wanji wawa waciwa, na wanji wawa wagoli wanji kawanyetyaga, na wanji kawakumyaga.

⁸ Kamwinulaga muciwa mu wulawa mu manghundi no kumminula mono yena wanjile mu wugazice wakwe. Kawa kuwekaza hamonga ne wawaha kawawika i hanhu ho lukumyo. Hambi u musinji we yinze, nha wakwe Muwaha Mulungu, nayo yayisimya yinze mucanyha yo musinji wuwo.

⁹ “Kawadimaga i wanhu wakwe wehuwilwa ninga i wanhu wetuma wubi, wokongomezezwa mu citi hambi nha hasina munhu, mono kasumaga kwe vilungo vyakwe mweneco.

¹⁰ Nawo wono wesumanizaga no Muwaha Mulungu wokongomezwa, hambi nha kowatowa ne limuli lya ku wulanga, Muwaha Mulungu koyiling'aniza yinze yose, no komupela mutemi wakwe vilungo, komupela wusume u mutemi wakwe muhagulwa.”

¹¹ Hanyuma ya zizo, Elikana yakawa kuwuya ku kaya ku Lama, ninga muzelelo Samwili, yakasigala kuko ku Shilo, yakajendelela kumwitumamila Muwaha Mulungu mu wutonji wa Eli mukohani.

I wana we cilume wa Eli

¹² Ale, i wana we cilume wa Eli, wakawa wanhu wono wali wali caka caka du, wakawa wasina cogopo hamba cidodo hali Muwaha Mulungu.

¹³ Kanyhi wakawa wayibedegaye muno sunga ne myoto ye wakohani mu wanhu. Hambi myoto yiyo nha yali yili nhavi. Lono munhu wo wose yalavyaga likumbiko lyakwe, u mwitumami wo mukohani, yazaga yena ne cicinyilo co kunimulila nyama mu moto, cono cina vicinyilo vidatu, na kolo nyama yatogota,

¹⁴ kawa kwinjiza cicinyilo cico mu nyungu, ne nyama yo yose yono cicinhyilo cico coyicinya no kuyilavya mumo mu nyungu, nyama yiyo yiwa yo nyama yo mukohani. Na wuwu wukawa wo moto wono wetumamilwa kuli Waisilayeli wose, wono wazaga kuko ku Shilo, ku wulavya makumbiko gawo.

¹⁵ Ninga hamonga na zizo, sunga na lono mhama yikali si nanyanywa, u mwitumami wo mukohani, yazaga kawa kumulomba u munhu mono yalavyaga likumbiko yakumutya, “Ale, wumhelaje nyama yo kumukasicila mukohani, hambi nha sikoyisaka nyama yako yono yakondya kutogoswa mu nyungu, langa kosaka yono yikali nduma.”

¹⁶ Na hono munhu yuyo yapitule yatye, “Ng'o vyo si yinojeye, langa wulece cityatye wityatye vyono winha, camule ciyinyanye yiyi mhama, hanyuma nagwe ho wusole mu nghango nha vyono wendile gwegwe.” Ninga mwitumami wo mukohani nayo yatye, “Ng'o ye, langa wumhelaje lulu baha! Na hono wuleme kumhela, hodu, ane noyisola kwe vilungo!”

¹⁷ No wubi wuwu we wana we cilume wa Eli, yikawa nghani 'mbi muno muno hali Muwaha Mulungu, vyono wagatendelaga makumbiko go Muwaha Mulungu mu wu wula cogopo.

Za Samwili, lono yali yali ku Shilo

¹⁸ Ale, Samwili yakawa kwanza kumwitumamila Muwaha Mulungu kuko ku Shilo, akuno yavwalile Efodi ya bafuta.

¹⁹ Na mu myaka yose, mwaka na mwaka, Hana u nyina wa Samwili, yazaga hamonga no mulume wakwe Elikana, ku wulavya likumbiko lyo mwaka, nayo Hana yamuletelaga Samwili Efodi yono yali yimukwiliye mwi'daha lilyo.

²⁰ Nayo Eli mukohani, yakamulugutiza Elikana, hamonga no mugolece wakwe yakatya, “Ale, Muwaha Mulungu yakupele wana wanji kanyhi, muli mugolece yuyu, ho wahomele hali mwana yuyu Samwili mono mumulavizye Muwaha Mulungu.” Hanyuma ya zizi, wene wakawuya kwawo ku Lama.

²¹ Nayo Muwaha Mulungu, mbeka yakawa kumulugitiza Hana, nayo Hana yakalela wana wanji wana we cilume wadatu, hamonga ne wana we cicekulu wejete. Nayo muzelelo Samwili, yakawilucila mu witumami wo Muwaha Mulungu du.

