Mathayo 20 - Lek Jot de Jecu Kritho 19401 Ceŋ de pan nhial acit ran de baai, ci riar miakdur le kɔc ke ariɔp kɔɔr bik domden de abiɛi bi loi. 2 Na ci rɔt gam kene kɔc ke ariɔp ne denariɔn tok ne akol tok, e ke toocke domde. 3 Ku beer lɔ biyic ke thaa yin ya diak, go kɔc kɔk ŋem e ke kaac ne thukic kɔc cin luɔi: 4 go ke yɔɔk, Ye laka domic eya, ku ke ye kepiath aba yiɛn we. Goki lɔ. 5 Go bɛɛr ya lɔ biyic ke thaa yin ya dhetem ku dheŋuan, ku ye loi yeya. 6 Na yin ya thaa thiɛr ku tok, ke lɔ biyic, ku yok kɔc kɔk ne kaac; go ke yɔɔk, Ye yeŋo ye we cool e kɔɔc etene ke cin luɔi? 7 Goki yɔɔk, Yi kacin ran ci wɔ cɔɔl ne ariɔp. Go ke yɔɔk, Ye laka domic eya; ku ke ye kepiath abak loom. 8 Na ɣɔn thei, ke bɛny de dom yook buluŋde, Ye cɔl kɔc ke luɔi, ku riɔp keek, gɔc ne ran ciɛn agut tueŋ. 9 Na cik bɛn ke kɔc ke thaa thiɛr ku tok, ke ŋɛk ye denariɔn tok loom. 10 Wen yi kɔc tueŋ yi biki, goki cɔɔl yi bik kajuec loom; goki yenya ŋɛk ke denariɔn tok. 11 Na cik ye loom, e ke lum ran de baai, 12 jamki, Yi keekɔc ciɛnke aa lui ne thaa tok erir, ku cɔk ke cɔk thoŋ kene wɔɔk, wɔ kɔc ci akɔl guum ku alɛɛth de yom. 13 Go dhuk yook ran toŋ de keek, Ye math, yin caa ye loi arac: ne wɔ ken roth gam wɔ yin ne denariɔn tok? 14 Lom kedu, ku lɔɔr; yeran ciɛne anaŋ ɣɛn piɔu miɔc ci mandu. 15 Ci piath ba ke de ɣapiɔu ya loi ne kacie? ka rac nyin ne piath piath an? 16 Yen can abi ya ya tueŋ, ku tueŋ abi ya ya can; juaac aye cɔɔl, ku kalik keeka ye lɔc thin. 17 Te lere Yecu Jeruthalem, ke lom kɔcpiocke keethiɛr ku rou kepɛc, ku yook ke dholic, 18 Ye wɔ lɔ Jeruthalem, ku Wen de raan, abi yiɛn bany ke ka ke Nhialic ku dugɛɛr, ku kabik luɔk thou, 19 ku kabik yiɛn Juurkɔk bik bui, ku duiki, ku bik piat: ku bi rɔt bɛɛr jɔt ne kol e diak. 20 Go man e wɛɛt ke Dhebedayo bɛn enɔŋ en ke wɛɛtke, door, ku thiec ke thiec en. 21 Go Yecu thiec, Ye yeŋo tɔ ne yipiɔu? Go yɔɔk, Ye cɔk keewɛɛtcieke ye reer, tok ne bian cuecdu, ku tok ne bian ciɛmdu, ne ceŋduic. 22 Go Yecu dhuk jiɛm, Ye we kuc ke yaka thiec. Lɛuka dek ne abiny ban dek, ka lɛuka baptith ne baptith yene ɣa baptith? Goki yɔɔk, Yi kaleuku. 23 Go ke yɔɔk, Ye abinydie abii we dek eyic, ku we bi baptith ne baptinh yene ɣa baptith: ku nyuc ne cuenydie ku camdie acie kedie ba gam, ee ke de keek kek kɔc ci juɛr e ne Awa. 24 Na ci thiɛrkurou ye piŋ, e ke ɣok kene keewɛɛtke. 25 Go Yecu ke cɔɔl, jiɛm, Ye we nyic bany ke Juurkɔk aaye naŋ riɛr ne keyic. 26 Aci bi ya yenya ne kɛmkuɔn. Raan ebɛn ran nɔŋ piɔu bi ya dit ne weyic abi ya ya awunduɔn: 27 ku raan ebɛn ran ye tɔ tueŋ ne weyic abi ya ya aluaŋduɔn: 28 acit man ci Wen de raan bɛn bi kɔc ya luɔi, ku ce luuie, ku bi weike gam wɛɛr juaac. 29 Na yi jiɛlki ne Jeriko ke biɔth dun dit. 30 Ku rɛɛr coor keerou ne dhol kec. Na yi piŋki Yecu ne tek, e ke cot, jamki, Yi Bɛny, kace piɔu enɔŋ wɔɔk, yin wen de Dabid. 31 Go duut ke waai bik mim: goki dhiac e ke cot, jamki, Yi Bɛny, kace piɔu enɔŋ wɔɔk, yin wen de Dabid. 32 Go Yecu kɔɔc, ku cɔɔl keek, ku thiec, Ye yeŋo tɔ ne wepiɔth ba luɔi we? 33 Goki yɔɔk, Yi Bɛny, ee buk yin. 34 Go Yecu piɔu kac, ku jiɛk kenyiin: goki dac yin, ku biɔthki. |