1 Samwili 12 - Luganuzi Luswanu Kuli Wanhu Wose 2002

Samwili yakuwaloloseza wanhu

¹ Hanyuma Samwili yakawa kuwalonjela Waisilayeli yakatya, “Ane nakondya kwituma zose zono mukasaka nimutendelenyi. Nakondya kumupelenyi mutemi mono komutemenyi.

² Sunga nalu mwina nayo yamutonjenyi. Ninga ane nakombipa natuga ne zimvwi, ne wanangu we cilume wali muli nyenye. Nane nali nili mulamuzi wenyu ku wulawa wuzelelo wangu sunga nalu.

³ Alu, ane yone. Nghusaka munonjele hono yiwe namunozezenyi zimbi, ale muhomelele zuwali hali Muwaha Mulungu, hamonga no mutemi mono yamuhaguye. Hono niwe nasola ng'ombe ya munhu, hamba ndogowe yakwe? Hamba hono niwe namusolela yunji cinhu cakwe ko wusugu, hamba lunji namwiwonela yunji? Hamba lunji nabocela mafupo kuli yunji wa muli'nye? Na hono niwe netuma limonga lya muli makani gaga, ale nane nohaliza muli cinhu co cose cono nacisola.”

⁴ Nawo wanhu wakapitula wakatya, “Ng'o ye, hamba si wacisolela cinji ko wusugu, hamba si waciwonela yaye, hamba si wasola cinhu cinji co cose kuli yunji wo wose.”

⁵ Samwili nayo yakawapitula yakatya, “Ale, u Muwaha Mulungu hamonga no mutemi mono yamuhaguye, wo wahomelezi izuwali, lono mukuhomelela vyono ane nili mutelevu sina lisutya lyo lyose muli zizo.” Nawo wakatya, “Heya mbeka, Muwaha Mulungu yo muhomelezi wetu.”

⁶ Samwili yakajendelela yakatya, “Muwaha Mulungu yo yawahagula Musa na Haluni, kanyhi yo yawawusa walezi wenyu ku yisi ya Misili.

⁷ Ale, 'lu mwime, nimulonjelenyi hali Muwaha Mulungu, nimukumbucizenyi ze metumo mawaha gono Muwaha Mulungu yetuma, ho yamuponyenyi nyenye, hamonga ne walezi wenyu.

⁸ “Yakobo hamonga ne mhuga yakwe wali weza kubita ku Misili, i Wamisili wakawewonela muno. Walezi wenyu wakamulilila Muwaha Mulungu yawataze, nayo Muwaha Mulungu yakawa kuwatuma Musa na Haluni, wakawawusa ku Misili, wakawawika mu yisi yiyi.

⁹ Ninga wanhu wakamusemwa Muwaha Mulungu, u Mulungu wawo, holeka nayo Muwaha Mulungu yakawaleka Wafilisiti, hamonga no mutemi wa Mowabu na Sisela, u muwaha we wasilikale we likaya lya Hazoli, wakawahoma walezi wenyu wakawasuma.

¹⁰ Nawo wakamulilila Muwaha Mulungu yawataze, wakatya, ‘Gwe go Muwaha Mulungu, ase cikusutizya, vyono cikulecile go Muwaha Mulungu wetu, ciwa kuhemba i vihwani viseswe vye Mabaali na Maashitaloti. Holeka cikukulomba wuciponye mu miwoko ye walugu wetu, nase cokuhemba gwegwe du wuli wene!’

¹¹ Nayo Muwaha Mulungu, yakawa kuwatumila Gidiyoni na Balaka na Yefuta. Na hanyuma ho yakawa kunhuma nene. Nase wose, cetuma mulimo wo kumuponyenyi nyenye, mu wulawa mu walugu wenyu, nanye mukekala mupolile.

¹² Ninga mwali mweza kuwona vyono mutemi Nahashi wa Amoni yakuhila kumuhomenyi, hodu nanye mukawa kumulema Muwaha Mulungu, u mutemi wenyu. Mukawa kunonjela vyono, ‘Ase cikuhila cituje mutemi mono kocitema.’

¹³ “Mukalomba mupegwe mutemi, alu ayu yo mutemi mono mwalomba, mono Muwaha Mulungu yakondya kumupelenyi.

¹⁴ Ne zenyu zose, zowa swanu, hono mumogope du Muwaha Mulungu, u Mulungu wenyu, mumwitumamile, mumuhulice, kanyhi mugebate ne malajilizo gakwe, no kumutyatya, nyenye, hamonga no mutemi wenyu.

¹⁵ Ninga hono mulece kumuhulika Muwaha Mulungu wenyu, kanyhi mulece no kugebata malajilizo gakwe, nayo si komuvumilenyi yaye, hamonga no mutemi wenyu.

¹⁶ Holeka lu, mwime, nanye moziwona zimbaha zono Muwaha Mulungu kokwituma.

¹⁷ Aluno cili mwipango lye cibahu, ninga ane nolomba, nayo Muwaha Mulungu koleta mabalalusi hamonga ne mvula. Na zizi kolo zeza kwijela, nanye ho momanya vyono mumutendela wubi Muwaha Mulungu, vyono mwasaka mutuje mutemi.”

¹⁸ Ale, Samwili yakawa kulomba, na mwi'zuwa lilyo du, Muwaha Mulungu yakawa kuleta mabalalusi hamonga ne mvula. Sunga ne wanhu wose wakenjilwa no woga, wakamogopa Muwaha Mulungu, hamonga na Samwili.

¹⁹ Nawo wakamulonjela Samwili, wakatya, “Gwe Samwili, dedede, wumulombe Muwaha Mulungu, u Mulungu wako, ase cilece kufwa. Alu langa ho cakondya kumanya vyono, hamonga no wubi wose wono cetuma, ninga wubi wuwaha wono cetuma, vyono casaka cipegwe mutemi.”

²⁰ Nayo Samwili yakawatya, “Ng'o ye, hamba muwe mwetuma wubi wono winha wuwo, ninga mulece kumuleka Muwaha Mulungu, langa mumwitumamile kwe zinhumbula zenyu zose.

²¹ Mulecele lukulu kuyityatya milungu yo wulambi, hambi nha yisina wutazi wo wose, hamba si yosuma kumuponyenyi yaye, hambi nha si milungu ye mbeka.

²² Ninga Muwaha Mulungu, yanoza cilagane nanye, holeka sikosuma kumulecenyi yaye. Hambi nha yelahiza vyono komunozenyi anye, muwe muli wanhu wakwe.

²³ Ninga ane ku lubavu lwangu, nghulomba ndece kumusutizya Muwaha Mulungu so wuleka kumulombelenyi. Ninga nomwijizenyi ziswanu zose na ze ling'ani, zono ziwanojeye mwitume.

²⁴ Holeka mumuhulice Muwaha Mulungu, kanyhi mumwitumamile ko wihuwilwa kwe zinhumbula zenyu zose. Akuno mukukumbucila zimbaha zono mwene yamutendelenyi.

²⁵ Ninga du langa, hono mujendelele kwituma wubi, ale, nyenye hamonga no mutemi wenyu, wose mokongomezwa.”