Romai 14 - Lek Jot de Jecu Kritho 1940

¹ Yaka ran ye niɔp ne gam yaka loom, ku duɔka wel ke ariir ye tɛɛr wene yen.

² Ran tok ee naŋ gam yen kaŋ cam kedhia: ku ran niɔp ee wal cam.

³ Ne ran ye cam ne ce ran cie cam ye tɔɔnic; ku ne ran cie cam ce ran ye cam ye luk: ne ke cii Nhialic ye loom.

⁴ Yeŋa yin ran ye awun de ran dɛ luk? ee bɛnyde yeneka yen kɔɔc ku yuik en. Ee yic, abi ya cɔk kaac; Bɛnydit anɔŋ rir cɔk en ye kaac.

⁵ Ran tok ee kole cɔk ŋuan ne kole, ku cɔk rane ke thoŋ kedhia. Ne ŋɛk ye cok nyic eŋui ne tɛŋde.

⁶ Ran ye akɔl week, aye wɛk Bɛnydit: ku ran ye cam, ee cam ne Bɛnydit, ne ke yen Nhialic leec; ku ran cie cam, ee ciɛk ciɛm ne Bɛnydit, ku kee Nhialic leec.

⁷ Acin ran toŋ de wɔɔk ye piir ne guɔpde, ku kacin toŋ de wɔɔk ye thou ne guɔpde.

⁸ Na yuku piir, ke wɔ ye piir ne Bɛnydit; wuu yuku thou, ke wɔ ye thou ne Bɛnydit: yen na yuku piir, ka na yuku thou, ke wɔ ye ya ka ke Bɛnydit.

⁹ Yekene yenekee thoue Kritho, ku beer piir, bi ya ya Bɛnydiit de kɔc ci thou ku kɔc piir.

¹⁰ Ku yin, yeŋo yin wanmuuth luk? yin, yeŋo yin wanmuuth piɔɔlic? wɔɔk wɔdhia wɔ bi kɔɔc ne thony de luk nom de Nhialic.

¹¹ Ci man cene ye goor, Ya Bɛnydit ajam, Ye ci man yan piir, raan ebɛn abi enhial ya tuɔk a, Ku thook kedhia aabi Nhialic ya gam.

¹² Yen raan ebɛn de wɔɔk abi luɔide ciɛr Nhialic.

¹³ Dukku roth ye bɛɛr luk: kene yene yaka dhiil ne luk, wuɔ ne ye ciɛn ran ye ke yene kɔth kan dhol de manhe, ka ke de yuik.

¹⁴ Aya nyic, aya cok ne nyic ne Bɛnydit Yecu Krithoic, ke cin ke ye cuɔl ne rɔt: ee cuɔl enɔŋ yen yetok ye ran ye e luel ye col.

¹⁵ Na ca wanmuuth cɔk dhiau piɔu ne ke de riiŋ, ke yin cie bɛɛr cath ne nhiɛr. Duɔne raan ye riɔk ne riiŋdu ran cii Kritho thou.

¹⁶ Nɛke piathdu cie luum:

¹⁷ ne ke cii ceŋ de Nhialic ye ya ke cam ku ke dek, ee ya lajik ku ye dɔɔr ku ye yum de piɔu ne Jɔŋdiit Lajikic.

¹⁸ Ran ye Kritho luɔi ne keekake ee Nhialic ya yuum piɔu, ku ye lɛc nom ne raan ebɛn.

¹⁹ Yen yuku ka ye dɔɔr bɛi yukuke biɔɔth, ku ka bii wɔ ke roth ya yiɛk nhial.

²⁰ Duɔka luɔi de Nhialic ye riɔk ne ke de riiŋ. Keriɛc ebɛn ee lɔcar; ku kee ya rɛɛc enɔŋ ran ye ye kuɔc cam.

²¹ Apiath bi riiŋ cuɔk ye cuet, ku ci piukeabiɛi ye dek, ku ci ke dɛ ye loi ke bi wanmuuth cɔk kɔth.

²² Ye gam yin gam, ye cɔk dhiac ne yiyic ne Nhialic nom. Raan ee piɔu lɔyum ran ci rɔt ye luɔkwei ne ke ye loi.

²³ Ku ran ye cam ne adiɛɛr aye luɔkwei, ne ke cen ye cam ne ke de gam, ku ke cie ya ke de gam ee ya rɛɛc.