Welpiath ci Mak cithiei ke gɔɔr 5 - Lek Jot de Jecu Kritho 1940

¹ Goki ɣet ne bar lɔŋti, pan de Gadarai.

² Na wen ye bii bei riɛi, go dai rɔm kene ran nɔŋ jɔŋ rac te de rɛŋ,

³ ran ye ceŋ te de rɛŋ: ku ye ciɛn ran ye ye kan leu ne der, liu, ne cak ya joth;

⁴ ee ye dai rek ne luɔŋ ku ne joth, ku ye ke tueny, ku dhoŋ luɔŋ kɔth: ku ye ciɛn ran ye naŋ riɛr bi ye cɔk loi nom.

⁵ Ku ye ceŋ te de rɛŋ ku kur nhiim akolriɛc, wɔkɔu ku akol, ye coot, ku ye rɔt gɔɔp ne kur.

⁶ Go Yecu ŋem temec, go riŋ ku door,

⁷ ku coot ne ror dit, jiɛm, Ye ba ŋo loi wɔ yin, Yecu, yin ye Wen de Nhialiny Dit Areet? Yin ya yɔɔk ne rin ke Nhialic, duɔne ɣa luc.

⁸ Ne ke cen e yɔɔk, Ye bar bei, yin jɔŋ rac, ne raan guɔp.

⁹ Ku thiec, Ye cɔl rinku de? Go yɔɔk, Ye rincie acɔl Duut; ne ke juec wɔ.

¹⁰ Go Yecu lɔŋ areet duɔeke bike ciɛc wei baai.

¹¹ Ku kee nɔŋ dun diit de kuɔl nyuɛth ne kuur lɔɔm.

¹² Goki lɔŋ, jamki, Yi ciɛce wɔ ne kuɔl gup, buk lɔ ne keyic.

¹³ Go ke yɔɔk bik lɔ. Go jak rac bɛn bei, ku leki ne kuɔl gup: go duut riŋ le tiɛlaŋ bɛɛr, aake ye bianabur rou, goki lɔ mou bɛɛr.

¹⁴ Go kɔc eke nyuɛɛth ke kat, ku le lɛk kɔc ke pan dit, ku piny ebɛn. Goki bɛn bik ke ci tuɔl bi ŋem.

¹⁵ Ku biki enɔŋ Yecu, ku ŋemki ran war ci jɔŋ rac dɔm ne rɛɛr, ne ceŋ alɛth ku ci nom jal loi, yen man e nɔŋ guɔp duut: goki riɔc areet.

¹⁶ Go kɔc wen ci e ŋem goki ciɛr keek ye ke ci lony enɔŋ ran de jɔŋ rac, ku kuɔl.

¹⁷ Goki cak ne lɔŋ bi jal pinyden.

¹⁸ Ana ye leer riɛi, ke ran wen nɔŋ jɔŋ rac lɛŋ en bi tɔ kene yen.

¹⁹ Go cuɔk gam, ku yook, Ye lɔɔr panduɔn tenɔŋ mɛɛthku, ku lɔ lɛke keek kadit ci Bɛnydit ke luɔi yin, ku kac de piɔu enɔŋ yin.

²⁰ Go lɔ, ku ciɛk ke ne lek ne Dekapoli ne kadit ci Yecu ke loi enɔŋ yen: go raan ebɛn gai.

²¹ Na ci Yecu bar bɛɛr tɛɛm lɔŋti, ke dun dit gueer enɔŋ yen: ku tɔ ne bar lɔɔm.

²² Go randiit toŋ de luaŋ de gueer bɛn, ran cɔl Jairo; ana ye ŋem en, ke cuɛt rɔt piny ne yenom,

²³ ku lɛŋ areet, jiɛm, Ye nyan thindie amuɔn wei: yen yin laŋ, ba bɛn ba yiciin kan en, bi pial ku bi piir.

²⁴ Go lɔ kene yen; ku biɔth ne dun dit, ku leki ke japki.

²⁵ Ku tiik ee tɔ, ee nɔŋ riɛm ye kueer ne yeguɔp ne run keethiɛr ku rou,

²⁶ ku ci gum ne tit juec, ku ci kake kedhia riap, ku ci kɔn ŋuan, ku ye riɛm lɔ ke jɔp rɔt,

²⁷ te cen ka loi Yecu ke piŋ, ke bɔ ne yekɔu, ku jiɛk alanhde.

²⁸ Jiɛm, Ye na jak alanhde abac, ke ɣan bi pial.

²⁹ Go riɛm dai lɔ ŋou; ku yeguɔp ne ci pial ne yebenye.

³⁰ Go Yecu dai nyic, ke riɛrde ci jaal ne yeguɔp, go rɔt wel ne duutic, ku jiɛm, Ye yeŋa ci alanhdie jak?

³¹ Go kɔcpiocke yɔɔk, Yi kɛne yedun diit jiɛp yine ŋem, yin jam, Wu yeŋa ci ɣa jak?

³² Go yenyin caath bi ran ci ekene loi ŋem.

³³ Go tiik riɔc, ku lethe, anyic ke ci luɔi yen, go bɛn ku cuɛt rɔt piny enom, ku lek yith kedhia.

³⁴ Go Yecu yɔɔk, Ye nyane, gamdu ee yi luɔk; lɔr ne dɔɔr, ku piale guɔp ne benydu.

³⁵ Ana ye ŋoot ke jam, ke raan bɔ ɣon de randiit de luaŋ de gueer, jiɛm, Ye nyandu ee thou: yeŋo dɛ mec yin Dupioc piny?

³⁶ Go Yecu wel cuɔk piŋ, ku yook randiit de luaŋ de gueer, Ye duk riɔc, tom gam.

³⁷ Go kɔc jai kɛlke ke bi ye biɔth, aye Petero, ku Jakob, ku Jɔn manhe de Jakob keek kepɛc.

³⁸ Goki bɛn ɣon de randiit de luaŋ de gueer, go ajaak piŋ, kene kɔc juec dhiau ku wuɔi dit.

³⁹ Wen ci lɔ ɣot, e ke yook ke, Ye yeŋo cɔɔl we wuɔi dhiɛu we wuɔla? Meth aken thou, anin.

⁴⁰ Goki dɔl ne buɔi. Go ke cɔk jiɛl, ku cɔk wun e meth kene man ku kɔc eke tɔ kene yen cɔk lɔ ɣot kene yen te tɔ meth thin.

⁴¹ Go Yecu meth dɔm ciin, ku yook, Ye Talitha kumi; te luele yen ne thoŋda, ke ye, Nya, yin ya yɔɔk, Ya jɔt rɔt.

⁴² Go nya rɔt dai jɔt, ku ciɛth, ee ye runkeek ke dit thiɛr ku rou. Goki jal gai areet.

⁴³ Go ke cok lom thook kɛlke bi ran dɛ nyic: ku jiɛm ye yine meth ke ciɛm.