Mathayo 25 - Lek Jot de Jecu Kritho 1940

¹ Ceŋ de pan nhial abi ciɛt nyiir keethiɛr ci lambaiken loom, ku leki lorki ran thiek.

² Ku ci dhiec bel ne keyic, ku nyic dhiec kaŋ.

³ Ka ci bel, wen loom kek lambaiken, e kaake cin yic miok:

⁴ ku leer nyiir nyic kaŋ miok ne gutken yic ku lambaiken.

⁵ Na ye ran thiek ye ŋoot wei, e ke tɛc ninki.

⁶ Ɣɔn ne wɛɛric ke cɔt tɔ, Ya ŋɛmka, ran thiek! Baka bei, luɔrka.

⁷ Go keenyiirke kedhia roth jɔt, ku cothki lambaiken.

⁸ Go ka ci bel ka nyic kaŋ yɔɔk, Yi miacka wɔ ne miokduɔn; lambaikuɔ aa yai.

⁹ Go ka nyic kaŋ dhuk, jamki, Yi kace wɔ bi yen leu wɔne week: yen laka te nɔŋ kɔc ke ɣɔc, ku bak lɔ ɣooc ne gupkuɔn.

¹⁰ Ana yi lek ɣooc, ke ran thiek bɔ; go ka ci roth juiir lɔ kene yen te de miɛth de thiek: ku thieeke ɣot.

¹¹ Ela e ke bɔ eya keenyiirke, jamki, Yi Bɛny, Bɛny, liɛpe wɔ ɣot thok.

¹² Go dhuk jiɛm, Ye we ya yɔɔk neyic, Ya we kuɔcke.

¹³ Yen yaka tiit, ne kuny kuc we kol ka thaa bi Wen de raan bɛn.

¹⁴ Aciit ke ran lɔ pan dɛ, a go aluɛkke cɔɔl, ku nyiɛŋ ke kake.

¹⁵ Yin ran tok talantɔɔn keedhiec, ku yin rane rou, ku rane ne tok; yin ŋɛk ke ye ye leu, ku jɔl keny.

¹⁶ Go ran nɔŋ talantɔɔn keedhiec dac lɔ ku juɛk keyic ne ɣooc abik ya thiɛr.

¹⁷ Ku yene ye cɔɔk de ran de rou juɛk ren dɛ thin.

¹⁸ Go ran de tok lɔ ku wec toŋde piny, thiɛn weu ke bɛnyde.

¹⁹ Na ɣɔn ci bɛny de keealuɛkka ceŋ wei, ke jɔl bɛn, ku gɔl kuɛn kene keek.

²⁰ Go ran de talantɔɔn keedhiec go bɛn kene dhieny dɛ, ku jiɛm, Ye Bɛny, yin ee yin ci ɣa nyaŋ talantɔɔn keedhiec: ku kaacake juɛk yic dhieny dɛ.

²¹ Go bɛnyde yɔɔk, Ye kapiath, yin ye aluaŋ piath ku nɔŋ adot: yin ci naŋ adot ne kadiaak, a yin ba taau ne kajuec nhiim. Lɔɔr ne yum de piɔu de bɛnyduic.

²² Go ran de talantɔɔn keerou bɛn eya, ku jiɛm, Ye Bɛny, yin ee yin ci ɣa nyaŋ talantɔɔn keerou: ku kaacake juɛk yic ren dɛ.

²³ Go bɛnyde yɔɔk, Ye kapiath, yin aluaŋ piath ku nɔŋ adot: yin ci naŋ adot ne kadiaak, a yin ba taau ne kajuec nhiim. Lɔɔr ne yum de piɔu de bɛnyduic.

²⁴ Go ran de talantɔn tok bɛn eya, ku jiɛm, Yin ee yin nyiɛc ke yin rir piɔu, ku ye tem ne ka kɛneke com, ku ye kuany ne ka kɛneke pok.

