Nyooth 17 - Lek Jot de Jecu Kritho 1940

¹ Go toŋ de malaikai keedherou eke nɔŋ aduuk keedherou go bɛn, ku jiɛm kene ɣɛn, yook ɣa. Ye bar eene, yin ba nyuɔth luŋ de abal diit rɛɛr ne piau nom;

² yen man cii meleek ke tiɔp nom roth mat ne baldeic, ku ci kɔc ceŋ tiɔp nom ya cɔk miɔl ne piukeabiɛikeek ke balde.

³ Go ɣa jat roor ne Jɔŋdit: guɔ tiik ŋem, ne rɛɛr ne lan thiith de ciit kɔu, lan ci thiaŋ ne rin ke lɛɛt de Nhialic, ku nɔŋ nhiim keedherou ku tuŋ keethiɛr.

⁴ Ku ci tiik pioth ne alanh alian ku thith, ku ci rɔt yuɔp ne luɔŋ ke jini ku kur ke weu juec, ku margariti, ku muk abiny de wɛnhjini ne yeciin ci thiaŋ ne karac, agut ka coolkeek ke bal,

⁵ ku ci gar nomthok rin, ya kecikum, babulon dit, man abɛɛl ku de karɛc ke tiɔp nom.

⁶ Guɔ tiik ŋem ne ci miɔl ne rim ke kɔc cithiei, ku ne rin ke duleek cike nɔk ke Yecu. Ana wen ya ŋɛm yen, ka gɛi ne gai dit.

⁷ Go malaika ɣa yɔɔk, Ye yeŋo yin gai? Yin ba lɛk kecikum de tiik, ku ke de lan ɣɛɛc en, nɔŋ nhiim keedherou ku tuŋ keethiɛr.

⁸ Yelan ca ŋeme ee tɔ, ku kaliu, ku kalɔ ke bɔ bei ne abithic, ku kalɔ ne maaric. Ku kɔc ceŋ tiɔp nom aabi gai, kɔc keneke rinken gaar ne kitap de piiric elan e gɔɔce piny, te ye kek lɛi ŋem, lan e yen tɔ, ku ci liu, ku bi tɔ.

⁹ Yetɛŋe eka nɔŋ nyiny de kaŋ. Nhiim keedherou aaye kurdit keedherou, ka ye tiik ke reer ne kenhiim:

¹⁰ ku kaaye meleek keedherou; dhiec ee yuik, ku tok atɔ, ku kene kaken guɔ bɛn; ku na bii, e kabi yuul emaath.

¹¹ Ku lan e ye tɔ, ku ci liu, ee ke de bɛt, ku kee mat ke dherou, ku kee lɔ ne maaric.

¹² Ka tuŋ keethiɛr cake ŋem aaye meleek keethiɛr, ka ken ceeŋken guɔ yok, ku kaariɛr ye kek meleek yok, kene lɛi, ne thaa tok.

¹³ Keekake aanɔŋ tɛŋ tok; ku kaaye aŋoŋden ku riɛr yiɛn lɛi.

¹⁴ Keekake aabi thɔr kene Nyɔk, ku kaabii Nyɔk ke tiam, ne ke yen Bɛnydiit de bany, ku ye Meleŋ de meleek; ku kɔc rɛɛr kene yen aabi ya tiam eya, kɔc ci cɔɔl ku cike lɔc ku yiki naŋ adot.

¹⁵ Ku yook ɣa, Ye piu cake ŋem, reer abal ke ne kenhiim, aaye juɔr, ku kaaye duut, ku kaaye wɛl, ku kaaye thook.

¹⁶ Ku keetuŋ cake ŋem keethiɛrka, ku lɛi, aabi abal ya maan, ku kabik riɔk ku cɔkki tat, ku kabik cuet, ku nyopki piny ne mac.

¹⁷ Nhialic ee tɛŋde taau ne kepiɔth bik ya loi, ku bik ya tok ne tɛŋ tok, ku yinki ceŋden lɛi, agut te cii wɛt de Nhialic tuɔm.

¹⁸ Ku tiŋ ca ŋem yenekee pan dit, pan ye meleek ke tiɔp nom dɔk.