Mathayo 8 - Lek Jot de Jecu Kritho 1940

¹ Na ci bɛn piny ne kuur nom, go dun dit kuany cok.

² Ŋɛmka, go ran de abiɛl bɛn enɔŋ en, bii ku door, jiɛm, Ye Bɛnydit, na tɔ ne yipiɔu ba ɣa cɔk pial, e kaleu.

³ Go yeciin thiu, ku jiɛk, ku jiɛm, Ye katɔ ne ɣapiɔu; ne yin pial. Go abiɛl dac jaal elantoŋtɛi.

⁴ Ku yooke Yecu, Ye duɔne lek ran dɛ; lɔɔr dholdu, nyuɔthe rɔt bɛny de ka ke Nhialic, ku game miɔc ci loŋ de Mothe, bi kek ye nyic.

⁵ Ɣɔn cen lɔ Kapernaum, go bɛny de lathkeer bɛn enɔŋ en, bii ku lɛŋ,

⁶ jiɛm, Ye Bɛnydit, awundie ee dhiɛc piny ɣot, abec ee cath thueet, atok areet.

⁷ Go yɔɔk, Ye an bi lɔ ba lɔ cɔk piɔl.

⁸ Go bɛny de lathkeer dhuk jiɛm, Ye Bɛny, an ce piath a ba lɔ ɣondie: tom jam, ke awundie abi pial.

⁹ Ɣan tɔ ne riɛric eya, ku an nɔŋ lathkeercie: na yɔɔk ŋɛk, Ya lɔɔr, e kalɔ; ku na yɔɔk ŋɛk, Ya bar, e kabɔ; ku na yɔɔk awundie, Ya loi kene, e kaloi.

¹⁰ Na ci Yecu ye piŋ, ke gɛi, ku yook kɔc kuany yecok, Ye we ya yɔɔk neyic, ya ɣan ken gam diit yinla yok agut ci Yithrael.

¹¹ Ku we yɔɔk keek, ya juaac abi bɛn ciɛn ku bii tueŋ, ku bik nyuc kene Abraɣam, ku Yithak, ku Jakob, ne ceŋ de pan nhialic:

¹² ku wɛɛt ke ceŋ aabike ciɛc biyic ne cuɔlic: te bi ya te de dhieu ku nyi de lec.

¹³ Ku yook Yecu bɛny de lathkeer, Ye lɔɔr tedu, gam cin e gam, eka bene ye luɔi yi. Ku go awut pial ne yethane.

¹⁴ Te ci Yecu bɛn ɣon de Petero, go dhiɔm de Petero ŋem ne tɔ piiny nɔŋ guɔp alɛɛth.

¹⁵ Go jak ciin, go alɛɛth lɔ piny: go rɔt jɔt ku le luɔɔi.

¹⁶ Ɣɔn thei, ke kek bii kɔc juɛc ci jak rac ke dɔm: go jak rac ciec ne kegup ne wɛt, ku cɔk kɔc bec kedhia cɔk dem:

¹⁷ bi ke cii Yithaya nebi luel bi ya yic, jiɛm, Ye kee ka ye wɔ niɔɔp laar, ku ɣɛɛc benyda.

¹⁸ Ɣɔn ŋeme Yecu dun diit tɔ kene yen, go ke yɔɔk bi lɔ lɔŋti.

¹⁹ Go dugɛr bɛn, ku yook, Ye Dupioc, yin ba ya kuany cok ne ɣan yin ke lɔ thin kedhia.

²⁰ Go Yecu yɔɔk, Ye awan aanɔŋ adhumken, ku diɛt nhial aanɔŋ ɣoot; ku Wen de raan acin te yen yenom kan.

²¹ Ku yooke ran toŋ de kɔcpiocke, Ye Bɛnydit kɔn ɣa puɔl ba lɔ ba awa lɔ thiɔk.

²² Go Yecu yɔɔk, Ye ye ɣa biɔth, ku ne kɔc ci thou thiɛk kɔcken ci thou.

²³ Te cen lɔ ne riaiic, go kɔckek piocke kuany cok.

²⁴ Ŋɛmka, go yom dit go tuɔl bɛɛr, agut te kum en riai piny ne atitiak; ku ci niin.

²⁵ Goki bɛn enɔŋ en, ku packi, jamki, Yi Bɛnydit, luak wɔ; wɔ diir.

²⁶ Go ke yɔɔk, Ye yeŋo riɔc we, we kɔc ke gam koor? Ku jɔt rɔt wɛɛi yom ku bar, go lɔ diu areet.

²⁷ Go kɔc gai, ku jamki, Yi ye ran ŋo yekene, ye yom kene bar welke piŋ?

²⁸ Na ci ɣet lɔŋti pan de Gadarai, go rɔm kene kɔc keerou nɔŋ gup jak rac, ku yiki kɔc cam areet, a go ciɛn ran ye teek leu yedhole.

²⁹ Ŋɛmka, goki coot areet, jamki, Yi yeŋo buk loi wɔne yin, yin Wen de Nhialic? ca bɛn ba wɔ luc aŋoot akɔl?

³⁰ Ku tɔ bioŋ diit de kuɔl mec ke ke nyuɛth.

³¹ Go jak rac goki lɔŋ, jamki, Yi na ciec wɔ, ke yin tuɔce wɔ ne bioŋ de kuɔlic.

³² Go ke yɔɔk, Ye lak. Goki bɛn bei, ku leki ne kuɔl yic: ku ŋɛmka, biok ebɛn ee riŋ piny te lɔ tiɛlaŋ bɛɛr, ku diirki ne piu yic.

³³ Go kɔc eke biok keek goki kat, leki bei, ku lek kaŋ luel kedhia, agut ke ci ke lɔny ne kɔc nɔŋ gup jak rac.

³⁴ Ŋɛmka, go baai ebɛn bɛn bik bi rɔm ke Yecu: na cik ye ŋem, ke lɛŋki bi jaal pinyden.