Welpiath ci Mak cithiei ke gɔɔr 6 - Lek Jot de Jecu Kritho 1940

¹ Go jaal etɛɛn; ku leer panden; ku biɔth kɔcpiocke.

² Na ɣɔn ne kol de thabath, ke cak pioc luaŋ de gueer: go kɔc juec ci ye piŋ gai, ku jamki, Yi ne yerane yok keekake teno? Ku ye nyiny cite ŋo ci yiɛn yerane? ku yeluɔi diit ye loi ne yeciine!

³ Cie dugueŋ yekene, ci ye wen de Mari, ku ye manhe de Jakob, ku Jothe, ku Judath, ku Thimon? Ku ce nyirakɛcke cik tɔ kene wɔɔk ene? Goki jai.

⁴ Go Yecu ke yɔɔk, Ye nebi acie ciɛn rieu, a kee ya pande yetok, ku dhienden, ku ɣonden.

⁵ Ee cin kediit e ci leu ne luɔi etɛɛn, a kaye kɔc diaak keeka ke kɛn en ke yeciin, kɔc bec, cɔk ke piɔl gup.

⁶ Ku gɛi Yecu ne cuɔk gamden. Ku leer ne bɛi yic pioc keek.

⁷ Go thiɛrkurou cɔɔl, ku gɔl ke ne tuɔc, rou ku rou; ku yin ke riɛr bik kek jak rac ya tiam;

⁸ ku yook ke bik ciɛn ke mukki dholic, aye lec yetok; ku cin mono, acin boon, acin weu ne bon de laakic;

⁹ ku bik ya cath ne war: ku jiɛm, Ye duɔke alɛth ye ceŋ keerou.

¹⁰ Ku yook keek jiɛm, Ye te ci we ya lɔ ɣot, ke we rɛɛrka agut te jiɛl we.

¹¹ Ku piny cene we ye loor thin, ku cene we ye piŋ thin, yee na jalka thin, ke we teŋ liɛt de wecok wei bi kek ye nyic.

¹² Goki lɔ biyic, ku yeki weet bi kɔc kepiɔth wel.

¹³ Goki jak rɛc juec ciec, ku yeki kɔc bec tɔc ne miok, ku cɔkki ke dem.

¹⁴ Go Kerod melek piŋ; ke rinke ci nyic; go jam, Ye Jɔn Baptith ee rɔt jɔt ne thouic, yen eluɔine aloi ne riɛrde.

¹⁵ Go kɔk jam, Yi kee Elija. Ku jam kɔk, Yi kee nebi, ee ran toŋ de nebii.

¹⁶ Go Kerod, wen cen e piŋ, ke jam, Ye Jɔn, man ca tɛɛm nom wei, ee rɔt jɔt.

¹⁷ Kerod ne guɔpde ee ci Jɔn lɔ cɔk dɔm, ku cɔk mac ne ke de Kerodiath, tiŋ de manhe Pilip: ee ci thiak.

¹⁸ Jɔn ee ci Kerod yɔɔk, Ye kace piath ba lɔ we tiŋ de wanmuuth.

¹⁹ Go Kerodiath piɔu naŋ bi Jɔn nɔk; ku cii ye leu;

²⁰ Kerod ee riɔc ne Jɔn, nyic lan yen ran piath ku lejik, go ya ŋem apiath. Na ɣɔn piŋ yen, ke mum en areet; ku ye piɔu miɛt ne piŋ.

²¹ Na ɣɔn, ne kolden de miɛt e piɔu, ke Kerod lui miɛth kɔcditke, ku banydit, ku bany ke Galili ne akol e dhiethe yen;

²² go nyan de Kerodiath bɛn ku dier, cɔk Kerod mit piɔu kene kɔc rom kene yen; go melek nya yɔɔk, Ye thiec an ne ke cit ke kɔɔr piɔndu ba yiɛn yi.

²³ Ku kueŋ rɔt jiɛm, Ye ke ba thiec enɔŋ an aba yiɛn yi, agut baŋ toŋ de ceŋdie.

²⁴ Go nya lɔ biyic, ku yook man, Ye ba ŋo thiec? Go yɔɔk, Ye thiec nom de Jɔn Baptith.

²⁵ Go dai riŋ enɔŋ melek, ku thiec, jiɛm, Ye ɣan nɔŋ piɔu ba ɣa yiɛn nom de Jɔn Baptith ne alɛcic.

²⁶ Go melek piɔu dhiau areet: ku ci nya beer leu ne jiɛi ne kueeŋ cen rɔt kueeŋ ku kɔc rom kene yen.

²⁷ Go melek lathker ye yen tiit dai tooc, ku yook bi nom lɔ bɛi: go lɔ ku le teem nom ɣon de dom,

²⁸ ku bii nomde ne alɛcic, ku yin nya; go nya lɔ le yiɛn man.

