Welpiath ci Mak cithiei ke gɔɔr 3 - Lek Jot de Jecu Kritho 1940

¹ Go bɛɛr lɔ luɛɛk; ku tɔ ran ci ciin ruai luaak.

² Goki daai ne yen, lan ben e cɔk piɔl ne akol de thabath; bik kek ye guɛɛl.

³ Go ran ci ciin ruai yɔɔk, Ye kaace cilic.

⁴ Ku yook ke jiɛm, Ye piɛth te yene kepiath loi ne akol de thabath, ka piɛth bi rɛɛc ya loi? piath luɛŋ de wei, ka piath nɛŋ de wei? Goki lɔ diu.

⁵ Na wen ci ke guaar ne ŋem ke ɣok, ku dhiɛu piɔu ne riɛr de piɔthken, ku yook raan, Ye thiu yiciin. Go thiu: go ciin dai piath.

⁶ Go Parithai lɔ biyic, dɔcki roth lɔ jaam kene kɔc ke Kerod, ne nɛŋ bik kek ye nɔk.

⁷ Go Yecu kene kɔcpiocke lɔ ne bar lɔɔm: ku biɔth ne dun dit ne Galili: ku ne Judaya,

⁸ ku ne Jeruthalem, ku ne Edom ku kɔc rɛɛr ne Jordan kɔu lɔŋti, yi kɔc ke Turo ku kɔc ke Thidon, dun dit areet, te cik kek ye piŋ ne loi kadit, goki bɛn enɔŋ yen.

⁹ Go kɔcpiocke yɔɔk, bik rianthi ya tiɛt en ne juec de kɔc, kɛlke bii duut jaap:

¹⁰ ne ke cen kɔc juec cɔk piɔl; agut te bi kɔc kɔk bec ya bɛn ku yiki jak.

¹¹ Te ci jak rac Yecu ŋem, e ke cuɛt roth piny ne yenom, ku cotki, Yi yin ye Wen de Nhialic.

¹² Go ke cok yɔɔk, bik cuɔk cɔk nyic.

¹³ Go lɔ ne kuur nom, ku cɔɔl kɔc kɔɔr keek: goki lɔ enɔŋ yen.

¹⁴ Go thiɛrkurou lɔc, bik ya tɔ kene yen, bi ke ya tooc bik lɔ weet,

¹⁵ ku bik naŋ riɛr ye kek jak rac ciec:

¹⁶ go Thimon cak cɔk ye Petero;

¹⁷ ku Jakob wen de Dhebedayo, ku Jɔn manhe de Jakob; ku cɔk ke ye Boanergeth, Wɛɛt ke mar e deŋ:

¹⁸ ku Andereya, ku Pilip, ku Bartholomayo, ku Mathayo, ku Thomath, ku Jakob wen de Alapayo, ku Thadayo, kene Thimon muɔny Kanaan,

¹⁹ ku Judath Yithkariɔt, man e nyiin yen. Ku bii ɣot.

²⁰ Go duut bɛɛr gueer, a cin te piɛth ciɛm kek thin.

²¹ Na ci mɛɛthke ye piŋ, goki bɛn yi bik kuak piny: ake jam, Yi kee nom riɛɛr.

²² Go dugɛɛr eke bɔ ne Jeruthalem jam, Yi kanɔŋ Beeldhebub, ku, Kee jak rac ciec ne riɛr de bɛnydiit de jak rac.

²³ Go Yecu ke cɔɔl, ku yook kek ne parabool, Ye leu Catan Catan ne ciɛc yede?

²⁴ Na tek ceŋ rɔt, ke ceŋ ace kɔɔc leu.

²⁵ Na tek ɣot yeyic, ke ɣot ace kɔɔc leu.

²⁶ Ku te ci Catan rɔt jɔt, ku teek rɔt, e kace kɔɔc leu, ku jɔl thok.

²⁷ Acin ran leu lɔ ɣon de ran rir bi kapiɛthke lɔ riɔk, te ken en ran rir kan der; ku jɔl ɣonde riɔk.

²⁸ We ya yɔɔk neyic, Ya raan ebɛn abene karɛcke ya puɔl kedhia, ku lɛɛt bik kek ya lat:

²⁹ ku ran bi Jɔŋdiit Lajik ya laat aci bi kan puɔl, ku ye naŋ rɛɛc athɛɛr,

³⁰ ne ke cik kek jam, Yi kanɔŋ jɔŋ rac.

³¹ Go man kene mithakecke bɛn; ku kɛɛcki kec, ku tucki, cɔlki.

³² Ku kee rɛɛr kene duut; goki yɔɔk, Yi ŋem, moor ku watmɛthku, aakaac kec aakɔr yin.

³³ Go dhuɔk keek, jiɛm, Ye yeŋa ye ama ku watmɛthcie?

³⁴ Go kɔc ci nyuc elɔɔm lieec, ku jiɛm, Ye ŋɛmka ama ku watmɛthcie!

³⁵ Raan ebɛn ran ye piɔn de Nhialic loi, yenekee wanmaath, ku yenekee nyankɛi, ku yeneka ye ama.