Welpiath ci Mak cithiei ke gɔɔr 1 - Lek Jot de Jecu Kritho 1940

¹ Gɔc de welpiɛth ke Yecu Kritho Wen de Nhialic.

² Acit man e cene ke gɔɔr ne Yithaya nebi, Ye ŋɛmka, an tooc dutunydie tueŋ bi yi ŋɔɔr, Bi dholdu lɔ juir;

³ Ror de toŋ ye coot roor, Ye juɛrka dhol de Bɛnydit, Cakka dhɔlke lacith;

⁴ Go Jɔn bɛn, yen man e ye kɔc baptith roor, ku ye ke wɛɛt ne baptinh de wel de piɔu ne pɛl de karac.

⁵ Go kɔc ke piny de Judaya kedhia ku kɔc ke Jeruthalem lɔ roor te tɔ yen; go ke baptith ne ciir cɔl Jordan, ku gamki karɛcken.

⁶ Jɔn ee ci rɔt piɔth ne alanh ci cuec ne nhim ke thɔrɔt, ku laak ethar, ku ye cam ne kɔriɔm ku miok de ciec.

⁷ Ku yee weet, jiɛm, Ye ran tok abiɔth ɣa rir ne ɣɛn, an ce piath a ɣan ci bi guŋ ku dak cou de waarde.

⁸ An ye we baptith ne piu; ku kabi we baptith ne Jɔŋdiit Lajik.

⁹ Ku tɔ ne kaakolka, bɔ Yecu ne Nadhareth de Galili, go baptith ne Jɔn ne Jordanic.

¹⁰ Elantoŋ e bii en bei ne piu yic, go nhial ŋem ne ci yic lɔ pec, ku Jɔŋdit ne cit guɔp kure ne lony yen:

¹¹ ku bɔ ror nhial, jiɛm, Ye yin ye Wendien nhiar, yin yan piɔu lɔyum.

¹² Ku jɔl Jɔŋdit guɔ laar roor nelantoŋtɛi.

¹³ Ku le ceŋ roor ne nin keethiɛrŋuan, theme Catan ke yen; ku ye ceŋ ne lai roor yic, ku yee malaikai yeki luɔi.

¹⁴ Na ɣɔn ci Jɔn mac, ke Yecu bɔ Galili, ye weet ne welpiɛth ke Nhialic,

¹⁵ jiɛm, Ye akɔl ee ɣeet, ku ceŋ de Nhialic ee bɛn: wɛlka wepiɔth, ku yaka welpiath gam.

¹⁶ Ku te ciɛthe Yecu ne bar kɔu de Galili, ke ŋem Thimon ku Andereya manhe de Thimon e ke cuɛt abuɔiken bɛɛr: ake ye thany.

¹⁷ Go Yecu ke yɔɔk, Ye biathka ɣɛn, ku we ba cɔk ye dudeep ke kɔc.

¹⁸ Goki abuɔiken nyaaŋ piny ne etoŋe, ku biɔthki.

¹⁹ Ana ye cot rɔt tueŋ, ke ŋem Jakob wen de Dhebedayo, kene manhe Jɔn, e ke tɔ riɛi cuecki abuɔiken.

²⁰ Go ke dac cɔɔl: goki wuɔnden Dhebedayo nyaaŋ riɛi kene awuut yeke riɔp, ku kuanyki cok.

²¹ Goki lɔ Kapernaum; ɣɔn ne akol de thabath ke Yecu lɔ luɛɛk le pioc.

²² Goki gai ne weetde: ne ke yen ke piɔc ci toŋ nɔŋ riɛr, ku ci cit dugɛɛr.

²³ Ku raan ee tɔ luak ran cii jɔŋ rac dɔm; go coot,

²⁴ jiɛm, Ye yeŋo buk loi wɔne yin, yin Yecu de Nadhareth? ca bɛn ba wɔ riɔk? Yin nyiɛc, ke yin ye Toŋ Lajik de Nhialic.

²⁵ Go Yecu waai, ku jiɛm, Ye mim, ku bar bei enɔŋ yen.

²⁶ Te ci jɔŋ rac ye reet, ke cot ne ror dit, ku bii bei.

²⁷ Go kɔc gai areet kedhia, agut te thiec kek roth, jamki, Yi yee kanŋo yekene? ku ye weet jote! anɔŋ riɛr yen jak rac yɔɔk, ku yiki gam.

²⁸ Go thoŋde jal guɔ thiɛi piny de Galili ebɛn.

²⁹ Wen, aacik bɛn bei luaak, e ke lɔ ɣon de Thimon ku Andereya, kene Jakob ku Jɔn.

³⁰ Ku dhiɔm de Thimon anɔŋ guɔp atuɔr; goki dac lɛk Yecu:

³¹ go bɛn ku dɔm ciin, ku jot nhial; go atuɔr guɔ jal ne yeguɔp, go rɔt jɔt le ke luɔi.

³² Ana ye piny ye le moor, ke kɔc bii kɔc bec kedhia, biike enɔŋ en, ku kɔc ci jak rac ke dɔm.

³³ Ku ci baai ebɛn gueer luak thok.

³⁴ Go kɔc juec cɔk piɔl, ku ciec jak rac ne kɔc gup, ku jiɛi jam de jak rac, ne ke nyic kek yen.

³⁵ Ɣɔn miakdur, aŋoot piny ke ye dudur, ke jɔt rɔt ku ler telaau, lee lɔŋ.

³⁶ Go Thimon ku kɔc eke tɔ kene yen goki biɔth cok;

³⁷ goki lɔ yok, ku yookki, Yi raan ebɛn akɔr yin.

³⁸ Go ke yɔɔk, Ye loku ne bɛi kɔk, ba ke lɔ wɛɛt eya; yekene yenekee bii ɣɛn.

³⁹ Go lɔ weet ne luekken yic ne Galili ebɛn, ku ciec jak rac.

⁴⁰ Go ran de abil bɛn enɔŋ yen, lɛŋ, ku tuk enhiɔl ne yenom, ku yook, Ye na tɔ ne yipiɔu, ke kaleu ba ɣa cɔk piɔl.

⁴¹ Go Yecu piɔu kac, ku thiu yeciin, ku jiɛk, ku yook, Ye katɔ ne apiɔu; piale guɔp.

⁴² Go abil dac jal nelantoŋtɛi, ku jɔl guɔp piath.

⁴³ Go lom thok areet, ku cɔk dɔc jal,

⁴⁴ ku yook, Ye ŋem, duɔne lek ran dɛ: lɔɔr dholdu, nyuɔthe yiguɔp bɛny de ka ke Nhialic, ku kɔce rɔt ne ke cin guɔp pial ci man e cii Mothe ye luel, bi ya nyinyden.

⁴⁵ Go lɔ biyic, ku gɔl ne luɛl lek raan ebɛn, ku thiɛi yethoŋ de yeluɔine, a go Yecu cuɔk ye cath ne bɛi yic ke nyooth rɔt, ku ye ceŋ roor telaau: ku ye kɔc jal bɛn enɔŋ yen ne baai ebɛn.