1 Samwili 16 - Luganuzi Luswanu Kuli Wanhu Wose 2002

Dawudi yakwitilwa mafuta, yawe Mutemi

¹ Muwaha Mulungu yakamutya Samwili, “Alu ho kojendelela kumulilila Sawuli sunga nili lo? Ane nakondya kumulema yalece kuwa mutemi we Waisilayeli. Ninga aluno, wusole mafuta, wubite ku Betelehemu, kuli munhu mono kacemwaga Yese. Hambi ne nha nakondya kumuhagula yumonga wa muli wanagwe yawe mutemi.”

² Nayo Samwili yakamuwuza Muwaha Mulungu yakatya, “Alo ane ho nosuma nhawule kuzituma zizi, vyono hono Sawuli yazihulice, kombulaga!” Ninga Muwaha Mulungu yakamupitula yakamutya, “Ale, wusole ndama wubite nayo, na kolo weza kufika kuko, wutye, kuza kumulavizya Muwaha Mulungu likumbiko.

³ Wumulalice Yese, nayo yaze baho ha wulavya likumbiko, nane nokulonjela yono koyinoza. Nagwe komwitila mafuta u munhu mono nokulonjela.”

⁴ Nayo Samwili yakazinoza zose nha vyono Muwaha Mulungu yamulonjela yetume. Yakawa kubita ku Betelehemu, nawo i walongola we likaya, wali weza kumuwona yakuza, wakawa kubita kumuhinjiliza akuno wakucicima. Wakamuwuza wakatya, “Wukuza kuli'se wina no mulamu?”

⁵ Samwili yakawatya, “Heya, ane niza kumulavizya Muwaha Mulungu likumbiko. Holeka mwiyezaje wose, munhyatye.” Kanyhi yakawa kumulonjela Yese hamonga ne wanagwe we cilume, wose weyeze. Nayo yakawa kuwalalika nawo waze kwi' kumbiko.

⁶ Nawo wali weza kuza, Samwili yakamuwona Eliyabi u mwana we cilume wa Yese, yakawa kumutya, “Ayu munhu mono yemile hali Muwaha Mulungu, ayu yo munhu mbeka mono Mulungu yamuhaguye.”

⁷ Ninga Muwaha Mulungu yakamutya, “Gwe Samwili, wulece kulanga wutali wakwe no wuswanu wakwe we mumbwa. Ane namulema, hambi ane nha si nghulanga nha vyono wanhu walangaga. Hambi munhu nha kalangaga za kunze du yo muwili, ninga ane nangaga nhumbula.”

⁸ Hanyuma Yese yakamuleta u mwanagwe Abinadabu kuli Samwili. Ninga Samwili yakatya, “Aa! Ng'o! Ayu Muwaha Mulungu si yamuhaguye yaye.”

⁹ Yese yakamuleta Shama. Samwili yakatya, “Na yuyu nayo Muwaha Mulungu si yamuhaguye yaye.”

¹⁰ Yese yakawakoza mu nzila yiyo wanagwe wose vyono wali mupunghati, hali Samwili. Nayo Samwili yakatya, “Muwaha Mulungu si yahaguye hamba monga wa muli wawa wose.”

¹¹ Hanyuma Samwili yakamuwuza Yese yakatya, “Alu wusina kanyhi wana wanji wa cilume?” Nayo Yese yakapitula yakatya, “Alu yasigaye mwana we cilume monga du u mwanakwawawo mudodo. Ninga nayo aluno yali kwidimo, yakudima ngholo.” Samwili yakamutya Yese, “Ale, wumulonjelaje yaze kuno. Nase si colavya likumbiko sunga yawe nayo yali bahano.”

¹² Baho Yese yakawa kutuma munhu yabite yakamulete. Nayo yali mwelu, yena meso maswanu na futa yono yikwendeza, kanyhi muzelelo we vilungo. Muwaha Mulungu yakamutya Samwili, “Ale, ayu yo nimuhaguye, mwitile mafuta!”

¹³ Samwili yakawa kusola mafuta yakawa kumwitila Dawudi, ha meso ge wanduguze. Ho baho baho u Muhe wo Muwaha Mulungu wukamuziza Dawudi, no Muhe yuyo vikawezana na Dawudi ku wulawa mwizuwa lilyo. Nayo Samwili yakawa kuwuya ku Lama.

Witumami wa Dawudi mu nyumba ya Sawuli

¹⁴ U Muhe wo Muwaha Mulungu wukawa kuwuka muli Sawuli. Ninga u muhe mubi wukalawa kuli Muwaha Mulungu wukamwinjila Sawuli.

¹⁵ I wetumami wakwe wakamulonjela wakatya, “Ase cimanyile vyono muhe mubi wulawa kuli Muwaha Mulungu wuwa kukwinjila.

¹⁶ Holeka wucikombole cibite cikulondolele munhu mono yamanyile muno kutowa lisumbi. Vyono hono wuwo muhe mubi wuwe wakuziza, ale mwene kotowa lisumbi lyakwe nagwe kopona.”

¹⁷ Nayo Sawuli yakawakombola wabite, yakawatya “Ninga munondolelaje munhu mono mbeka yamanyile muno kutowa lisumbi, mundetele.”

¹⁸ Na yumonga wa muli wetumami wakwe yakatya, “Munhu yunji mono yakucemwa Yese, mono yekaye mwi'kaya lya Betelehemu, yena mwanagwe we cilume, mono yamanyile muno muno kutowa lisumbi. Kanyhi citung'ati, na muhidimbazi mu milewo, kanyhi yo munhu mono yamemile nonga ye mahala, kanyhi yena futa yono yikwendeza, no Muwaha Mulungu yali hamonga nayo.”

¹⁹ Ale, Sawuli yakawa kutuma munhu kuli Yese, yabite yakamulonjele yatye, “Nghukulomba wumukombole mwanago we cilume Dawudi, yu yulya mono kadimaga zingholo yaze kono kwangu.”

²⁰ Nayo Yese yakawa kumukombola Dawudi yabite kuli Sawuli. Ninga yakamupela hamonga na nyana ye mhene monga, hamonga ne ndogowe yono yali yidinghuye mukate, hamonga no mufuko wa nyhingo wumemile divayi.

²¹ Ale, nayo Dawudi yakawa kuza kuli Sawuli, yakawa kwanza kumwitumamila. Nayo Sawuli yakamwenda muno muno, sunga yakawa kumuhagula yawe yo mudinghula vitwalo vyakwe.

²² Hanyuma, Sawuli yakatuma munhu kuli Yese yakamutya, “Ane namwenda muno muno Dawudi. Holeka nghukulomba wumulece yajendelele kunyitumamila.”

²³ Na ku wulawa mwizuwa lilyo, mu mapango go gose lono muhe mubi wono walawaga kuli Mulungu wukumuziza Sawuli, nayo Dawudi yasolaga lisumbi lyakwe kawa kulitowa. Nayo muhe mubi wuwa kuwuka, na Sawuli kawa kupona kanyhi.