Romai 2 - Lek Jot de Jecu Kritho 1940

¹ Yen yin ye ciɛn kuny, Yin raan, te ciɛk yin ya ŋa yin ran ye luk: na ye ran dɛ luk, ke yin ye rɔt luɔkwei; yin ye keekatooka loi, yin meluk.

² Ku kayuku nyic ke luŋ de Nhialic ye ciɛt man de yic enɔŋ kɔc ye ka yinla loi.

³ Ku ye yekene tak, Yin raan, te yin kɔc ye ka yinla loi luk, ku ye ke bɛɛr loi ci ke, ye cɔɔl wu ba ya poth ne luŋ de Nhialic?

⁴ Ka ye baany de piathde ku pɛlde ku guɔmdiitde kek ye ke tɔɔn yic, ka kuc ke piath de Nhialic ye yi ɣɔm ne wel de piɔuic?

⁵ Ku yin ye rɔt kuɛt ɣok ne kol de ɣok ku nyooth de luŋ lajik de Nhialic ne riɛr de yipiɔu piɔn ci rɔt ye wel;

⁶ Nhialic man bi ŋɛk ne raan ebɛn ya miɔc ci man de luɔide:

⁷ kɔc ye nuɔm ku rieu ku kecieluɛl kɔɔr ne piɔn liir de luɔi piath, aabi naŋ piir athɛɛr:

⁸ ku kɔc ke piɔnden, ci yic ya rɛɛc, ku yiki rɛɛc gam, aabi naŋ ɣok ku kɛc de piɔu,

⁹ ku ka ye ke dhal kene muɔn de wei, aabi ya tɔ kene raan ebɛn ran ye lui arac, ee kan ya muɔny Juda, ku jɔl ya muɔny Giriki eya:

¹⁰ ku nuɔm ku rieu ku dɔɔr aabi ya tɔ kene raan ebɛn ran ye lui apiath, ee kan ya muɔny Juda, ku jɔl ya muɔny Giriki eya:

¹¹ Nhialic aci kɔc ye kuany yic.

¹² Kɔc kedhia kɔc ci rɛɛc loi te cin loŋ aabi ya thou te cin loŋ eya: ku kɔc kedhia kɔc ci rɛɛc loi ne loŋic aabi ya luk ne loŋ;

¹³ acie ya apiiŋ ke loŋ kek ye lajik ne Nhialic nom, aaye ya kɔc ye loŋ loi keeka bike ya cɔk lajik:

¹⁴ na ye Juurkɔk, kɔc ye ciɛn loŋ, ka ke loŋ loi ne cɔɔkden, ke keek, kek kɔc ye ciɛn loŋ, aaye ya loŋ ne gupken;

¹⁵ ne ke ye kek luɔi de loŋ nyuɔɔth ne ci gɔɔr ne piɔthken yic, ku ye nyiny de piɔthken lek ne yen, ku kaaye roth guɛɛl ku konyki roth ne tɛŋden;

¹⁶ kol bii Nhialic ka monyke ke piɔth ke kɔc luk, abi ciɛt welpiɛthcie, ne Yecu Kritho.

¹⁷ Ku na ci yi ya cɔɔl ne rin ke muɔny Juda, ku ye rɔt gɛi ne loŋ, ku ye Nhialic noom,

¹⁸ ku ye piɔnde nyic, ku ye kapiath nhiar, ku ye loŋ yi piɔc,

¹⁹ ku ye rɔt nyic ke yin ye coor ɣɔm, ku ye ya ɣɛɛr de kɔc ye tɔ ne cuɔlic,

²⁰ ku ye ya medoŋ de acibeel, ku ye ya dupiony de mith, ne ke yin naŋ guɔp de nyic kene yic ne loŋic;

²¹ yen, yin ran ye ran dɛ piɔc, cii rɔt ye piɔc? yin, yin ran ye ran dɛ wɛɛt wu cii ye kual, ye kual?

²² yin, yin ran ye jaam wu ci raan ye kor, ye kor? yin ran ye eidool maan, ye luek ke duɔr kual yic?

²³ yin, yin ran ye rɔt leec ne loŋic, ye Nhialic ye yuur ne wac de loŋ?

²⁴ Rin ke Nhialic aaye lat ne Juurkɔk yic ne keduɔn, ci man cene ye gɔɔr.

²⁵ Ŋuɛlɛɛi ee cok piath, te yin ya ran ye loŋ loi: ku na ye loŋ wuɔcic, ke ŋuɛlɛɛidu ee ya aboor.

²⁶ Yen na ye aboor ka ke loŋ loi, ke boorde ci bi tak ya ye ŋuɛlɛɛi?

²⁷ ku ci aboor ne cɔɔkde, ci yi bi ya luk te yen loŋ loi, yin man ye loŋ wuɔcic ke yin nɔŋ waragak ku ye aŋuala?

²⁸ Acie ya muɔny Juda, te ciɛk en ya Juda ne biak biyic; ku kacie aŋuala, te ciɛk en ya aŋuala ne baŋ de guɔp:

²⁹ ee ya muɔny Juda, ne ke yen ya Juda ne biak thin; ku ŋuɛlɛɛi ee ya ke de piɔu ne tiɛp, ke cie waragak; acie kɔc e ye ye leec, ee ya Nhialic.