Welpiath ci Mak cithiei ke gɔɔr 13 - Lek Jot de Jecu Kritho 1940

¹ Ana ye jiɛl ne yekalu, ke thiec ran toŋ de kɔcpiocke, Ye Dupioc, ŋem cɔɔk de keekurka ku cɔɔk de keeɣootka!

² Go Yecu jam, Ye ca keeɣoot ditka ŋem? acin kuur toŋ bi doŋ ne kuur dɛ nom, ci bi thuɔr piny.

³ Ana ye nyuuc ne kuur de Olip nom ne biak beer yekalu, ke thiec yi Petero ku Jɔn ku Andereya thiecki neluɔɔŋ,

⁴ Yi lɛke wɔ, ye na bii keekake tuɔl? ku bi ŋo bɛnden nyuɔth, bii keekake jal ya yith kedhia?

⁵ Go Yecu ke gɔl ne jiɛm, Ye ŋɛmka roth duɔke raan bi we math.

⁶ Juaac abi bɛn ne rincie, ku ye jam, Ye ɣan eke ye; ku bik juaac ya math.

⁷ Na yaka tɔɔŋ piŋ, ku thook ke tɔɔŋ, ke we duɔka nhiim liap: keekaka aabi bɛn kan dhiil, ku kol ciɛn aŋoot.

⁸ Jure ke jure aabi ɣeet, ku ceŋ ke ceŋ: ku kabi naŋ aluɛkluɛk ne ɣɔn kɔk; ku pawɛɛr: keekake kedhia aaye gɔc de diɛɛr.

⁹ Demka roth: aabi we ya yiɛn luk; ku we bi ya dui ne luek ke gueer yic; ku we bi ya kɔɔc ne gabanai nhiim ku meleek ne ɣɛn, bi ya lekden.

¹⁰ Ku welpiath aabike kan dhiil ne lek juɔr ebɛn.

¹¹ Na yiki we laar ne lukic, ku yiki we dɔm, ke we duɔka ye leeth ne ke bak ya luel: ke bi ya yiɛn week etɛɛn, ke jiɛm we: ne ke cene we e bi ya jam, ee Jɔŋdiit Lajik.

¹² Ku ŋɛk abi manhe ya yiɛn thou, ku meth ke wun; ku ye mith teer kene kɔcken, bik ke cɔk thou.

¹³ Ku we bi ya maan ne raan ebɛn ne rincie: ku ran ci rɔt bi ya wek athook kek, ke yeneka bi luɔk.

¹⁴ Yen na ŋɛmka keman ne man cie thɔɔŋ ne kaac te cie tede, (ne ye raan nyic ran ye ciir), ke ne kɔc tɔ ne Judaya riŋ ne kur nhiim:

¹⁵ ku ne ran tɔ ne ɣot nom, ne ce lɔ piny, ku leer bi kake lɔ nap bei ɣot:

¹⁶ ku ne ran tɔ domic ce dhuk ciɛn bi alanhde lɔ loom.

¹⁷ Abi naŋ dhieu enɔŋ diar liac ku diar tiakke ne keeakolke!

¹⁸ Yaka lɔŋ kɛlke bi bɛn muɔi.

¹⁹ Keeakolke aabi ya akol ke jiɛth de piɔu, ne ken kan bɛn ɣɔn ciɛke piny ne Nhialic agut ci emane, ku kaci kɔn bɛr ya tɔ.

²⁰ Ne Nhialic ken nin cɔk lik, ee te cin ran ci luɔk: ee cɔk nin cɔk lik ne ke de lɔɔckeek ci ke lɔc.

²¹ Na yook raan week, Ye ŋɛmka, Kritho eke; ku ye yenekaa tii, ke duɔka gam:

²² Krithoi ke adhom ku nebii ke adhom aabi tuɔl, ku kaabi cit ku kagɛike nyuɔth, bik kɔc yɛc wei, aɣet kɔc cike lɔc, te leu kek yen.

²³ Yaka roth ŋem: we ca lɛk kaŋ kedhia emane e ke ŋoot wei.

²⁴ Keeakolka, te cii jiɛth de piɔu thok, ke akɔl abi cuɔl ecut, ku pɛɛi aci bi ya ruɛr,

²⁵ ku kuel aabi ya loony piny nhial, ku riir ye tɔ nhial aabi met.

²⁶ Ku jɔlki Wen de raan ŋem ne bɔ ne piolic ne riɛr dit, ku nuɔm dit.

²⁷ Ku kabi malaikaike tooc bik kɔckeek cike lɔc kuɔt yic ne yom ye yic ŋuan, ne piny thok ebɛn alɔgut nhialic.

²⁸ Piɔcka ne parabol de ŋaap: te ci kerke thook kul, ku nyook yith, e kanyiɛcka lan ci ruer thiɔk;

²⁹ yenekee cɔɔkduɔn eya, na yaka keekake ŋem kedhia e ke bɔ, ke nyiɛcka lan cen thiɔk, aɣet ɣoot thook.

³⁰ We ya yɔɔk neyic, Ya yekuane aci bi jaal, aŋoot kekake kedhia e ke ken bɛn.

³¹ Nhial ku piny aabi nyaai: ku welcie aaci bi nyaai.

³² Acin ran toŋ nyic yekole ku thaa, agut malaikai ke pan nhial, aɣet Wa, ee Awa yetok.

³³ Yaka roth ŋem, yaka tiit ku yaka lɔŋ: we kuc kol ben bɛn.

³⁴ Acit ran ci keny pan dɛ, ku nyiɛŋ ɣonde piny, ku tek aluɛkke riɛr ku luɔi, ŋɛk ne luɔide, ku ŋɛk ne luɔide, ku yook metit bi ya tiit.

³⁵ Yen yaka tiit, ne kuny kuc we te bii bɛny de ɣot bɛn, lan ben bɛn thei, ka ne wɛɛric, ka ne ciu de ajith, ka ne run;

³⁶ kɛlke na bii ke bi we yok ne nin.

³⁷ Ke ca lɛk we, alɛk raan ebɛn, Ya yaka tiit.