Mathayo 2 - Lek Jot de Jecu Kritho 1940

¹ Na ci Yecu dhieth ne Bethlekem de Judaya ne run ke Kerod melek, ŋɛmka, go roor nyic kaŋ goki bɛn piny ciɛn biki Jeruthalem,

² ku thiecki, Yi tɔ Meleŋ de Judai ne piɔc dhieth teno? Cierde acuk ŋem ciɛn, a wɔ bɔ buk bi door.

³ Na ci Kerod melek ye piŋ, go nom diaŋ kene kɔc ke Jeruthalem kedhia.

⁴ Go banydit ke ka ke Nhialic ku dugɛɛr ke kɔc cɔk gueer kedhia, ku thiec keek ye bi Kritho dhieth teno?

⁵ Goki yɔɔk, Yi ne Bethlekem de Judaya: yenekee gɔɔr ne nebii,

⁶ Ya yin Bethlekem, pan de Juda, Yin cie can de bany ke Juda: Yin eka bii gabana bɛn bei ne yiyic, Yen man bi ya dubioŋ de Yithrael jurdie.

⁷ Go Kerod roor nyic kaŋ cɔɔl neluɔɔŋ, ku piŋ te tule cier enɔŋ keek apiath.

⁸ Ku cɔk ke lɔ Bethlekem, ku jiɛm, Ye lak lɔ thiecka te de yemɛnhe apiath; ku na cak ye yok, ke we yiɛnka ɣa thok, ba lɔ door eya.

⁹ Na cik wel ke melek piŋ, goki lɔ ɣɔu dhol; ku ŋɛmka, cier cik ŋem ciɛn ee ke ŋɔɔr, agut te jɔl en ɣeet ku kɛɛc nhial te tɔ meth thin.

¹⁰ Na yi ŋemki cier, goki piɔth lɔyum ne yum dit.

¹¹ Ku bik ɣot, goki meth yok kene man Mari; goki kenhiɔl tuk ku dorki; ku liepki weuken miɔcki ne luŋ de jini, ku libano ku wal nyir.

¹² Ku nyiine keek ne Nhialic ne nyuɔth duɔke ke bi dhuk enɔŋ Kerod, goki dhuk panden ne dhol dɛ.

¹³ Te cik kek jaal, ŋɛmka, go malaika de Bɛnydit tuɔl enɔŋ Jothep ne nyuɔth, jiɛm, Ye jɔt rɔt, laare meth kene man, riɛŋe Yijep, ku tɔ eeti agut te ban yi yɔɔk: Kerod abi mɛnhthi kɔɔr bi nɔk.

¹⁴ Go rɔt jɔt, ku loom meth ku man wakɔu, leki Yijep;

¹⁵ ku tɔki eeti agut te thou e Kerod; bi ke e ci Bɛnydit luel ne thoŋ de nebi bi ya yic, jiɛm, Ye wendie aca cɔɔl bei ne Yijep.

¹⁶ Go Kerod, te cen rɔt ŋem ke cii kɔc nyic kaŋ muɔny, go ɣok areet, ku tuc, ye nɛk mith ye roor kedhia tɔ ne Bethlekem ku bɛi thiaak kene ye kedhia, dhuɔk ci run ya rou ku ka kuany kecok, ci man e cen e thiec apiath enɔŋ kɔc nyic kaŋ.

¹⁷ Go ke cii nebi Jeremia luel ya yic, jiɛm,

¹⁸ Ye ror ee piŋ ne Rama, Dhieu ku wuɔi dit, Racel adhiau ne mithke, Ku cii duɔt e piɔu gam, ne liuden.

¹⁹ Ku te ci Kerod thou, ke ŋɛmka, malaika de Bɛnydit ee tuɔl ne nyuɔth enɔŋ Jothep ne Yijep,

²⁰ jiɛm, Ye jɔt rɔt, lom mɛnhthi kene man, ku laka piny de Yithrael: kɔc eke nɔŋ piɔth bik mɛnhthi nɔk aa thou.

²¹ Go rɔt jɔt, loom mɛnhthi kene man, leki piny de Yithrael.

²² Na ci e piŋ ke Arkelao ci lɔɔk ne thony de wun Kerodic ne ceŋ ne Judaya, go riɔc ne lɔ eeti: ku ci nyiɛn ne Nhialic ne nyuɔth, go yei piny de Galili:

²³ bii ku ceŋ pan cɔl Nadhareth: bi ke cii nebi luel bi ya yic, ye kabi ya cɔɔl ran de Nadhareth.