Nyooth 3 - Lek Jot de Jecu Kritho 1940

¹ Gare malaika de kanitha tɔ ne Thardith; Wu ya keekake aaluelke ne yen yen man nɔŋ Jakdit ke Nhialic keedherou, ku kuɛl dherou: Ye luɔidu aya nyic, yin ye cɔɔl ke piir, ku yin ci thou.

² Ye tiit areet, ku ye ka ci doŋ cɔk kaac, ka eke ci thol thou; ne ke yen ciɛn luɔidun ca yok ne ci cok loi ne Nhialinydie nyin.

³ Yen ciɛte yinom ne loom cin loom ku piŋ cin piŋ; ku ye muk, ku wel yipiɔu. Yen na cii ye tiit, ke ɣan bi bɛn ci rueeny, ku yin bi thaadien de bɛn enɔŋ yin aba kuc.

⁴ Ku yin nɔŋ kɔc diaak ne Thardith kɔc ken alɛthken cool: ku kaabi ya cath kene ɣɛn e ke ɣer; ne ke ye kek piath.

⁵ Ran ye tiam abi ya piɔth yala ne alath ɣer; ku rinke aacaake bi kan cuɔth wei ne kitap de piiric, ku rinke aabake gam ne Awa nom, ku ne malaikaike nhiim.

⁶ Ran nɔŋ yith, ke ne piŋ ke lekne Jɔŋdit lek kanithaai.

⁷ Gare malaika de kanitha tɔ ne Piladelpia; Wu ya keekake aaluelke ne yen yen man lajik, ku ye ya yic, ku ye tɔ ke muktar de Dabid, yen man ye liep, ku cin ran bi e ya leu ne thiek, yen man ye thieek, ku cin ran leu e ne liep:

⁸ Ye luɔidu aya nyic (ŋem, yin ca yiɛn thoŋ ye ɣɔɔr, cin ran leu en ne thieek), ne ke nɔŋ yin riɛr thi, ku ca wɛtdie ya muk, ku kɛne rincie ya jai.

⁹ Ŋem, yin yiɛn kɔk ke amatnom de Catanic, kɔc ye jam yi yiki Judai, ku cik ber ya keek, ye ya lueth e yiki toor; ŋem, aabake cɔk bɔ bik bi ya duur piiny ne yinom, ku bik ya nyic lan can yin nhiar.

¹⁰ Ke cin wɛt de liɛr de ɣapiɔu muk, aban yin ya muk ne thaa theme yin eya, thaa bi bɛn bi piny lɔny nom ebɛn, bi kɔc them kɔc ye tiɔp ceŋ nom.

¹¹ Ɣan bi dai bɛn: kuak ke tɔ ke yin arir, bi ciɛn ran bi goldu loom.

¹² Ran bi tiam aba cɔk ye meen de luaŋ de Nhialinydie, ku cii beer kan ya lɔ biyic thin, ku rin ke Nhialinydie aabake gaar ne yekɔu, ku rin ke pan de Nhialinydie, Jeruthalem jot, man bi bɛn piny nhial enɔŋ Nhialinydie, ku gaar rin jotcie.

¹³ Ran nɔŋ yith, ke ne piŋ ke lekne Jɔŋdit lek kanithaai.

¹⁴ Gare malaika de kanitha tɔ ne Laodikia; Wu ya keekake aaluelke ne Amen, duleŋ nɔŋ adot ku ye yic, ku ye gɔc de ceŋ de Nhialic:

¹⁵ Ye luɔidu aya nyic, ke yin cuɔk leth ku cii lir: ee ya ete ye liɛr ku ye lɛth.

¹⁶ Yen ke yin muɔr ku cii ber lɛth, ku cii ber liɛr, aban yi ŋɔk bei.

¹⁷ Ne ke yin jam, Wu an ye acibany, ku ɣan ci kaŋ kut, ku kacin ke ya dak; ku kuc lan rɛɛc yin ku ye acinyin kuany, ku ye aŋaaŋ, ku ye cɔɔr ku ye acitat:

¹⁸ yen yin ciɛɛr ba jini ci leeŋ ne mac ba ya ɣɔɔc enɔŋ ɣɛn, bin ya ya acibany; ku ɣɔc alath ɣer, bin ke rɔt ya piɔth, ku bi yicliɛrdun de tat bi cuɔk ye tic, ku miok de nyin bin yinyin ya tɔc, ba ya ŋem.

¹⁹ Kɔc kedhia kɔc yake nhiar, aayake ŋuuk ku waai keek: yen ye nyin tiit ku wel yipiɔu.

²⁰ Ŋem, ɣan ye kɔɔc ɣot thok ku tɛŋ: na nɔŋ ran piŋ aror ku liep a thok, ke ɣan lɔ thin enɔŋ en, ku rɔm wɔne yen, ku rom ke ɣɛn.

²¹ Ran ye tiam, aba cɔk nyuc kene ɣɛn ne thonydie nom, ci man e can tiam eya, ku nyuɔɔc ne thony de Wurdie nom wɔne yen.

²² Ran nɔŋ yith, ke ne piŋ ke lekne Jɔŋdit lek kanithaai.