Welpiath ci Mak cithiei ke gɔɔr 9 - Lek Jot de Jecu Kritho 1940

¹ Go Yecu ke yɔɔk, Ye we ya yɔɔk neyic, Ya kɔk ke keekɔc kaac eneke aaci bi guɔ thou, aŋootki e ke ken ceŋ de Nhialic kan ŋem ne bɔ ne riɛl.

² Na ci nin ya dhetem ke Yecu lom Petero, ku Jakob, ku Jɔn, ku leer ke ne kuur nom kepɛc: go Yecu guɔp rɔt wel ne kenhiim:

³ ku ci alɛthke ɣɛɛr, a cik gualegual; acin ran de piny nom leu alath ɣɛɛr yiya.

⁴ Ku tul yi Elija kene Mothe enɔŋ keek; ku jamki kene Yecu.

⁵ Go Petero dhuk ku yook Yecu, Ye Rabi, apiath te tɔ wɔ ene: ne wɔ loi ɣoot keediak; tok ke yin, ku tok kene Elija, ku Mothe ke tok.

⁶ Petero ee kuc ke bi luel; aake ci riɔɔc areet.

⁷ Go piol bɛn ku kum ke piny: ku bɔ ror ne piolic, Ye yekene kee Wendien nhiar, yaka piŋ.

⁸ Ana yi liecki kekɔth, ke cin ran beerki ŋem, aye Yecu kene keek.

⁹ Na yi biki piny ne kuur nom, go ke lɛk bik ka cik ŋem cuɔk lɔ lɛk kɔc, agut te bi Wen de raan rɔt jɔt ne thouic.

¹⁰ Goki ke ci lɛk keek muk, ku yeki roth thiec yi ye jon de rɔt ne thouic ŋo.

¹¹ Goki thiec, jamki, Yi kayee dugɛɛr luel yi Elija abi bɛn dhiil tueŋ.

¹² Go ke yɔɔk, Ye Elija abi kan bɛn eyic, ku dhuk kaŋ kedhia; ku ci gɔɔr yade ne Wen de raan, ya bi kajuec guum, ku bi jai?

¹³ Ku we ya yɔɔk, Ya Elija ee bɛn, ku kacik luɔi ke de kepiɔth, ci man e cene ye gɔɔr ne yen.

¹⁴ Na cik bɛn enɔŋ kɔcpiocke, goki duut ŋem kene keek, ku dugɛɛr thiec keek ne kaŋ.

¹⁵ Go duut ebɛn, wen cik kek ye ŋem, goki gai, ku riŋki enɔŋ en bik lɔ muɔth.

¹⁶ Go thiec, Ye yeŋo yaka thiɛc keek?

¹⁷ Go ran toŋ de duut jam, Ye Dupioc, an ci wendie bɛi enɔŋ yin, anɔŋ guɔp jɔŋ cie jam;

¹⁸ na ci ye dɔm, e kacuɛt: ku cuuth amoth, ku reem yelec ku riir wei: yeneka can kɔckuk piɔceke thiec ya bik nyaai; goki cuɔk leu.

¹⁹ Go dhuk yook ke, Ye kuan cin gam, ba ya reer wɔne week anana? ba gum ne week anana? Yiɛne ɣɛn.

²⁰ Goki yiɛn en: go ye ŋem, go jɔŋ rac dai rɛt ne rɛɛc de yepiɔu; ku cuɛt rɔt piny, ku cuuth amoth ne yethok.

²¹ Go Yecu wun thiec, Ye ne dɔm na? Go jam, Ye nelan e yen meth.

²² Ku kaye cuat mɛɛc ku ne piu yic, bi nɔk, yen na ye kaŋ leu, ke yin kace piɔu ne wɔɔk, ku kony wɔ.

²³ Go Yecu yɔɔk, Ye na ye kaŋ leu! Kaŋ kedhia aaye leu ne ran ye gam.

²⁴ Go wun e meth eyic dai yaat, ku jiɛm, Ye an gɛm; kony gam kɛn an guɔ gam.

