Welpiath ci Mak cithiei ke gɔɔr 7 - Lek Jot de Jecu Kritho 1940

¹ Go Parithai gueer enɔŋ yen, kene dugɛɛr kɔk, eke bɔ ne Jeruthalem,

² ku cik kɔcpiocke ŋem e ke cam monoi e ke col cin, e ke ken kecin guɔ piny.

³ Parithai, ku Judai kedhia, na kenki kecin guɔ piny apiath, e kaace ciɛm: aamuk luɔi de kuarken:

⁴ na cik ya bɛn te de ɣɔɔc e kaŋ, ku kenki piny, e kaace ciɛm: ku kajuec kɔk atɔ, yiki ke dot, wɛk de abiiny, ku tony, ku aduuk ke weeth.

⁵ Go Parithai ku dugɛɛr thiec, Yi yeŋo cii kɔckuk piɔceke ye cath ne luɔi de kuarkuɔ yic, ku yeki cuin cam e ke col cin?

⁶ Go ke yɔɔk, Ye Yithaya ee nyiɛc jam ne week we medhuum, ci man cene ye gɔɔr, Ye keekɔcka kaye ɣa riɛu ne kethook, Ku piɔthken kamec enɔŋ ɣan.

⁷ Aaye ɣa door ne ciɛlic, Ku weetden ye kek weet ee ya ke de kɔc.

⁸ We ye looŋ ke Nhialic waan, ku yaka looŋ ke kɔc dot arir.

⁹ Go ke yɔɔk, Ye we ye looŋ ke Nhialic cok jai, bik we luɔi thɛɛrduɔn ya dot.

¹⁰ Mothe ee ci jam, Ye ye wur ku moor theek; ku, Ye ran ye wun ka man lɛk rɛɛc, ke nɛke thou:

¹¹ ku we ye jam, Wuɔ na yook raan wun ka man, Ye kee te ca yiɛn yin ee Korban, luelde ee, Ke ci miɔc Nhialic;

¹² e kacak ye cɔk nɔŋ ke ye luɔi wun ka man;

¹³ cakka wɛt de Nhialic ye yic pial ne luɔi thɛɛrduɔn, luɔi cak tek: ku kajuec yinla yakake loi.

¹⁴ Go duut bɛɛr cɔɔl enɔŋ yen, ku yook keek, Ye piɛŋka ɣa wedhia, ku muɔkka:

¹⁵ acin ke de baŋ biyic de raan, ye lɔ ne baŋ thin de raan ku bi ye riɔk: ka ye bɛn bei ne baŋ thin keeka ye raan riɔk.

¹⁶ Neke piŋ ran nɔŋ yith keek.

¹⁷ Na ci lɔ ɣot jiɛl te de duut, go kɔcpiocke thiɛc parabol.

¹⁸ Go ke yɔɔk, Ye kɛnka guɔ nyic eya? Kɛnka dot, ke ke ye lɔ ne raanic, ye ciɛn rɛɛc leu ne luɔi;

¹⁹ ne ke cen e lɔ ne yepiɔu, ee ya yac yetok, ku le nyaai? Kene ee ci luel, ye ne miɛth ebɛn ye diik.

²⁰ Go jam, Ye ke ye bɛn bei ne raanic, yenekee raan cɔk rac.

²¹ Baŋ thin, ne piɔn de raanic, taŋ rac ee bɛn bei, ne bal,

²² rueny, tir, lɔ ke tiŋ de ran dɛ ku tiik ke mony dɛ, rɛɛc, dhuɔm, kɔr rɛɛc de guɔp, peeth, ku lɛɛt rac, ku dit de piɔu, ku bɛɛl:

²³ keekarɛcka kedhia aye bɛn bei ne piɔu, ku yiki raan rac.

²⁴ Go rɔt jɔt etɛɛn, ku leer piny de Turo ku Thidon. Go lɔ ɣot, ku ci kɔr bi ye nyic: ku ci rɔt leu ne thiɛn.

²⁵ Go tiŋ nɔŋe nyande jɔŋ rac dai bɛn, ne piŋ cen Yecu piŋ, bii ku cuɛt rɔt piny ne yenom.

²⁶ Ku tiik ee ye Giriki, ku kee ye tiɛŋ Thura‐poinike. Go lɔŋ bi jɔŋ rac nyaai ne nyande guɔp.

²⁷ Go yɔɔk, Ye ne mith ye kan kuɛth: ace piath bi miɛth de mith ya cuɛt jɔk.

²⁸ Go tiik dhuk yook, Ye kee yic, Bɛnydit: jɔk aye tɔ ne agen liel yeke thethuei ke mith cam.

²⁹ Go yɔɔk, Ye yejame jiɛl yin; jɔŋ rac ee jaal ne nyandu guɔp.

³⁰ Go tiik dhuk pande, go meth yok ne ci taac ne agen nom, ku ci jɔŋ rac bɛn bei.

³¹ Go bɛɛr jal piny de Turo, ku bii reet Thidonic bii bar de Galili, tem piny de Dekapoli.

³² Goki ran ci miŋ bɛi enɔŋ yen, ku nɔŋ ke ye ye dhuk liep; ku lɛŋki bi yeciin kan yen.

³³ Go raan nyaai ne duutic neluɔɔŋ, ku lut yeciin ne yeyith, ku ŋuut, ku jiɛk liep;

³⁴ ku liec nhial, weei, ku yook, Ye Eppatha, luelde ee, Liep rɔt.

³⁵ Go yithke roth liep, ku lony liep, jɔl ya jam apiath.

³⁶ Go ke yɔɔk duɔke bik cɔk nyic ran dɛ: deeŋ kethook areet, ke berki lɔ thiai piny areet.

³⁷ Ku cik gai areet, a goki jam, Yii kee kaŋ kedhia loi apiath: ee miiŋ cɔk piŋ, ku cɔk kɔc ci dhuk liep cɔk ye jam.