²⁹ Na ɣon ci kɔcpiocke ye piŋ, e ke bɔ lomki guɔpde, ku lek thiɔk.

³⁰ Go dutuuc keyiic kuɔt ku biki enɔŋ Yecu; ku lekki kaŋ kedhia, ka cikke loi, ku ka cik kek ke pioc.

³¹ Go ke yɔɔk, Ye baka wepɛc telaau, buk lɔ yok ke wɔ lɔŋ. Juaac ee ye bɛn ku lek, ku cinki te lɔŋ kek ciɛm kek.

³² Goki lɔ riɛi leke telaau.

³³ Go kɔc ke ŋem e ke lɔ, ku nyiic kɔc juec keek, goki riŋ eeti kedhia ne kecok ne bɛi kedhia, kueŋki ne kenhiim.

³⁴ Ana ye Yecu ye kɛɛc bei, ke ŋem duut, go piɔu kac ne keek, ne ke cit kek amɛl cin adubiok: ku gɔl ke ne pioc ne kajuec.

³⁵ Na ci akɔl duɔr cuɔl, ke kɔcpiocke bɔ enɔŋ yen, jamki, Yi pinye ee roor, ku akɔl acol:

³⁶ ciec kɔc, bik lɔ ne bɛi thiɔk, ku bik roth lɔ ɣɔc ke camki.

³⁷ Go dhuk yook keek, Ye miacka keek bik cam. Goki yɔɔk, Yi buk monoi lɔ ɣɔɔc ne denariɔn thiɛrnyɛny dhetem, ku buk ke yiɛn ke bik ke cam?

³⁸ Go ke yɔɔk, Ye naŋka monoi kede? lak ŋɛmka ke. Na cik ye nyic, e ke jam, Yi kaye dhiec ku rec keerou.

³⁹ Go Yecu ke yɔɔk kedhia bik nyuc piiny ne dol ne noon nom.

⁴⁰ Goki nyuc ne abɛɛr, ne thiɛrnyɛny, ku ne thiɛrdhieec.

⁴¹ Ku loom monoi keedhiec ku rec keerou, ku liec nhial, ku thiei ke, ku wɛɛk monoi yic: ku yin ke kɔcpiocke bik ke lɔ tɛk kɔc; ku tek rec keerou tenɔŋ kɔc kedhia.

⁴² Goki cam kedhia, ku kuethki.

⁴³ Goki thethuei kuany, e ke thiaŋ akup keethiɛr ku rou, ku ka ke rec eya.

⁴⁴ Ku kɔc eke cam monoi aake ye bianabur dhiec.

⁴⁵ Go kɔcpiocke dai lɛk bik lɔ riɛi, ku bik ye ŋaar lɔŋti pan de Bethaida, ne yekaam cɔk en duut puɔkne.

⁴⁶ Na ci ke nyaaŋ piny, go lɔ ne kuur nom bi lɔ lɔŋ.

⁴⁷ Wen ci thei bɛn, ke riai ee tɔ ne bar ciɛlic, ku yen etok ne agor nom.

⁴⁸ Go Yecu ke ŋem e ke nuɛn gɛr keek, ne yom diit pen keek, go bɛn enɔŋ keek, ne tiɛt de ŋuan de wɛɛr, ciɛth ne piu nhiim; ku ci ke duɔr waan:

⁴⁹ ku keek, wen yi cik ye ŋem ne cath ne piu nhiim, goki cɔɔl yi ye jɔk, a goki coot:

⁵⁰ ee cik ŋem kedhia, goki nhiim mum. Go dai jam kene keek, yook keek, Ye miɛtka piɔth: ee ɣɛn; duɔke riɔc.

⁵¹ Go lɔ enɔŋ keek riɛi; go yom jaal; goki jal gai areet;

⁵² ke de monoi ee kenki dot, piɔthken aake ci riɛr.

⁵³ Wen cik tem lɔŋti, goki bɛn piny de Genetharet, ku ci riai mac agoor.

⁵⁴ Na yi kɛɛcki bei riɛi, go dai nyic ne kɔc,

⁵⁵ ku riŋki ne baaiyic ebɛn, ku gɔlki kɔc bec ne jot ne ageen yic, te cik ke Yecu piŋ ne rɛɛr thin.

⁵⁶ Ku ɣɔn eke cenke ya lɔ ci bɛi thii, ku bɛi dit, ku piiny kedhia, ke kɔc ye kɔc bec taau ne ɣɔn ke ɣɔc, ku lɛŋki bi ke cɔk jak alanhde thok: go kɔc ci alanhde ya jak thok, goki ya pial.