²⁵ Na wen ŋem Yecu duut ne bɔ ke kat, go jɔŋ rac waai, yook, Ye yin jɔŋ cin thok ku ca miŋ, yin ya yɔɔk, ya bar bei ne yeguɔp, ku duk beer lɔ thin.

²⁶ Go coot, ku ret areet, ku bii bei: go meth jal ciɛt ke ci thou; go biak dɛ de duut cɔɔl, Yii ci thou.

²⁷ Go Yecu dɔm ciin, ku miit nhial; go rɔt jɔt.

²⁸ Ɣɔn ye bii ɣot, go kɔcpiocke thiec neluɔɔŋ, jamki, Yi kacuk leu ne nyiɛi.

²⁹ Go jam, Ye ke cit yekene acie leu ne nyiɛi, ee lɔŋ yetok yeneka leue yen.

³⁰ Goki jaal etɛɛn, ku bakki Galili yic; ku kɔr bii kɔc cuɔk nyic.

³¹ Ee pioc kɔcpiocke, yook keek, Ye Wen de raan ee taau e kɔc cin, abik nɔk; ku na cik ye nɔk, e kabi rɔt bɛɛr jɔt ne nin keediak.

³² Go yejame cuɔk lɔ ne kenhiim, ku riɔcki ne thiɛc bik kek ye thiec.

³³ Ɣɔn e kek lɔ Kapernaum: ana ye tɔ ɣot, e ke thiec keek, Ye yeŋo e luɛlka dholic?

³⁴ Goki mim: ake teer dit dholic, ne ran bi dit.

³⁵ Go nyuc piiny, ku cɔɔl thiɛrkurou; ku yook ke jiɛm, Ye na ye ran ye piɔu naŋ bi dit, e kee tɔ ciɛn ne raan ebɛn, ku ye raan ebɛn luɔi.

³⁶ Ku loom mɛnhthi, ku tɛɛu ne keciɛl yic: ku boom, ku yook ke,

³⁷ Ye ran ye mɛnhthin cit yemɛnhe loor ne rincie, e kee ɣa loor: ku ran ye ɣa loor, e kacie ɣan e ye loor, e ke yen yen man ci a tuɔc.

³⁸ Go Jɔn yɔɔk, Ye Dupioc, wɔ ci raan yok ke ciec jak rac ne rinku: goku jai, ne ke cen wɔ ye biɔth.

³⁹ Go Yecu yɔɔk, Ye duɔka jiɛi: acin ran leu kadit ne luɔi ne rincie, leu jam arac ne ɣan.

⁴⁰ Ran cie ter ke wɔ ee ya randa.

⁴¹ Na yin raan we piu ke dek ne rincie, ne ke ye we kɔc ke Kritho, we ya yɔɔk neyic, Ya ke ariɔmde aci bi maar.

⁴² Ku ran bi toŋ de keemithka cɔk kɔth, e kee ŋuan te cene ye ruok yeth kuur diit de guɛr, ku cuɛte bɛɛr.

⁴³ Na cɔk ciindu yi kɔth, ke tɛɛme wei: aŋuan enɔŋ yin ba lɔ ne piiric ke yin ye ciin tok, ne ba naŋ cinku keerou, bi yi cuat giɛna nɔŋic many ce leu ne piɔk:

⁴⁴ te ci liɔŋden ye thou, ku ci mac ye yai.

⁴⁵ Na kathe, ke yin tɛɛme yicok wei: aŋuan enɔŋ yin ba lɔ te piir yin, ku ye cok tok, ne ba naŋ cok keerou ku bi yi cuat giɛna,

⁴⁶ te ci liɔŋden ye thou, ku ci mac ye yai.

⁴⁷ Na cɔk nyindu yi kɔth, ke tuk bei: apiath ba lɔ ne ceŋ de Nhialicic we nyin tok, ne ba naŋ nyin keerou, ku bi yi cuat giɛna:

⁴⁸ te ci liɔŋden ye thou, ku ci mac ye yai.

⁴⁹ Raan ebɛn abi riir ne mac.

⁵⁰ Awai ee piath: ku na ci wacde jaal, ke bak bɛɛr cɔk wac wuɔde? Yaka awai cɔk tɔ ne wegup ku ye ŋɛk ke ŋɛk reer ne dɔɔr.