1 Samwili 19 - Luganuzi Luswanu Kuli Wanhu Wose 2002

Dawudi yakugazwa na Sawuli

¹ Hodu, Sawuli yakawa kumulonjela mwanagwe Yonazani, hamonga ne wetumami wakwe wose, nha vyono yakuhila yamuwulaje Dawudi. Ninga Yonazani u mwana wa Sawuli, yali yamwendile muno muno Dawudi.

² Holeka yakamulonjela Dawudi yakatya, “Baba yakuhila kukuwulaga. Holeka nghukunena, mitondo hakali mitondo wilanjilile. Wubite wukehundice hanhu ha cinyele, wikale kuko.

³ Nane nobita hamonga na baba ko kwi'wimbi, i hanhu hono kowa wihundice, nane noduwana na Baba i zako. Na hono mbone nghani ale nokulonjela.”

⁴ Nayo Yonazani yakamukumya muno muno Dawudi kuli Sogwe Sawuli, yakamulonjela yakutya, “Gwe mutemi, nghukunena wulece kumutendela vibi mwitumami wako Dawudi. Hambi nha yakali nakusutizya nghani hamba monga yaye. Langa mwene zose zono yetuma zali wutazi wuwaha kuli'gwe.

⁵ Hambi nha yesuza wumi wakwe lono yamuwulajila Goliyati, no Muwaha Mulungu yakawasumila Waisilayeli wusume wuwaha muno muno. Nagwe wali weza kuziwona zizo, wukasangalala muno. Alu ho nhawule kanyhi wukuhila kumunozeza zimbi u munhu mono yasina yisutya, no kusaka kumuwulaga Dawudi mbula soko?”

⁶ Ne zinghani zizo za Yonazani, zikamwinjila Sawuli muno muno mu nhumbula yakwe, hodu yakawa kwilahiza hali Muwaha Mulungu, nha vyono hodu si komuwulaga Dawudi.

⁷ Nayo Yonazani yakawa kumucema Dawudi, yakawa kumuloloseza zose, hanyuma yakawa kumutegula kuli Sawuli. Nayo Dawudi yakajendelela kanyhi kumwitumamila mutemi Sawuli cinya ha mwamulizo.

⁸ Wulugu we Wafilisiti ne Waisilayeli, wukanza kanyhi. Nayo Dawudi yakawahoma, yakawasuma, wakatiza.

⁹ Mwi'zuwa linji kanyhi, u muhe mubi wukalawa kuli Mulungu, wukamwinjila Sawuli ne vilungo. Nayo yali yekaye mu nyumba yakwe akuno yebate no mugoha mu muwoko wakwe. Nayo Dawudi yali yali baho yakutowa lisumbi lyakwe.

¹⁰ Nayo Sawuli yakawugumila mugoha wakwe yamuhome Dawudi yamubanhize ne lijinji. Ninga Dawudi yakelega, mugoha wukakoma mwi'jinji. Dawudi yakawa kutiza, yakapona.

¹¹ Na mu cilo cico, Sawuli yakawa kutuma wanhu wakayidime kaya ya Dawudi, wamuwulaje i mitondo yaco. Ninga Mikali, u mugolece wakwe yakamusugula, yakamulonjela yakatya, “Hono wulece kuwuka no kutiza mu cilo ci cino, ale wumanye vyono i mitondo kowulagwa.”

¹² Hodu Mikali yakawa kumukoza Dawudi mwi'dilisha, yakawa kumutimya hasi, nayo Dawudi yakawa kumangha, yakawa kwiponya.

¹³ Hanyuma Mikali yakawa kusola cihwani, yakawa kucilambalika mu citanda, yakawa kuwicila no muto ku mutwe we cihwani, muto munozwe no wukunzeje we mhene, hanyuma yakawa kucifunika no mwenda.

¹⁴ Nawo i wanhu wa Sawuli wali weza kuza, ho wamusole Dawudi, Mikali yakawalonjela vyono Dawudi mutamwa.

¹⁵ Ninga hamba nhavivyo, Sawuli yakawagomoleza wabite wakewonelele weneco hono mbeka Dawudi yatamigwe. Kanyhi yakawalajiliza yakawatya, “Kolo mukubita, mumudinghulaje hamonga ne citanda cakwe mumulete kono kwangu, nene no mweneco nimuwulaje.”

¹⁶ Nawo wakawa kubita, wakenjila kugati, wakawona cihwani cilambalice mu citanda mucanyha, no muto munozwe no wukunzeje we mhene, muciwize ku mitwe ye cihwani.

¹⁷ Nayo Sawuli yakawa kumuwuza Mikali, yakutya, “Alu nhawule kunghocanghoca nhavivi, kuwa kumuleka mulugu wangu yakutiza?” Nayo Mikali yakamupitula yakatya, “Dawudi yanonjela yakatya vyono kombulaga 'ne, hono ndece kumutaziliza yatize.”

¹⁸ Dawudi yakatiza, yakawa kubita kuli Samwili ku Lama, yakawa kumuloloseza zose zono Sawuli yamutendeye. Hanyuma Dawudi hamonga na Samwili, wakawa kubitana ku Nayoti, wakawa kwikala kuko.

¹⁹ Ninga Sawuli yakalonjelwa nha vyono Dawudi yali ku Nayoti ku Lama.

²⁰ Holeka Sawuli yakawa kutuma wanhu wanji, wabite wakamwibate. Ninga wali weza kufika kuko, wakawona lipuga lye wawizi wakuwila na Samwili yo mulongola wawo. Hobaho u muhe wo Mulungu wukawaziza ne vilungo i wanhu wa Sawuli, nawo wakawa kwanza kuwila.

²¹ Nayo Sawuli yali yeza kuzihulika zizo, hodu yakatuma kanyhi wanhu wanji. Ninga nawo nhavivyo wakanza kuwila. Yakatuma wanhu wanji lwe kadatu kanyhi. Ninga nawo zikawa zo zi zilya du.

²² Hanyuma nhondo yakawa kutuluka mweneco Sawuli, yakawa kubita kuko ku Lama. Nayo yali yeza kufika ha cisima ciwaha, cono cili ku Seku, yakawa kuwuza kono ko yuli Samwili na Dawudi. Nayo yakalonjelwa vyono wali ku Nayoti ku Lama.

²³ Nayo Sawuli lono yabitaga kuko, u muhe wo Mulungu wukamuziza ne vilungo, nayo yakawa kwanza kuwila nzila yose, sunga yakafika ko ku Nayoti ku Lama.

²⁴ Yakayivula myenda yakwe, yakawa yakuwila ha mwande ya Samwili akuno yali cipwi, mwi'zuwa lilyo misi yose sunga ne cilo cose sunga wukela. (Holeka wanhu walongaga wakutya, “Wule, Sawuli nayo kowa yo monga ne wawizi?”)