Nyooth 16 - Lek Jot de Jecu Kritho 1940

¹ Guɔ ror dit piŋ luaak, ne yook malaikai keedherou, Ye laka, ku walka ɣok de Nhialic tɔ ne aduuk keedherou yic walka piny.

² Go ketueŋ lɔ, ku wɛl aduŋdeic piny; go ya tɔɔk nhiany ku lee cuei enɔŋ kɔc kɔc nɔŋ cin de lɛi, ku yiki kecithɔɔŋde door.

³ Go ke de rou aduŋde walic bɛɛr; go ya riɛm cit riɛm de ran ci thou, go kepiir ebɛn go thou, ka eke ceŋ bar.

⁴ Go ke de diak aduŋde walic ne ciir yic ku ne awaŋgɛk yic, goki ya riɛm.

⁵ Ku piɛŋ malaika de piau ne jam, Ye yin eka lajik, yin man ye tɔ ku ne yin ye tɔ, Yin Toŋ ye Lajik, ne ke cin e luk wula:

⁶ aake ci rim ke kɔc cithiei ku nebii kuɛɛr wei, ku riɛm eka ca yiɛn keek bik dek: ee rɔt tiiŋ ke keek.

⁷ Ku piɛŋ kan de koc ne jam, Ye kee yic, Yin Bɛnydit Nhialic, Nɔŋ Riɛr Ebɛn, luɔkku aalajik ku kaaye yith.

⁸ Go ke de ŋuan aduŋde walic ne akɔl nyin; go yiɛn nyum de kɔc ne mac.

⁹ Go kɔc go ke nyop ne alɛɛth dit: goki rin ke Nhialic laat Nhialiny nɔŋ riɛr de keeanuɛnke; ku cik kepiɔth kɔn wel bik ya noom.

¹⁰ Go ke de dhiec aduŋde walic ne thony de lɛi nom; go ceŋde cɔk col ecut; ku nyiyi keliep ne ke de tɔɔk,

¹¹ goki Nhialiny de pan nhial laat ne ke de tɔɔkden ku ɣɔntok; ku cik kepiɔth kɔn wel ne luɔiden.

¹² Go ke de dhetem aduŋde walic ciir diit cɔl Euparate; go piuke deu, bi dhol juɛr meleek ye bɛn ciɛɛn.

¹³ Ku ŋɛm jak rac keediak, ne bɔ bei ne darakon thok, ku ne lɛi thok, ku ne nebii ke adhuɔɔm thook, e kee cit agueek:

¹⁴ aaye tip ke jak rac, ye ciit loi; ka ye lɔ enɔŋ meleek ke tiɔp nom ebɛn, bik ke lɔ kuɔt yic bik thɔr ne tɔŋ de kol diit de Nhialic, Nɔŋ Riɛr Ebɛn.

¹⁵ (Ŋɛmka, ɣan ye bɛn ci rueeny. Raan ee thiei ran ye tiit, ku ye alɛthke muk, kɛlke bi tat, ku bi yicliɛrde ŋem.)

¹⁶ Goki ke kuɔt tetok te cɔl Armagedon ne thoŋ de Eberu.

¹⁷ Go ke de dherou aduŋde walic ne kaam nhial ke ke piny; go ror dit go bɛn bei luaak, te de thooc, jiɛm, Ye kee jal loi:

¹⁸ ku nɔŋ yuil, ku rot, ku mar e deŋ; ku nɔŋ aluɛkluɛk dit, ke e ken kan bɛn ɣɔn ceŋe kɔc piny nom, aluɛkluɛk diit lɔwai, ke rir etor.

¹⁹ Go pan dit go yic puɔk ne diak, ku yuɛk bɛi ke wɛl: ku tak Babulon dit ne Nhialic nyin, bi yiɛn abiny de piukeabiɛi de lɛth de ɣokde.

²⁰ Go tuur kat ebɛn, ku ce kur yok keek.

²¹ Ku ye kɔi dit, kɔi ye them de tok ke thoŋ kene them de talantɔn, yiki bɛn nhial loonyki ne kɔc nhiim: go kɔc goki Nhialic laat ne anuan de kɔɔi; ne dit dite yeanuane.