Romai 10 - Lek Jot de Jecu Kritho 1940

¹ Mɛɛthcie, ee tɔ ne ɣapiɔu ku ya Nhialic lɔŋ ne keek, bi ke ya luɔk.

² Ɣan ye lek ne keek, ya kaaye kok ne Nhialic, ku kacie ciɛt ke de nyic.

³ Ke ye kek lajiŋ de Nhialic kuc, ku yiki keden ŋaar tueŋ, ee kee ken kek roth cuɔi ne lajiŋ de Nhialicic.

⁴ Kritho yenekee ya guut de loŋ agut lajik enɔŋ raan ebɛn ran ye gam.

⁵ Mothe ee gɛr ye ran ye lajik loi, lajiŋ de loŋ, aben ya piir.

⁶ Ku jam lajiŋ de gam yela, Ye duk ye luel ne yipiɔu, Wu yeŋa bi lɔ nhial? (ee bi Kritho lɔ bɛi piny:)

⁷ ka, Wu yeŋa bi lɔ tethuth? (ee bi Kritho lɔ bɛi nhial ne thouic.)

⁸ Luel yede? Wɛt athiak kene yin, atɔ ne yithok, ku ne yipiɔu: ee wɛt de gam, man ye wɔ weet.

⁹ Na ye gam ne yithok ke Yecu ye Bɛnydit, ku gam ne yipiɔu ke cii Nhialic cɔk jɔt rɔt ne thouic, ke yin bi luɔk.

¹⁰ Raan ee gam ne yepiɔu a go lajik yok; ku gam de yethok ayen luak yok.

¹¹ Kecigɔɔr ee jam, Ye raan ebɛn ran ye ye gam ace yic bi ya liɛr.

¹² Judai ku Girikii aace yic tek: ne ke ye Bɛnydit ya Bɛnydiit de keriɛc ebɛn, ku ye ya acibany enɔŋ kɔc ye ye cɔɔl kedhia.

¹³ Raan ebɛn ran ye rin ke Bɛnydit cɔɔl abi luɔk.

¹⁴ Bik jal ya cɔɔl yiide ye yen man kenki gam? ku bik ya gam yiide ye yen man kenki piŋ? Ku bik ya piŋ yiide te cin duweet?

¹⁵ ku bik ya weet yiide te kene ke tooc? acit man cene ye gɔɔr, Ya anda piath de cokken kek kɔc ye weet ne welpiɛth ke dɔɔr! ku yeki thoŋ piɛth lɔyum de kapiath bɛi!

¹⁶ Ku keek kedhia aaken piŋ ne welpiath. Ne kee cii Yithaya ye luel, Ye Bɛnydit, ŋa ci lekda gam?

¹⁷ Yen gam ee bɛn ne piŋ, ku piŋ ne wɛt de Kritho.

¹⁸ Ku kaya luel, Ya ne kenki ya piŋ? Ee yic, necok, Rorden ee ci ɣet ne piny nom ebɛn, Ku ɣet welken ne piny thar agut.

¹⁹ Ku kaya luel, Ya ne kuc Yithrael? Mothe ee ci kan jam, Ye yin ba cuɔth piɔu tiɛl ne jur cie jur, Ku cak yi ɣok ne jur cin adot.

²⁰ Ku Yithaya ee ran ŋɛny, jiɛm, Ye ɣan ee yok ne kɔc ekee ken ɣa ya kɔɔr; Ku nyuthe ɣa kɔc ekee ken an ya thiec.

²¹ Ku Yithrael ee cen jam, Ye an ye acin cool ne thiu kɔc areecwel ku medhuum.