Za Eli mukohani, ne wanagwe we cilume

²² Nayo Eli mukohani, lono yali yakombipa muno, yakazihulika zinghani zose ze wanagwe we cilume zono wawatendelaga Waisilayeli. Kanyhi na vyono wagonaga ne wacekulu, wono wetumaga milimo ya ha mulango we Lihema lyono Lyelile.

²³ Hodu, Eli mukohani, yakawa kuwawuza wawo wanagwe we cilume yakuwatya, “Alu nhawulenyi mukwituma makani gono genha gaga? Hambi wanhu wose nha wakunonjela ze makani genyu mabi gono mukwituma.

²⁴ Alu nghumutyenyi nhavi anye wanangu, ku wulawa izuwali, mulecele lukulu kwituma kanyhi makani gono genha gago! Hambi makani ge liwala lili, gono wanhu wo Muwaha Mulungu wakugalonga, nha mabi muno, kanyhi ga cevu ciwaha!

²⁵ Hambi nha hono munhu yamusutizye munhu muyagwe, u Muwaha Mulungu nha komutetela. Ninga hono munhu yamusutizya Muwaha Mulungu, alu nani mono komutetela?” Ninga wene hamba si wasaka wamuhulice u sogo yawo, hambi Muwaha Mulungu nha yali yakondya kulamula yawawulaje.

²⁶ Nayo muzelelo Samwili, yakacila kuwiluka no kutuga wendezwe kuli Muwaha Mulungu, sunga na kuli wanhu wose.

Wuwililwe wa Eli, hamonga ne mhuga yakwe

²⁷ Ale, u munhu wo Mulungu yakamuziza Eli, yamulonjele zono yatumigwe no Mulungu, yakamulonjela Eli yakamutya, “Lono mulezi wako Haluni hamonga ne mhuga yakwe yose wali wawanda kuli mutemi we Misili, ane nelajila kuli Haluni.

²⁸ Na mu wulawa mu zimbeyu zose ze wana wa Isilayeli, ane nghayihagula mhuga ya Haluni, wawe wo wakohani wangu, wanyitumamile ha cikumbicilo, wawe kufusa wuvumba, kanyhi wawe kuvwala Efodi hali 'ne. Kanyhi nghawapela ne ling'ani, yo kusola ligawo, mu wulawa mu makumbiko manyanywe ga mu cikumbicilo.

²⁹ Alu nhawulenyi kanyhi mukugamelela mate, no kugabedegala makumbiko gangu, hamonga ne vilavywa vyangu, vyono nalajiliza muli wanhu wangu? Hamba so cici agwe Eli, kwikalaga wukuwakumya wanago du, kuciza ane no mweneco. Hambi nha wukuwaleceleza wakujina, so wulya zinyama zono zijinile, za muli makumbiko gono wanhu wangu wakundavizya nene?

³⁰ Agwe Eli, mono ane no Muwaha Mulungu we Waisilayeli, nehuwiza mu vilo vyono vipulute, nha vyono i mhuga yako, hamonga na wo mulango wako, wo wonyitumamila du nha wakohani mu vilo vyose. Ninga aluno nghutya, ane si nosuma kujendelela kugakangalila kanyhi, makani gono genha gaga! Langa, nowakumya du wono wakunghumya, kanyhi nowabedegala wono wakumbedegala.

³¹ Ninga wuhulicize! Lipango lyokuza, lyono nowawulaga i wazelelo wose wa mu mhuga yako na wa mu mulango wako. Hawe hasina hamba monga wa mu mhuga yako, mono kokwikala mono'nze sunga yawe mukombi.

³² Nagwe kotuga magazo, no kuwuwonela ko wivu uwulugutwe wose wono nowapela wanji wa muli wa Isilayeli. Ninga wa muli mhuga yako, hasina hamba monga, mono kosuma kanyhi kwikala sunga yaze yakombipe.

³³ Ninga hamba nhavivyo, nolomusigaza munhu monga wa muli wanago, yekale mumi, nayo yo kolonyitumamila mu mulimo wo wukohani. Ninga hanyuma kolobofula, yawe yasina kanyhi witumbilo. Ne wanago wanji wose wolofwila mu magazo mawaha muno.

³⁴ Na kolo i wanago Hofuni na Finehasi, wakufwila wose mwi'zuwa limonga, ale baho langa, ho kolomanyila vyono zose zono nazilonga, mbeka zoloficilicila.

³⁵ Nane nolomuhagula mukohani mono kowa mwihuwilwa kuli'ne, mono kosuma kwituma zose, nha vyono nomulajiliza yetume. Kanyhi nolomupela wana wono wowa kwitumama hali mutemi wangu muhagulwa wangu.

³⁶ Kanyhi yolowa, wo wose wa muli wanago, mono kolosigala mumi mu nyumba yako, kolokuza kuli yuyo mukohani yawe kumulomba yamupele mapesa, hamba ndigwa. Kanyhi kolomba yawikwe mu mulimo wunji wo kuwetumamila wakohani ho yatuje cinji co kulya.”