Mathayo 7 - Lek Jot de Jecu Kritho 1940

¹ Duɔka ye luk, kɛlke we bi ya luk.

² Luŋ ye we luk, yeneka bene we ya luk: ku alem ye we them, yeneka bene we ya thɛm.

³ Yeŋo ye ŋɛm riɔɔr ne wanmuuth nyin, ku cii luc ŋem ne yinyin?

⁴ Ku yeŋo yook yin wanmuuth, Wu ne ɣan miit riɔɔr bei ne yinyin; ku ŋem luc ke tɔ ne yinyin?

⁵ Yin e dudhum, kɔn luc nyaai ne yinyin, yeneka bin yin apiath ba riɔɔr nyaai ne wanmuuth nyin.

⁶ Duɔka jɔk ye yiɛn kelajik, ku duɔka margaritikuɔn ye cuat ne kuɔl nhiim, kɛleke bikke dum ne kecok, ku bik retki we.

⁷ Yaka thiec, ku kabi ya yiɛn we; yaka kor, ku kabak ya yok; yaka teŋ, ku kabi ya liɛp we.

⁸ Raan ebɛn ye thiec ee kap; ran ye kor ee yok; ku ran ye teŋ, aye liɛp en.

⁹ Yeŋa de week, ne ŋɛle wende ye ne cuin, ke yin kuur?

¹⁰ ka na lim riŋ, ke yin keroor?

¹¹ Yen na nyiɛcka gɛm de kapiath enɔŋ mithkuɔn, we kɔc rac, ke Wuɔrduɔn tɔ nhial ye kepiɛth yinde gam keek kek kɔc ye ye ŋal?

¹² Yen ke dɛ ebɛn ke nɔŋ we piɔth bi kɔc ya luɔi week, yene yaka luɔi keek eya. Yenekee loŋ ku wel ke nebi.

¹³ Yaka lɔ thin ne thoŋ thi. Thok ee dit, ku dhol ee kueeth, ye lɔ ne riaakic, ku juaac ee wat ne ye leer thin.

¹⁴ Thok ee thui, ku dhol ee kuur, ye lɔ ne piiric, ku kalik keeka ye yok thin.

¹⁵ We ya nyiɛn ne nebii ye we dhoom, ye bɛn enɔŋ week e ke ceŋ biɔŋ ke amɛl; ku cik wath ne biɔk thin yiki baŋbaar.

¹⁶ Aabakke ya nyic ne luɔk ye kek luɔk. Ye kɔc abiɛi lɔ yok ne kuɔɔth yic, ku ŋaap ne thilic?

¹⁷ Yen tiim piath kedhia aaye luɔk ne luɔk piɛthden, ku lok tiim rac ne luɔk rɛɛcden.

¹⁸ Tim piath aci luɔk arac ye leu, ku tim rac aci luɔk apiath ye leu.

¹⁹ Tiim kedhia tiim cie luɔk apiath aayeke yep ku cuɛte ke mɛɛc.

²⁰ Yen aabakke ya nyic ne luɔk ye kek luɔk.

²¹ Acie raan ebɛn ran ye ɣa yɔɔk, Ye Bɛny, Bɛny, yene bi lɔ ne ceŋ de Nhialicic. Ee ran ye piɔn de Awa tɔ Nhial loi.

²² Juaac abi ɣa yɔɔk ne yekole, Ye Bɛny, Bɛny, kenku ya weet ne rinku, ku ciecku jak rac ne rinku, ku yuku kadit loi ne rinku?

²³ Ku kaba dhuɔk keek, Ya we cake kɔn nyic; jalka, we ye kerac loi.

²⁴ Yen raan ebɛn ran ye keewelcieke piŋ, ku yee ke loi, abi ciɛt ran nyic kaŋ, ci ɣonde buth ne kuur nom.

²⁵ Go deŋ tuɛny, ku bɔ aboor, ku put yom, ku yiɛɛki yeɣone; go cuɔk yuɛɛk, ne ke cene ye wɛc ne kuuric.

²⁶ Ku raan ebɛn ran ye keewelcieke piŋ, ku ci ke ye loi, abi ciɛt ran ci bel, ci ɣonde buth ne liɛt nom.

²⁷ Go deŋ tuɛny, ku bɔ aboor, ku put yom, ku yiɛɛki yeɣone. Go yuik, ku ye yuikde ke thiekic.

²⁸ Na ci Yecu keewelke thol ne luɛl, ke duut gɛi ne weetde.

²⁹ Aayeke wɛɛt ci toŋ nɔŋ riɛr, ku cii cit dugɛɛrken.