Romai 5 - Lek Jot de Jecu Kritho 1940

¹ Yen na ci wɔ jal ya cɔk lajik ne gam, ke ne wɔ ye naŋ dɔɔr wɔne Nhialic ne Bɛnydiitda Yecu Kritho;

² yen man ci wɔ liɛp kuer ne gam buk lɔ athiɛiic, athiɛi ye wɔ kɔɔc thin; ku ne wɔ ye piɔth miɛt ne ŋath de nuɔm de Nhialic.

³ Ku kacie yen yetok, ne wɔ ye piɔth miɛt eya ne ka ye wɔ dhal, ne ke ye wɔ ka ye wɔ dhal nyic e kee ye piɔn lir bɛi;

⁴ ku bii piɔn lir kɔɔc lɔcap ne themic, ku themic ne ŋath:

⁵ ku ci ŋath ye yicliɛr; ne ke cii Jɔŋdiit Lajik, man e ci yiɛn wɔɔk, cen nhiɛr de Nhialic tɛk ne wɔpiɔth.

⁶ Waar ŋoot wɔ ke wɔ niɔp, go Kritho jal guɔ thou ne kolde ne kɔc rac.

⁷ Raan ee duɔr ciɛk thou ne ke de ran lajik: ku ke de ran piath abii raan thou yen ya ŋɛɛny.

⁸ Ku Nhialic ee nhiɛrde nyuɔth wɔɔk, ne thon cii Kritho thou ne wɔɔk ke wɔ ŋoot ke wɔ rac.

⁹ Na ci wɔ jal cɔk lajik ne riɛmde, ke wɔ bi ya luɔk ne ɣok de Nhialicic ne awaiyic ne yen.

¹⁰ Na ci wɔ maat wɔne Nhialic, waar ŋoot wɔ ye wɔ kɔc ke ater, ne thon de Wende, ke wɔɔk, wɔ kɔc ci jal maat, wɔ bi luɔk ne piirde;

¹¹ ku kacie yen yetok, wɔ ye piɔth miɛt eya ne Nhialicic ne Bɛnydiitda Yecu Kritho, yen man ci wɔ naŋ mɛt.

¹² Yen, rɛɛc ee bɔ ne piny nom ne ran tok, ku bɔ thou ne rɛɛc, a go thou raan ebɛn cooth, ne ke cik kek rɛɛc loi kedhia:

¹³ rɛɛc ee tɔ ne tiɔp nom aŋoot loŋ wei: ku rɛɛc acie kueen te cin en loŋ.

¹⁴ Thou ee tɔ ne riɛr ɣɔn ne Adam alɔ Mothe gut, ee ya tɔ ne kɔc nhiim kɔc ken rɛɛc ya loi ci man de awany de Adam, ran e ye cin de nyooth de toŋ e bi bɛn.

¹⁵ Ku miɔc nyin acie ciɛt rɛɛc. Na ci kɔc juec cik thou ne rɛɛc de ran tok, ke athiɛi de Nhialic, ku miɔc ci bɛn ne athiɛi de ran tok, Yecu Kritho, ee dit enɔŋ juaac.

¹⁶ Ku miɔc acie ciɛt luɔi de ran toŋ ci rɛɛc loi: luŋ de toŋ e ci rɛɛc ee jal ya ya lukwei, ku miɔc nyin ee rɔt cɔk ye lajik ne karɛc kuɔt.

¹⁷ Na ci rɛɛc de tok thou ya cɔk nɔŋ riɛr ne tok, ke keek, kek kɔc bi dit de athiɛi ya loom, kene miɔc de lajik, aabi tok ke ya cɔk nɔŋ riɛr de piir, toŋ ye Yecu Kritho.

¹⁸ Yen na ci rɛɛc de tok rɔt cɔk ye lukwei enɔŋ raan ebɛn, ke yenekee cɔɔk cii luɔi toŋ lajik rɔt cɔk ye lajiŋ de piir enɔŋ kɔc kedhia.

¹⁹ Na ci areecwel tok juaac cɔk rac, ke yenekee cɔɔk bene juaac ya cɔk lajik ne ran toŋ ye wel gam.

²⁰ Ku loŋ ee bɛn, bi rɛɛc ya dit; ku te ye naŋ rɛɛc dit thin, aye athiɛi thiɔŋ areet:

²¹ bi athiɛi yic ya riɛr ne lajik alɔ piir athɛɛr gut ne Yecu Kritho Bɛnydiitda, ci man ye rɛɛc naŋ riɛr ne thou.