²⁵ Guɔ riɔc, ku laar ku thian talantɔndu piiny: ŋem, ŋɔ kedu eke.

²⁶ Go bɛnyde dhuk yook, Ye yin ye aluaŋ rac ku ye adakrɔt, yin nyic ɣa ke an ye tem ne ka kɛnke com, ku ya kuany ne ka kɛnke pok.

²⁷ Yen ee te ca weucie dhiil ne yin kɔc ke baŋki, a na ya bɛi, e ke te ca kacie bɛɛr yok kene juek.

²⁸ Yen lɔmka talantɔn enɔŋ en, ku yiɛnka ran de talantɔɔn keethiɛr.

²⁹ Raan ebɛn ran ye naŋ kaŋ e kabi ya miɔc, ku kabi ya naŋ kajuec. Ku ran ye ciɛn ke dɛ, ne cak ya ke tɔ ke ye, e kanyiɛɛie.

³⁰ Ku ciɛɛcka aluaŋ rac ne cuɔlic biiyic: te bi ya te de dhieu ku nyii de lec.

³¹ Na bɔ Wen de raan ne nuɔmde, ku malaikai kene yen, e kabi nyuc ne thonyden de nuɔm nom,

³² ku juɔɔr ebɛn abi gueer ne yenom: ku kaabike poc yic, ci man ye abiok amɛl poc ne buɔɔth yic.

³³ Ku kabi amɛl taau cuec, ku buɔɔth ciɛm.

³⁴ Ku kaabi Melek ke yɔɔk, kek ka ci taau cuec, Ye baka, we eka ci thiei ne Awa, ku lɔmka ceŋ ci juɛr week ɣɔn ciɛke piny.

³⁵ An ee ɣan ci cɔk, guɔka ɣa cɔk ciɛm: an ee ci yal, guɔka ɣa cɔk dek: an ee ci lei, guɔka ɣa loom:

³⁶ an ee ci tat, guɔka ɣa piɔth: an ee ci bɛc, guɔka ɣa neem: an ee ci mac, guɔka bɛn enɔŋ ɣa.

³⁷ Ku kabii kɔc lajik dhuk yookki, Yi Bɛny, ye naa cii wɔ yi ŋem ne ci cɔk, ku miithku yin? ka ca yal, ku yinku yi piu?

³⁸ Ku ye naa cii wɔ yi ŋem ke yin ye alei, ku lomku yi? ka ca tat, ku piothku yi?

³⁹ Ku ye naa cii wɔ yi ŋem ke yin bec, ka ne mɛcic, ku buku enɔŋ yin?

⁴⁰ Ku kabii Melek dhuk yook keek, Ye we ya yɔɔk neyic, Ya ke cak luɔi ran toŋ de keewatmɛthcieke, acit ke cak luɔi ɣɛn.

⁴¹ Ku kabi kɔc ciɛm yɔɔk eya, Ye jalka eene, we ci cieen, laka ne many thɛɛric many ci juɛr durieth kene malaikaike.

⁴² An ee ɣan ci cɔk, guɔka ɣa cuɔk cɔk ciɛm: ku ca yal, guɔka ɣa cuɔk cɔk dek:

⁴³ an ee ci lei, guɔka ɣa cuɔk lom; taat, guɔka ɣa cuɔk pioth: bɛc, ku mac, guɔka ɣa cuɔk nem.

⁴⁴ Ku kabik yɔɔk, jamki, Yi Bɛny, ye naa cii wɔ yi ŋem ne ci cɔk, ku ca yal, ku ye alei, ku tat, ku bɛce, ku ci yi mac, goku yi cuɔk lui?

⁴⁵ Ku kabi dhuɔk keek, jiɛm, Ye we ya yɔɔk neyic, Ya na kɛnke ya luɔi toŋ de keekathiike, e kacit ke kɛnka luɔi ɣɛn.

⁴⁶ Keekake aabi lɔ ne many thɛɛric: ku kalajik ne piir athɛɛric.