Mathayo 23 - Lek Jot de Jecu Kritho 1940

¹ Go jam ke duut ku kɔckek piocke,

² yook keek, Ye dugɛɛr ku Parithai aaye reer ne thony de Mothe nom.

³ Yen ke dɛ ebɛn ke yiki lɛk we, yaka loi ku yaka muk: ku duɔke luɔiden ye loi; ayiki luel, ku cik ye loi.

⁴ Ee yic, aaye duɔt thiek edot duut ku yiki kan ne kɔc keet; ku keek ne gupken acik ye wek ne ciin tok.

⁵ Luɔiden yiki loi ebɛn ayiki loi bii kɔc ya ŋem. Aaye pulaktiriaiken cɔk dhil, ku yiki buuk ke alɛthken thook cɔk dit,

⁶ ku yiki ɣɔn dit tueŋ ke miɛth nhiar, ku thoc dit ke luek ke gueer,

⁷ ku muɔth ne ɣɔn ke ɣɔc, ku bi kɔc ke ya cɔɔl, Yi Rabi.

⁸ Ku ne we cie cɔɔl Rabi: ee tok yenekee dupionyduɔn; ku we wedhia we ye ŋɛk ke manhe.

⁹ Ku cin ran dɛ yaka cɔk ye wuɔrduɔn ne piny nom; ee tok yenekee Wuɔrduɔn, man ye tɔ nhial.

¹⁰ Ku duɔke ye coot, wuɔ dudok: ee tok yenekee dudoŋduɔn, Kritho.

¹¹ Ku ran ye dit ne weyic, yeneka bi ya ya awunduɔn.

¹² Raan ebɛn ran ye rɔt cɔk dit, abi ya cɔk koor; ku raan ebɛn ran ye rɔt cɔk koor, abi ya cɔk dit.

¹³ We bi naŋ dhieu, we dugɛɛr, ku Parithai, we kɔc ke adhuɔɔm! ne thiek ci we kɔc thiɛɛk wei ne ceŋ de pan nhialic. We cie lɔ thin ne gupkuɔn, ku yaka kɔc ye lɔ thin gel ne lɔ.

¹⁴ We bi naŋ dhieu, we dugɛɛr, ku Parithai, we kɔc ke adhuɔɔm! ne ke ye we ɣoot ke diarjɔɔk cam yic, ku yaka lɔŋ cɔk baar ne adhuɔɔm. Yen we bi naŋ lukwei gok.

¹⁵ We bi naŋ dhieu, we dugɛɛr, ku Parithai, we kɔc ke adhuɔɔm! Ne yuil ye we bar yuil ku piny ba perɔthiluto tok yok; ela cak ye yok, ke cakka ye wen de giɛna wɛr week naarou.

¹⁶ We bi naŋ dhieu, we dudook ye coor, we man ye jam, Wuɔ raan ebɛn ran ye mel kueŋ ne yekalu, ee ciɛn ke dɛ; ku raan ebɛn ran ye mel kueŋ ne jini de yekalu, ee naŋ kɛny.

¹⁷ We ci bel ku cak cɔɔr; ye keno dit, ye jini ka ye yekalu e ye jini thiei?

¹⁸ Ku, Raan ebɛn ran ye mel kueŋ ne kan de koc, ee ciɛn ke dɛ; ku raan ebɛn ran ye mel kueŋ ne miɔc ye kan ne yenom, ee naŋ kɛny.

¹⁹ We ye coor: ye keno dit, ye miɔc ka ye kat e ye miɔc thiei?

²⁰ Yen ran ye mel kueŋ ne kan de koc, ee mel kueŋ ne ye ku ne ka yeke kan ne yenom kedhia.

²¹ Ku ran ye mel kueŋ ne yekalu, ee mel kueŋ ne ye ku ne yen yen man ye ceŋ thin.

²² Ku ran ye mel kueŋ ne pan nhial, ee mel kueŋ ne thony de Nhialic ku ne yen yen man ye nyuc ne yenom.

²³ We bi naŋ dhieu, we dugɛɛr, ku Parithai, we kɔc ke adhuɔɔm! ne juɛr ye we mint ku dil ku kumin juar, ku yaka kathiek ke looŋ waan, go ya luk ku kac de piɔu ku gam. Keekake ee te yaka ke dhiil ne luɔi, ku cak kɔk ye waan.

²⁴ We ye dudook ye coor, we ye dhiɛr dhiɛɛm wei ku liɛkka thɔrɔt.

²⁵ We bi naŋ dhieu, we dugɛɛr, ku Parithai, we kɔc ke adhuɔɔm! ne ke ye we abiny ku thɛn waak kɔth, ku cik yic thiaŋ ne pɛc ku luɔi rac.

²⁶ Yin Paritha ye cɔɔr, kɔn abiny ku thɛn waak yic, ku kaabi ɣɛɛr ne kekɔth eya.

²⁷ We bi naŋ dhieu, we dugɛɛr, ku Parithai, we kɔc ke adhuɔɔm! ne ke cit we ɣoot ɣeer ke rɛŋ, man ye piath ne ŋem, ku cik yic thiaŋ ne yuɔm de raan ku ka ce piath kedhia.

²⁸ Yenekee cɔɔkduɔn, we ye lajik biyic ne kɔc nyin, ku we ci yic thiaŋ ne adhuɔɔm ku rɛɛc.

²⁹ We bi naŋ dhieu, we dugɛɛr, ku Parithai, we kɔc ke adhuɔɔm! ne ke ye we rɛŋ ke nebii buth, ku yaka rɛŋ ke kɔc lajik dheeŋ,

³⁰ ku yaka jam, Wuɔ ne wɔ tɔ ɣɔn ne akol ke kuarkuɔ, e kee te kenku ya mat wɔne keek ne rim ke nebii.

³¹ Yen we ye roth lɛadd, wuɔ wɔ ye wɛɛt ke keek kek kɔc eke ye nebii nɔk.

³² Yen yaka alep ke kuarkuɔn thiɔŋ.

³³ We ye karoor, ku yaka mith ke karoor, bak luŋ de giɛna deeny wuɔde?

³⁴ Yen ŋɛmka, we yake tuɔc nebii, ku kɔc nyic kaŋ, ku dugɛɛr: ku kɔk ke keek aabakke ya dui ne ɣootkuɔn ke gueer yic, ku yaka ke ŋet ne baai ku baai:

³⁵ bi riɛm lajik ebɛn ci kuer ne piny nom bi lɔ ne wekɔth, riɛm de Abel lajik agut riɛm de Dhakaria wen de Barakia, man cak nɔk ne kaam de te de luɛŋ de wei ke kan de koc.

³⁶ We ya yɔɔk neyic, Ya keekake kedhia aabi yekuane lɔny.

³⁷ Agai ci Jeruthalem, Jeruthalem, man ye nebii nɔk, ku ye kɔc biɔɔk ne kur kɔc ci tuɔɔc enɔŋ en! An ye piɔu dac naŋ ba mithku kuɔɔt yic ci man ye ajith mithke kuɔt ne yewuɔk, ku jaiye.

³⁸ Ŋem, ɣondu ee doŋ ne riaakic.

³⁹ Yin ya yɔɔk, Ya yin ce ɣa beer ŋem, agut te bin jam, Wu keeyabi athiɛi ya tɔ kene yen, yen man bɔ ne rin ke Bɛnydit.