Romai 7 - Lek Jot de Jecu Kritho 1940

¹ Ka yaka kuc, mɛɛthcie (an ye jam wɔne kɔc nyic loŋ), lan ye loŋ naŋ riɛr enɔŋ raan ne akol yen ke piir?

² Tiŋ nɔŋ moc ee ya muɔk moc ne loŋ ne akolkeek ke piir, ku na ci moc thou, e kee lony ne loŋ de mocic.

³ Yen, ku na ŋoot moc ke piir, ku kɔɔr mony dɛ, e kaye cɔɔl abal: ku na ci moc ci thou, e kee nom ya pal ne loŋ, e kace beer ya abal, te ciɛk en jal lɔ ke ran dɛ.

⁴ Yen week, watmɛthcie, we we ci cɔk thou eya ne loŋ ne guɔp de Kritho; bak ya mat wene ran dɛ, ye yen man ci jɔt ne thouic, buk ya luɔk enɔŋ Nhialic.

⁵ Ɣɔn ye wɔ cath ne ka ke guɔp yic, go leeth de rɛɛc, ke ye tɔ ne loŋ, go ya lui ne wɔgup buk ya luɔk enɔŋ thou.

⁶ Yen wɔ ci jal lony ne loŋic emane, ku wɔ ci thou enɔŋ ke ye wɔ muk; a wɔ ye jal lui ne tiɛp jotic, ke cie waragaŋ thɛɛric.

⁷ Buk ŋo jal ya luel? Ye loŋ ye rɛɛc? Acie yen. Te ciɛk en ya yic ke ɣan kuc rɛɛc, te cen ber ya loŋ: an e ɣan kuc wek, te e kene loŋ ye luel, Ye duɔne ye wak.

⁸ Go rɛɛc, ne keden ci yok, go cok ke wek kedhia taau ne ɣapiɔu ne yeloŋe: rɛɛc ee thou te yen ciɛn loŋ.

⁹ Ku an e ci kan ya ceŋ te cin loŋ, ana ye loŋ ye bii, ke rɛɛc beer rɔt jɔt, a guɔ thou.

¹⁰ Ku loŋ e ye ke de piir, ee ca yok ne ye ke de thou:

¹¹ ne kee cii rɛɛc, ne keden ci yok, ɣa dhoom ne loŋ, ku nɛk en an.

¹² Yen loŋ ee lajik, ku lɔ cok ke loŋ jik, ku lek cap, ku piɛth.

¹³ Ci ke ye kepiath ci rɔt jal wɛl ɣa ke ye thou? Acie yen. Rɛɛc ee thou yiɛn ɣɛn ne piath, ben rɔt ya nyuɔɔth ke ye rɛɛc: bi rɛɛc bi ya ya gok de rɛɛc ne loŋ.

¹⁴ Ayuku nyic ke loŋ ye ya ke de wei: ku an ye raan, ya ke ci ɣɔc rɛɛc.

¹⁵ Ke ya loi aya kuc, ke ete caa ye loi, yeneka ya loi; ku ke ya maan, yeneka ya biɔth.

¹⁶ Ku na ya ke ete caa ye loi loi, ke an ye loŋ gam ya piɛth.

¹⁷ Yen ace beer ya ɣan e ye ye loi, ee ya rɛɛc man ceŋ ɣaic.

¹⁸ Anyiɛc ke ɣan ye ciɛn kepiɛth ye ɣa ceŋic, ee guɔpdieic yene luel: an ye naŋ piɔu, ku kee luɔi piath yenekee liu.

¹⁹ Kepiɛth ete ya loi acaa ye loi: ku rɛɛc ete caa ye loi, yeneka ya loi.

²⁰ Ku na ya ke ete caa ye loi loi, e kace beer ya ɣan e ye ye loi, e kee ya rɛɛc man ye ɣa ceŋic.

²¹ Yen loŋ aca jal yok, ke rɛɛc ye ɣa tiit, ɣan man ete ya kepiath loi.

²² Ɣan ye piɔu lɔyum ne loŋ de Nhialicic ne baŋthin:

²³ ku loŋ peei dɛ aya ŋem ne ɣaguɔp, ne ye ɣeet kene loŋ de tɛŋdie, ku ye ɣa mac ne loŋ de rɛɛcic ye tɔ ne ɣaguɔp.

²⁴ Anda ran ci nyin rɛɛc cɔl ɣɛn! ŋa bi ɣa jɔt bei ne yethoneic?

²⁵ Ɣan ye Nhialic leec ne Yecu Kritho Bɛnydiitda. Yen ɣen ne guɔpdie loŋ de Nhialic aya loi ne tɛk; ku luɔi loŋ de rɛɛc ne guɔp.