Mathayo 15 - Lek Jot de Jecu Kritho 1940

¹ Ku bɔ Parithai kene dugɛɛr enɔŋ Yecu ne Jeruthalem, ku thiecki,

² Yi yeŋo ye kɔckuk piɔceke wel ke roordit thɛɛr doony? Ne ke cik kek ye piny te ciɛm kek.

³ Go dhuk thiec keek, Ye yeŋo ye we loŋ de Nhialic doony eya ne wel thɛɛrkuɔn?

⁴ Nhialic ee jam, Ye yee wuur theek ku moor; ku, Ye ran ye wun jaam arac ka man, ke ne thou.

⁵ Ku we ye jam, Wuɔ na yook raan wun ka man, Ye kee ya ba yiɛn yi aca miɔc Nhialic,

⁶ ke kaci wun ka man ye dhiil ne thɛk. We ci wɛt de Nhialic cɔk ye ke piɛlic ne wel thɛɛrkuɔn.

⁷ We ye dudhuum, ee cii Yithaya nyiɛc luel ne week, jiɛm,

⁸ Ye keekɔcke aaye roth cuɔt ɣa ne keliep, ku yiki ɣa noom ne kethook; Ku kaamec piɔth enɔŋ ɣa.

⁹ Ku kaaye ɣa door ne ciɛlic, Ku ka yee kek ke weet aaye looŋ ke raan.

¹⁰ Ku cɔɔl duut ku yook, Ye piɛŋka, ku muɔkka;

¹¹ Acie ke ye lɔ ne thok e ye raan cɔk rac; ee ke ye bɛn bei thok, yenekee raan cɔk rac.

¹² Go kɔcpiocke bɛn, ku yookki, Yi nyic Parithai e ke ci piɔth rac enhia piŋ kek yewɛte?

¹³ Go dhuk jiɛm, Ye wal ebɛn wal kene com ne Awa tɔ nhial, abi wɛc bei.

¹⁴ Pɛleke: aaye ŋɔɔr e ke ye coor. Ku na ye cɔre cɔre ŋɔɔr, e kaaye lony adhum kedhia.

¹⁵ Go Petero dhuk yook, Ye lɛkne wɔ yeparabole.

¹⁶ Go thiec, Ye ŋuɔtka ke kɛnka guɔ dot eya?

¹⁷ Cakka ye ŋem, ke ke ye lɔ thok ye lɔ yiɛɛc ku le nyaai?

¹⁸ Ku ka ye bɛn bei ne thok, aaye bɛn bei ne piɔuic, ku keeka ye raan cɔk rac.

¹⁹ Ka ye bɛn bei ne piɔuic eke, tɛŋ rac, ku tir, ku kɔɔr de roth de yi moc ke tiik, ku bɛɛl, ku kuel, ku rieth, ku lɛɛt.

²⁰ Keeka ye raan cɔk rac: ku kacie ciɛm ke raan ken piny e ye raan cɔk rac.

²¹ Go Yecu jaal eeti, nyiɛi rɔt leer piny de Turo ku Thidon.

²² Ku ŋemka, tiŋ toŋ de Kanaan ee bɛn bei yepinye, ku coot, jiɛm, Ye kace piɔu enɔŋ ɣan, yin Bɛnydit, wen de Dabid; nyandie ayee jɔŋ rac yɔŋ areet.

²³ Go ciɛn wɛt dhuk e. Ku bɔ kɔcpiocke ku lɛŋki, jamki, Yi ciec, ee wɔ kuany cok ke cot.

²⁴ Go dhuk, jiɛm, Ye ɣan ci tuɔc amɛl ci maar ke dhien de Yithrael kepɛc.

²⁵ Go tiik bɛn, ku door, jiɛm, Ye Bɛnydit, kony ɣa.

²⁶ Go dhuk, jiɛm, Ye kaci piath bi cuin de mith ya loom ku cuete jɔk.

²⁷ Go jam, Ye kee yic, Bɛnydit, jɔk aaye thethuei ye loony piny ne ageen ke banyken nhiim cam.

²⁸ Go Yecu dhuk, yook, Ye tiik, gamdu kadit: ke de piɔndu abi luɔi yi. Ku go nyande pial ne yethane.

²⁹ Go Yecu jaal eeti, ku ɣeet te thiak ke bar de Galili; ku leer ne kuur nom, le reer.

³⁰ Go dun dit bɛn enɔŋ en kene ŋot, ku coor, ku kɔc cin thook, ku kɔc nɔŋ ɣɔn ci tɛm ne kegup, ku kɔc juec kɔk; goki ke taau ne yenom; go ke cɔk dem.

³¹ Go duut gai, te cik kek kɔc cin thook ŋem e ke jam, ku kɔc nɔŋ ɣɔn ci tɛm e ke piath, ku ŋot e ke cath, ku coor e ke yiɛn: goki Nhialiny de Yithrael noom.

³² Go Yecu kɔcpiocke cɔɔl, ku jiɛm, Ye an kɔc piɔu ne duut, ne ke ci kek tɔ kene ɣan ne akol keediak, ku cin ke camki, Ku kaacaa ciec ne cɔk, kɛleke bi lɔ kuk dholic.

³³ Go kɔcpiocke yɔɔk, Yi buk monoi juec yok eno roor eene, bi dun dit kuɛth?

³⁴ Go Yecu ke thiec, Ye naŋka monoi keede? Goki, Yi kaaye dherou, ku rec thii keediak.

³⁵ Go duut yɔɔk bi nyuc piiny.

³⁶ Ku loom monoi keedherou ku rec, ku leec, ku wɛɛk ke, ku yin ke kɔcpiocke, bik ke yiɛn duut.

³⁷ Goki cam kedhia, kuethki. Ku jɔlki thethuei ci both kuany ne thiaŋ akuɔp keedherou.

³⁸ Ku kɔc eke ciɛm aaye bianabur ŋuan, ke cin diar ku mith.

³⁹ Go duut cɔk puɔk, ku leer riɛi, bii piny de Magdala.