Mathayo 4 - Lek Jot de Jecu Kritho 1940

¹ Ɣɔn ke Yecu leere Jɔŋdit roor bii durieth lɔ them.

² Ku te cen thieel ne akol yic keethiɛrŋuan ku weer yic keethiɛrŋuan, ke jɔl kuk.

³ Go duthem bɛn ku yook, Ye na ye Wen de Nhialic, ke yin yɔɔke keekurke bik ya cuin.

⁴ Go dhuk jiɛm, Ye kee gɔɔr, Ya raan aci bi ya piir ne cuin nyin yetok, ee ya wɛt ebɛn wɛt ye bɛn bei ne Nhialic thok.

⁵ Go durieth laar pandiit lajik; ku tɛɛu ne yekalu nom tethoi,

⁶ ku yook, Ye na ye Wen de Nhialic, ke yin cuate rɔt piny: ee gɔɔr, Ya kabi malaikaike cɔk ye yi ŋem apiath: Ku bik yi ya muɔk nhial ne kecin, Kɛlke yin bii kuur kaak cok piny ne dhuŋ.

⁷ Go Yecu bɛɛr yɔɔk, Ye kee gɔɔr, Ya duɔne Nhialic Bɛnydiitdu duɔne ye them.

⁸ Go durieth bɛɛr laar ne kuur baar areet nom, ku nyuth ceŋ de piny ebɛn, ku dheeŋden;

⁹ ku yook, Ye keekake kedhia aabake yiɛn yin, te bin yinhiɔl tuk ne anom ku dor a.

¹⁰ Go Yecu yɔɔk, Ye nyai, Catan: ee gɔɔr, Ya yin bi Bɛnydit Nhialinydu aba ya door, ku kede yetok eka ba ya loi.

¹¹ Go durieth jal puɔl; ku ŋɛmka, malaikai kaa bɛn, ku konyki.

¹² Na ɣɔn ye piŋ gɛm de Jɔn, go jaal ne Galili;

¹³ ku pɛl Nadhareth, bii ku ceŋ ne Kapernaum, pan thiaak ke bardit, ne aken de Dhebulun thok ke Naptali:

¹⁴ bi ke ci luel ne Yithaya nebi bi ya yic, jiɛm,

¹⁵ Ye piny de Dhebulun, ku piny de Naptali, Te lɔ bardit, ne Jordan lɔŋti, Galili de Juurkɔk,

¹⁶ Kɔc ye reer ne cuɔlic Aa ɣɛɛr dit ŋem, Ku kɔc rɛɛr piny de thou ku tiɛpde, Keeka ci ɣɛɛr ke tuɔl.

¹⁷ Yekole ekee gɔle Yecu weet, ye jam, Ye wɛlka wepiɔth, ceŋ nhial ee ɣeet.

¹⁸ Ku te ciɛthe Yecu ne bar yɔu de Galili, ke ŋem ŋɛk ke manhe, Thimon ci cɔɔl Petero ku manhe Andereya, e ke deep alɛɛth bɛɛr; aake ye kɔc ke dɛp de rec.

¹⁹ Go ke yɔɔk, Ye biathka ɣa, ku we bake cɔk ye adeep ke kɔc.

²⁰ Goki alɛɛthken dac waan, ku biɔthki cok.

²¹ Ku beer ye jiɛl etɛɛn, ke beer yi ŋɛk ke manhe ŋem, Jakob wen de Dhebedayo ku manhe Jɔn, ne tɔ riɛi kene Dhebedayo wuɔnden, e ke ruk alɛɛthken; go ke cɔɔl.

²² Goki riai dac waan kene wuɔnden, ku biɔthki cok.

²³ Go Yecu piny de Galili caath ebɛn, yee kɔc piɔc ne luekken ke gueer yic, ku yee ke wɛɛt ne welpiɛth ke ceŋ, ku cɔk kɔc cɔk dem ne bec ebɛn ku tɔɔk ebɛn.

²⁴ Go thoŋde lɔ ne Thuriaic ebɛn: goki yiɛn kɔc tok kedhia, cike muk ne benye ke benye ku kaluc ke, ku ci ke dɔm ne jak rac, ku nok, ku keu, ku adhiɛɛk; go ke cɔk dem kedhia.

²⁵ Go biɔth cok ne duut ne Galili, ku Dekapoli, ku Jeruthalem, ku Judaya, ku Jordan lɔŋti.