Mathayo 17 - Lek Jot de Jecu Kritho 1940

¹ Te ci nin ya dhetem, ke Yecu leer Petero, ku Jakob, ku manhe Jɔn, ku leer ke ne kuur dit nom kepɛc.

² Ku ci rɔt wel ne kenyin: ci nyin ruɛr ci akɔl, ku ci alɛthke ɣeer wei.

³ Ku tul yi Mothe kene Elija jamki kene yen.

⁴ Go Petero dhuk yook Yecu, Ye Bɛny, apiath enɔŋ wɔ buk tɔ eene: te kɔɔr yin e, ke yin ba luɔi akat keediak eene; ba naŋ tok, ku Mothe ke tok, ku Elija ke tok.

⁵ Na ŋoot ke jam ke piol ɣer kum ke piny. Ku bɔ ror ne piolic, jiɛm, Ye yekene kee Wendien nhiar, yen man yan piɔu lɔyum; yaka piŋ.

⁶ Na ci kɔcpiocke ye piŋ, e ke gut kenyiin piny cik riɔc.

⁷ Go Yecu bɛn, ku jiɛk ke, ku jiɛm, Ye jatka roth ku duɔke riɔc.

⁸ Ku yi jɔtki kenyin, ke cin ran ŋemki, aye Yecu yetok.

⁹ Na yi biki piny ne kuur nom, e ke lom Yecu kethook, jiɛm, Ye duɔke lek ran dɛ ye ke cak ŋem, agut te bi Wen de raan rɔt jɔt ne thouic.

¹⁰ Go kɔcpiocke thiec, Yi yeŋo ye dugɛɛr jam yi Elija abi rɔt kan dhiɛl ne bɛn?

¹¹ Go dhuk jiɛm, Ye Elija abi bɛn eyic, ku bi ka ci riaak kɔɔc kedhia.

¹² We ya yɔɔk, Ya Elija ee thok ne bɛn, ku kakucki, ku kayiki luɔi ke cik tak. Yenekee cɔɔk bi Wen de raan gum enɔŋ keek eya.

¹³ Go kɔcpiocke nyic yi kajam ne ke de Jɔn Baptith.

¹⁴ Na ci ɣeet te de duut, ke raan bɔ enɔŋ en, bii tuk enhiɔl, ku jiɛm,

¹⁵ Ye Bɛny, kace piɔu ne wendie, anɔŋ nok, ku kayee yɔŋ areet. Ayee dac yuɛt mɛɛc, ku dɔc yuɛt ne piu yic.

¹⁶ Guɔ yiɛn kɔckuk piɔceke, goki ciɛk leu ne nyiɛi.

¹⁷ Go Yecu dhuk jiɛm, Ye we kuan rɛɛc cin gam, ba tɔ wɔ we anana? ba gum ne week anana? bɛye ene enɔŋ ɣa.

¹⁸ Go Yecu waai, go jɔŋ rac jaal ne yeguɔp. Go dhuk jal guɔ pial ne yethane.

¹⁹ Go kɔcpiocke bɛn enɔŋ Yecu kepɛc, jamki, Yi yeŋo e cii wɔ ye leu ne nyiɛi?

²⁰ Go ke yɔɔk, Ye kee ke koore gamduɔn. We ya yɔɔk neyic, Ya na yaka naŋ gam ci nyin toŋ de muthada, ke we yook yekuure, Wuɔ wuɔce rɔt ene; e kaɣoc rɔt; ku cin ke cak ye leu.

²¹ Ke cit yekene acie bɛn bei te cin lɔŋ ku thieel.

²² Na ŋootki Galili, e ke yooke Yecu ke, Ye Wen de raan abi gam ne kɔc cin.

²³ Ku kabik nɔk, ku kabi rɔt bɛɛr jɔt ne kol e diak. Goki piɔth dhiau areet.

²⁴ Te cik keek bɛn Kapernaum, ke kɔc ye riɛɛr juaar bɔ enɔŋ Petero, ku thiecki, Yi ci dupionyduɔn ye juar?

²⁵ Go gam. Ɣɔn ye bii ɣot, ke kɔn Yecu thiec, jiɛm, Ye yeŋo tak, Thimon? Ye meleek ke piny nom juɛr ne ŋa? yee wɛɛtken, ka yee alɛi?

²⁶ Go luel, Ye kaye alɛi. Go Yecu yɔɔk, Ye wat aaye laau.

²⁷ Ku lɔɔr bɛɛr, ku dɛɛpe alau, ku lom rɛc kɔn wɛi. Na liep ethok, ke yin bi riar yok: lom, ku yiɛne keek ne ɣɛn ku yin; kɛleke buk ya cɔk kɔth.