Nyooth 18 - Lek Jot de Jecu Kritho 1940

¹ Ana ci keekake thok ka ŋem malaika dɛ ne bɔ piny nhial, ke nɔŋ riɛr gok; go piny mer nom ne nuɔmde.

² Go coot ne ror rir, jiɛm, Ye kee yuik, kee yuik yen Babulon dit, ku kee ya panom de jak rac, ku kee ya te de jaak col ebɛn, ku ye te de diɛt coot man ke.

³ Wel ebɛn ee yuik ne ke de piukeabiɛi ke ɣok de balde, ku meleek ke tiɔp nom aa mat ne balde, ku thujaar ke tiɔp nom aa bany ne riɛr de kuɛthde.

⁴ Guɔ ror dɛ piŋ nhial, ne jam, Ye baka bei, we kɔccie, baka bei ne yeyic, bak ya ciɛn mɛt wene rɛɛcde, ku bi anuaande we cuɔk yok:

⁵ rɛɛcde ee ɣeet nhial, ku Nhialic ee yenom ciɛt ne aciwuɔɔcke.

⁶ Yaka cuɔl ke ci ya gam, ku yaka bɛɛric ci man de luɔide: abiny ci liaap, ke yaka liaap naarou ne yen.

⁷ Nuɔm yen rɔt noom, ku kuɛth yen kuɛth, yaka ke thɔŋ en ne leer de wei ku dhieu: ne ke yen jam ne yepiɔu, Ye ɣan ye reer ci tiɛŋ melek, ku ɣan cie tiŋjɔɔk, ku dhieu acaa bi kɔn ŋem.

⁸ Yen anuɛnke aabi roth rɔm ne kol tok, go ya thou, ku dhieu, ku pawɛɛr; ku kabi nyuɔp piny ne mac; ne riɛr de Bɛnydit Nhialic man ci e luk.

⁹ Ku meleek ke tiɔp nom, ci ya mat ne balde, ku yiki ceŋ ne kuɛthic kene yen, aabi dhiau ku wuiki ne yen, te ŋem kek tol nyop en,

¹⁰ e ke kaac temec ne riɔc leere wei, ku yiki jam, Yi dhieu, dhieu, enɔŋ pan dit, Babulon, pan rir! Lukweidu ee bɛn ne thaa tok.

¹¹ Ku thujaar ke tiɔp nom aabi dhiau ku wuiki ne yen, ne ke de ciɛn ran ber kaken ya ɣɔɔc,

¹² kaken ke wɛnhjini, ku rial, ku kur ke weu juec, ku margaritii, ku alɛth linon lɔ nip, ku alɛth aliɛn, ku alɛth ariir, ku alɛth thith; ku tiɛm anyiɛr ebɛn, ku tɔɔny de tuuŋ akɔɔn ebɛn, ku tɔɔny ci guaŋ ne tiim piath, ku melɛŋ, ku luŋcol, ku kuur cɔl marmaro;

¹³ ku kinamomon, ku wal nyir, ku wal nyiire tol, ku miok, ku libano, ku piukeabiɛi, ku miok de olip, ku abiik lɔ nip, ku rap, ku ɣɔk, ku amɛl; ku kaken ke ajɔŋkor, ku arabiyai ke tɔŋ, ku aluɛk, ku piir de kɔc.

¹⁴ Ku ka ci luɔk ye piɔndu ke kɔɔr aa jaal enɔŋ yin, ku ka eke piath ku leki yum aa nyaai enɔŋ yin kedhia, ku kaacii kɔc ke beer kan ya yok kedhia.

¹⁵ Ku thujaar ke keekake, ka eke ci cɔk bany, aabi kɔɔc temec ne riɔc de leerweide, e ke dhiau ku wuiki:

¹⁶ jamki, Yi dhieu, dhieu, pan dit, pan e ye pioth ne alanh linon lɔ nip, ku alanh aliɛn, ku alanh thith, ku ye rɔt yuɔp ne wɛnhjini ku kur ke weu juec, ku margaritii!

¹⁷ bany diit gok ee riɔk ne thaa tok. Ku reeth ebɛn, ku kɔc ye tai ne riɛth, ku baarii, kene kɔc ye piir ne kabɛɛr kedhia, aake kaac temec,

¹⁸ ku cotki e ke daai ne tol nyop en, jamki, Yi ye pano cit yepan diite?

¹⁹ Ku potki kenhiim ne liɛt, ku dotki, ku dhiauki ku cɔlki wuɔi, jamki, Yi dhieu, dhieu, pan dit, pan e yen ee ye kɔc ke riɛth cɔk nɔŋ kaŋ ne ke de juec de weu ke! ne ke cene ye riɔk ne thaa tok.

²⁰ Lɔ piɔu yum ne yen, yin pan nhial, ku laka piɔth yum, we kɔc cithiei, ku we dutuuc, ku we nebii; Nhialic ee luŋduɔn luk enɔŋ en.

²¹ Go malaika rir go kuur cit kuur diit de guɛr go kuany, ku cuɛt bɛɛr, jiɛm, Ye yenekee cɔɔk de yuik thiekic de Babulon, pan dit, bene e cuat piny, ku kace beere kan yok.

²² Ku thoom kene madhikaai ku ka ke looc ku ka ye kooth aace beere kan piŋ yic ne yiyic; ku kacin ateet ke luɔi ebɛn, bike bɛɛr kan ya yok ne yiyic, ku kuur de guɛr ace beere kan piŋic ne yiyic;

²³ ku lamba ace nyin beer kan tic ne yiyic; ku ror de ran thiek kene nyan thiak aace beere kan piŋ ne yiyic: thujaarku kek eka eke ye bany ke tiɔp nom; ku wel ebɛn ee dhoom ne tiitdu.

²⁴ Ku riɛm de nebii kene kɔc cithiei ee ci yok ne yeyic, ku de raan ebɛn ran ci nɔk ne tiɔp nom.