1 Samwili 11 - Luganuzi Luswanu Kuli Wanhu Wose 2002

Sawuli yakuwasuma Waamoni

¹ Wali weza kupuluta mwezi monga, mutemi Nahashi we Waamoni, yakawa kutegula lipuga lye wasilikale wakwe, ho wakalihome likaya lya Yabeshi mu yisi ya Gileyadi, wakalipilima likaya. Nawo i wanhu wa Yabeshi, wakamulonjela Nahashi wakatya, “Ale cinoze mulamu nagwe, nase cokuvumila wuwe mutemi wetu.”

² Nahashi nayo yakatya, “Ane nonoza mulamu nanye, ninga sunga camule cilumbanize nghani monga nayo yoyi, Ane nomukopozolenyi anye wose, munhu liso limonga lyo kulume, na mu nzila yiyo ho nimuletelenyi cevu Waisilayeli wose.”

³ Nawo walongola wa Yabeshi wakatya, “Ale, alu, wucipelaje cilejeho ca vilo mupunghati, ho cisume kuwalonjela wayetu wose mu yisi yose ya Isilayeli. Na hono halece kwijela munhu mono kosuma kucitaza, ale hodu, columba i zako.”

⁴ Nawo wanhu wono watumwa, wakabita ku Gibeya kuli Sawuli, wali weza kumulonjela zizo, hodu wanhu wakawa kwanza kulila, wakawa wasina witumbilo.

⁵ Nayo Sawuli mwi'pango lilyo, yawuyaga yakulawa ku mugunda, yena ne zing'ombe zakwe zo kulimila. Yakawawuza yakatya, “Alo kocilici? Alu nhawulenyi wose mukulila?” Nawo wakawa kumulonjela zono walonjile i wanhu wono watumwa ku wulawa ku Yabeshi.

⁶ Nayo Sawuli yali yeza kuzihulika zizo, Muhe wo Muwaha Mulungu wukamuziza ne vilungo, yakakolwa ne likuwo muno.

⁷ Yakawa kuzisola nghongolo nyejete, yakazitemasha, yakawa kutuma wanhu wasole zimhonje ze zinyama, wazitegule mu yisi yose ye Waisilayeli, akuno wawe kuwasugula wanhu wakutya, “Munhu wo wose mono si komutyatya Sawuli na Samwili ku wulugu, munhu yuyo nghongolo zakwe zotemashwa nhavivi!” Nawo wanhu wa Isilayeli, wakogopa muno kuli zono Muwaha Mulungu kokwituma. Holeka wanhu wose wakalawila lwa kamonga.

⁸ Sawuli yakawakongholela ha Bezeki wose hamonga. Nawo wali waficile wanhu elufu magana madatu wono walawilila mu wanhu wa Isilayeli. Na wanji elufu makumi madatu, wono walawilila mu wanhu wa Yuda.

⁹ Wakawa kuwalonjela i wanhu wono watumwa ku wulawa Yabeshi, wakawatya, “Ale mubite mukawalonjele wanhu wenyu, vyono i mitondo du, lono lizuwa likali nafika mu misi, wowa wakondya kukombozwa.” Nawo wanhu wa ku Yabeshi wali weza kulonjelwa zizo, wakasangalala muno muno.

¹⁰ Wakamulonjela Nahashi wakatya, “Ale, i mitondo cokwilavya kuli'gwe, nagwe kocitendela nha vyono kowa wendile du gwegwe.”

¹¹ Na mu cilo cico Sawuli yakawa kuwatemanula wanhu wakwe vipuga vidatu. Wali weza kwela hakali mitondo muno muno, wakawa kuyihungucila nghambi ye walugu, wakawahoma Waamoni wakawasuma. Ne lizuwa lono lyali likali nawa mu misi mugati, wali wakondya kuwawulaganga Waamoni wenji. Na wono wasigala, awo wakatiza, wakeyagala ako na ako, munhu na lwakwe.

¹² Hanyuma i Waisilayeli, wakamulonjela Samwili wakatya, “Alu wali hayi wanhu wono wali kutya, si wakumusaka Sawuli yaciteme? Wuwalondole wuwalete kuno, ciwawulaje!”

¹³ Ninga Sawuli yakawatya, “Ng'o ye! Hasina munhu wo wose mono kanyhi kowulagwa izuwali, hambi lizuwa lye zuwali, nha lyo lizuwa lyono Muwaha Mulungu kawaponya wanhu wa Isilayeli.”

¹⁴ Nayo Samwili yakawalonjela yakatya, “Alenyi le wose cibite ku Giligali, cikamukangaze kanyhi Sawuli vyono yo mutemi wetu.”

¹⁵ Wakawa kubita ku Giligali, wakawa kumukangaza Sawuli vyono yo mutemi. Wakawulaga makumbiko ge vilavywa vyo mulamu hali Muwaha Mulungu. Nayo Sawuli hamonga ne wanhu wose wa Isilayeli, wakasangalala muno muno.