Nyooth 2 - Lek Jot de Jecu Kritho 1940

¹ Gare malaika de kanitha tɔ ne Epetho; Wu ya keekake aaluelke ne yen yen man ye kuel keedherou muk ne ciin cuecde, ku ye cath ne camadaan ke wɛnhjini ciɛl yic keedherou:

² Ye luɔidu aya nyic, ku luɔidun thiekic, ku liɛrdun de yipiɔu, ku cuɔk mandu wene kɔc rac, ku them cin kɔc ye roth cɔɔl dutuuc, ku cik ye keek, ya them, go ke yok e ke ye kɔc ke adhuɔm;

³ ku yin ye piɔu liɛr ku ca ya gum ne ke de rincie, ku kɛne dhaar.

⁴ Toŋe eka tɛɛr ɣan wɔ yin, ee ke cin nhiɛr tueŋdu puɔl.

⁵ Yen ciɛte yinom ne te e yuik yin thin, ku wel yipiɔu, ku ye luɔi tueŋ loi; kɛlke ɣan bi lɔ enɔŋ yin, ku nyaai camadandu wei tede, te cin yipiɔu beer wel.

⁶ Ku yetoŋe aca tiiŋ, ne ke yin luɔi de Nikolaitai maan, luɔi ya maan eya.

⁷ Ran nɔŋ yith, ke ne piŋ ke lekne Jɔŋdit lek kanithaai. Ran ye tiam, yenekee ran ba cɔk ye cam ne tim de piir, tim ye tɔ ne Paradeitho de Nhialicic.

⁸ Ku gare malaika de kanitha tɔ ne Thumurna; Wu ya keekake aaluelke ne tueŋ ku can, man e ci thou, ku beer piir:

⁹ Ye luɔidu aya nyic, ku ka ye yin dhal, ku ŋɔɔŋdu (ku yin ye acibany), ku lɛɛt de kɔc ye jam yi yiki Judai, ku cik ber ya ke, yiki ya amatnom de Catan.

¹⁰ Duɔne ye riɔc ne ka bake ya guum: ŋem, durieth anɔŋ piɔu cuɛt de kɔk ke week ɣon de dom, bi we ya them, ku we bi naŋ kadhal we ne nin keethiɛr. Ye naŋ adot agut thou, ku yin ba yiɛn gol de piir.

¹¹ Ran nɔŋ yith, ke ne piŋ ke lekne Jɔŋdit lek kanithaai. Ran bi ya tiam aci bi bɛɛr cɔk tok ne thon de rou.

¹² Gare malaika de kanitha tɔ ne Pergamo; Wu ya keekake aaluelke ne yen yen man muk them moth ye thok rou:

¹³ Ye luɔidu aya nyic ku te yin ceŋ thin, agut te tɔe thony de Catan thin: ku yin ye rincie muɔk adot, ku yin ken gamdie akɛne ya jai, agut ci man ɣɔn ne akol ke Antipa duleŋdie, randien nɔŋ adot, ci nɔk ne weyic, te ye Catan ceŋ.

¹⁴ Keekadiɛŋke eka tɛɛr ɣan ke wɔne yin, ne ke nɔŋ yinic kɔc kɔk ye pioc de Balaam gam, man e pioc Balak bi ke yene kɔth cuat ne mith ke Yithrael nhiim, bik ya cuet ne ka ye nak eidool, ku bik ya ya abɛɛl.

¹⁵ Ku kɔc kɔk aatɔ kene yin eya kɔc ye pioc de Nikolaitai gam.

¹⁶ Yen wel yipiɔu; kɛlke ɣan bi dai lɔ enɔŋ yin, ku ba ɣeet wɔne yin ne them de ɣathok.

¹⁷ Ran nɔŋ yith, ke ne piŋ ke lekne Jɔŋdit lek kanithaai. Ran ye tiam, yeneka ba yiɛn mana ci thian, ku kaba yiɛn kuur ɣer, ku gar rin jot ne kuur kɔu, rin cin ke bi ke nyic aye yen man ye ke loom.

¹⁸ Gare malaika de kanitha tɔ ne Thuatira; Wu ya keekake aaluel Wen de Nhialic keek, man cite nyinke liem de mac, ku cit cok melɛŋ ci gɔɔk:

¹⁹ Ye luɔidu aya nyic, ku nhiɛrdu ku gam ku luɔidu ku liɛr de yipiɔu, ku nyiɛc yin, ke luɔidun ciɛn ci luɔidun tueŋ wuɔr.

²⁰ Toŋe eka tɛɛr ɣan wɔ yin, ee ke yin Jedhebel pal ke de yepiɔu, tiŋ ye rɔt cɔɔl nebi, ku ye aluɛkcie piɔc ku ye ke dhoom, bik ya ya abɛɛl, ku yiki ka yeke nak eidool cuet.

²¹ Ku kee ca pal kol ben yepiɔu wel; go piɔu ciɛn wel de rɔt teden de bal.

²² Ŋem, aya cuat ne agenic, ku kɔc ye mat ne bal kene yen cuat ke ne dhieuic, te cik kek kepiɔth wel te de luɔide.

²³ Ku mithke aaba ya nɔk ne thuɔu; ku kabii kanitha ebɛn nyic lan yen ɣan e ye piɔth kɔɔr yic ku kathin: ku ŋɛk ne week aba ya miɔc ci man de luɔide.

²⁴ Ku week we yɔɔk keek, we raan biak tɔ ne Thuatira, ken yepioce gam wedhia, ku kuɔcka ka thuuth ke Catan, ci luɛlden; Ya anuan dɛ acaa bi kan ne weyeth.

²⁵ Yen yaka yeke ye tɔ kene weeke, yaka muɔk adot agut bɛndie.

²⁶ Ku ran ye tiam ku ran ye dhiac ne luɔidieic athɛɛr, yeneka ba yiɛn riɛr ne juɔr nom:

²⁷ ku kaabike ya dɔk ne wanweeth, ci man de tony ke mecuec ye kek roth thoor; ci loom can e loom eya enɔŋ Awa:

²⁸ ku kaba yiɛn cier de run de piny.

²⁹ Ran nɔŋ yith, ke ne piŋ ke lekne Jɔŋdit lek kanithaai.