Pilipoi 4 - Lek Jot de Jecu Kritho 1940

¹ Yen, mɛɛthciek nhiar keek, ku yake ŋaŋ, we kɔc ye ɣa yuum piɔu ku yaka goldie, yaka kɔɔc ecap ne Bɛnyditic wuɔla, kɔc nhiar keek.

² Ɣan ye Ewodia yɔɔk, ku yɔɔk Thuntuke, ya bik piɔth ya thoŋ ne Bɛnyditic.

³ Ee yic, ku yin laŋ eya, yin ran yic mɛt wene ɣɛn, ya kony keediarka, aa lui kene an ne welpiath yic, kene Keleme eya, ku kɔc kɔk ye lui kene an, keek kek kɔc ceneke rinken gɔɔr ne kitam de piiric.

⁴ Yaka wepiɔth cɔk lɔyum ne Bɛnydit ne nyindhia; ku we bɛɛr ke yɔɔk, Ya yaka wepiɔth cɔk lɔyum.

⁵ Ne luɔi wɛɛŋduɔn ye nyic ne raan ebɛn. Bɛnydit ee thiɔk.

⁶ Duɔka ye leeth ne ke dɛ; ne ka yakake kɔɔr ne ke ye nyic ne Nhialic ne lɔŋ ku lim kene lɛc.

⁷ Ku dɔɔr de Nhialic, war raan ebɛn ne nyic, abi we ya muk piɔth ku muk wenhiim ne Yecu Krithoic.

⁸ Keciɛn, mɛɛthcie, keriɛc ebɛn ye ya yic, keriɛc ebɛn ye ya rieu ku leecap, keriɛc ebɛn ye lɔcar, keriɛc ebɛn yene kok, keriɛc ebɛn ye ya ke de thoŋ piath; na ye naŋ piath, ka na ye naŋ lɛc, ke keekake kek yaka ke tak.

⁹ Ka cii we ke pioc ku lɔmeke, ku cak ke piŋ ku ŋɛmeke ne ɣayic, kek yakake loi: ku Nhialiny de dɔɔr abi ya tɔ kene week.

¹⁰ Ku an ye piɔu lɔyum areet ne Bɛnyditic, ne ke cii we taŋduɔn bɛɛr gɔɔc ne ɣɛn; ee yic, we we ci ɣɛn ya tak, ku ye ciɛn te leu we diɛɛr ne ɣɛn.

¹¹ Ku kacie ŋɔɔŋdie yene jaam ɣan: an ci pioc, a na cak ceŋdie ya yende, ke kee ke de ɣapiɔu ebɛn.

¹² Ɣan nyic ŋɔɔŋ, ku an nyic kuɛth eya: keriɛc ebɛn acan pioc, piɔc ne thiaŋ ku cɔk, ku ne kuɛth ku dak.

¹³ Ɣan leu keriɛc ebɛn ne luɔi ne yeyic yen man yan riɛr ne yen.

¹⁴ Ee yic, acak nyiɛc loi, ne man ci we mat wene ɣɛn ne dhiendien de ɣapiɔu.

¹⁵ Ku kanyiɛcka ne gupkuɔn, we Pilipoi, ne gol e gal ɣan welpiath, ɣɔn jal an ne Makedonia, ke ne cin kanitha ci mat kene ɣɛn ne ke de miɔc ku lɔm, a kaakee ye week wepɛc;

¹⁶ ku bɛɛrka ɣa tuɔc ke dak naarou ke ɣan tɔ ne Thethalonike.

¹⁷ Acie miɔc yene ya kɔɔr; ee bi kakuɔn ye luɔk ya cɔk kuɔt yeneka ya kɔɔr.

¹⁸ Kaŋ kedhia aatɔ kene ɣɛn, aajuec: ɣan kueth, ne ke ca loom enɔŋ Epaprodito ka eke bɔ enɔŋ week, aaye anyir mit, ku yiki koc lɔyum, mit ne Nhialic piɔu.

¹⁹ Ku Nhialinydie abi we ya thiɔŋ ne ke yaka ŋaŋ ebɛn ci man de baanyde ne nuɔm ne Yecu Krithoic.

²⁰ Eeyabi nuɔm ya tɔ kene Nhialic Awada athɛɛr wada. Amen.

²¹ Mathka raan ebɛn ran cithiei ne Yecu Kritho. Mɛɛth tɔ kene ɣɛn aaye we muɔth.

²² Kɔc cithiei kedhia aaye we muɔth, agut kɔc ke dhien de Kaithar.

²³ Eeyabi athiɛi de Yecu Kritho Bɛnydit bi ya tɔ kene tiipkuɔn.